LAASUNDE 2 - Bisã Bible 2005

Pɔnnakɛna pãmɛ

¹ Ma ò ma zĩdanɛ: Ǹ futɛ ǹ pɔnnakɛna yɔ̃ ǹ gwa ǹ nnamana dɔ̃, akũ ma è abirekũ pãmɛ dɔ.

² Ma è kũ yáadɔna bi yɔ̃nkɔyãmɛ. Pɔnnakɛna sɔ̃, bɔ́n òdi leaa?

³ Ma pɔnna wɛ̀tɛ wɛ̃minaa gũn ma ɔ lìka yɔ̃nkɔyãi, ama ma swɛ̃̀ tɛn domɛnɛ arɛ ɔ̃ndɔ̃ gũn de mà dɔ̃ yã kũ à mana bisãsirinɛ à kɛ andunia gũn a wɛ̃̀ndi zaka lɛ́n.

⁴ Ma zĩ zɔ̃kɔ̃nɔ ɔ kpà, ma kpɛ́nɔ bò ma zĩdanɛ ma geepi línɔ pɛ̀pɛ dasidasi.

⁵ Ma karanɔ kpàkpa ma swa dàkonɔ kɛ̀kɛ ma lí kũ òdi a nɛ́ ble buri sĩnda pínki bàban.

⁶ Ma íkakinɔ kɛ̀kɛ ògɔ̃ mɔtɔ pisi líkpɛ pìnɔa.

⁷ Ma zɔ̀nɔ lùlu gɔ̃gbɛ̃nɔ kũ nɔgbɛ̃nɔ, ò a kenɔ ì ma bɛa. Má zùnɔ kũ pɔ́kãde ketenɔ vĩ dasidasi de gbɛ̃ kũ ò kú Yurusalɛmu ma ãnɔla ń pínki.

⁸ Ma andurufu kũ wuraao kàkaramai kũ kínanɔ aruzɛkɛnɔ kũ ń bùsu pɔ́nɔ. Ma lɛ̀sirinɔ sɛ̀ gɔ̃gbɛ̃ kũ nɔgbɛ̃nɔ, ma nɔgbɛ̃ kũ gɔ̃gbɛ̃ dì lukańyĩnɔ sɛ̀ dasi.

⁹ Ma tɔ́ bò, má zɔ̃kɔ̃ de gbɛ̃ kũ ò kú Yurusalɛmu ma ãnɔla ń pínki, akũ má kpɛ́ ɔ̃ndɔ̃ vĩ a pínki gũn.

¹⁰ Mádi gí ma zĩdanɛ kũ pɔ́ kũ à ma wɛ́ blèeoro. Mádi pɔ́ kũ à ma pɔ gbà ke tóro. Ma pɔ kɛ̀ nna ma zĩkɛna sĩnda pínkia, àkũmɛ ma ísimmawarana pínki láada ũ.

¹¹ Kũ ma wɛ́ pɛ̀ yã kũ ma kɛ̀nɔi pínki kũ ísimma kũ ma wàraao a musu, ma è a pínki bi pãmɛ, pɛna gukoriamɛ, à àre vĩ andunia gũnlo.

¹² Akũ ma laasun lɛ̀ gɛna ɔ̃ndɔ̃ kũ yɔ̃nkɔkɛo kũ mìsarikɛo kpa. Yã kũ ò kɛ̀ zaa zĩ baasiro, a kpaten kína gɛ̃nɛ ni kɛ dɔɔ?

¹³ Ma è ɔ̃ndɔ̃ àre vĩ de yɔ̃nkɔkɛla lákũ gupura dìgɔ̃ àre vĩ de gusirala nà.

¹⁴ Ɔ̃ndɔ̃ri wɛ́ dìgɔ̃ kú a arɛ, yɔ̃nkɔ dìgɔ̃ kure gusiran. Akũ ma è gó dokɔ̃nɔ mɛ́ ani ń bikũ ń pínki.

¹⁵ Akũ ma laasun lɛ̀ ma swɛ̃̀n ma pì, zaakũ gó dokɔ̃nɔ mɛ́ ani ó bikũ kũ yɔ̃nkɔnɔ nà, bɔ́ àreen mani le ma ɔ̃ndɔ̃aa? Akũ ma pì, abirekũ pãmɛ dɔ.

¹⁶ Ɔ̃ndɔ̃ri yã ni dɔ gbɛ̃ken de yɔ̃nkɔlaro, ń pínki ń yã ni sã gbɛ̃nɔn zia. Ɔ̃ndɔ̃ri dì ga lán yɔ̃nkɔ bàmɛ.

Ísimmawarana pãmɛ

¹⁷ Akũ ma a kunna gya bò, zaakũ yã kũ òtɛn kɛ andunia gũn pínki dì kɛmɛnɛ nɛ̀sɛyakayã ũmɛ. A pínki bi pãmɛ, pɛna gukoriamɛ.

¹⁸ Akũ ma zĩ kũ ma kɛ̀ andunia gũnnɔ gya bò pínki kũ mani tó ma gɛ̃nɛnɛ yãi.

¹⁹ Dí mɛ́ à dɔ̃ tó ɔ̃ndɔ̃ri ke yɔ̃nkɔn a ũu? Bee kũ abireo zĩ kũ ma kɛ̀ andunia gũn kũ ɔ̃ndɔ̃o ni gɔ̃nɛmɛ. Abirekũ pãmɛ dɔ.

²⁰ Akũ ma pɔ yàka ísimma kũ ma wàra andunia gũn pínki yã musu.

²¹ Zaakũ gbɛ̃ dì zĩ kɛ kũ ɔ̃ndɔ̃o kũ dɔ̃naao kũ gonikɛo, akũ àdi tó gbɛ̃ kũ adi a ke kɛronɛ à gɔ̃ a pɔ́ ũ. Abirekũ pãmɛ dɔ, nɛ̀sɛyakayãmɛ manamana.

²² Bɔ́n gbɛ̃ dì le ísimma kũ à wàra andunia gũn kũ ɔsi kũ à kàao pínki yã musuu?

²³ A kunna andunia gũn gɔrɔ sĩnda pínki a zĩ dìgɔ̃ sunɛ kũ yã'ũmmanaao kũ pɔyakanaaomɛ. Bee gwãani a laakarii dìgɔ̃ kpatɛnaro. Abirekũ pãmɛ dɔ.

²⁴ Yã kũ à mana kũ bisãsirio mɛ́ à de à pɔ́ ble à í mi à a zĩ sáabu kpá. Ma è abirekũ bò Luda ɔĩmɛ dɔ.

²⁵ Luda kpányĩ sari dí mɛ́ ani fɔ̃ à pɔ́ ble à pɔnna kɛɛ?

²⁶ Luda dì ɔ̃ndɔ̃ kũ dɔ̃naao kũ pɔnnao kpá gbɛ̃ kũ à kɛ̀nɛɛa, ama àdi aruzɛkɛ kakarana zĩ da durunnakɛriinɛ de à sí à kpá gbɛ̃ kũ a kɛ̀nɛɛa. Abirekũ pãmɛ dɔ, pɛna gukoriamɛ.