FILIPIDENƆ 1 - Bisã Bible 2005

Pɔlu aduakɛna Filipidenɔnɛ

¹ Makũ Pɔlu kũ Timɔtio Kirisi Yesu zɔ̀blerinɔ ókɔ̃nɔ mɛ́ o takada dí kɛ̃̀ Luda gbɛ̃ kũ ò kú Filipinɔnɛ kunna Kirisi Yesu gũn kũ ń gbɛ̃ zɔ̃kɔ̃nɔ kũ ń kpanyĩrinɔ.

² Luda ó De kũ Dikiri Yesu Kirisio gbɛ̃kɛ kɛárɛ, à á gba aafiaa.

³ Gɔrɔ kũ á yã dɔ̀magu pínki, madìgɔ̃ ma Luda sáabu kpámɛ.

⁴ Ma aduakɛnaa gũn pínki madìgɔ̃ adua kɛárɛ á pínki kũ pɔnnao,

⁵ kũ á ɔ kakarana kũmao baaru nna kpanaa gũn zaa gɔrɔ kũ a mà ari kũ a gbãrao yãi.

⁶ Má dɔ̃ sãnsãn, lákũ Luda nà zĩ manaa á tɛ́ nà, anigɔ̃ kɛ, ari à gɛ́ mì dɛo Kirisi Yesu sugɔrɔ zĩ.

⁷ À mana kũ má á yã kũna á pínki lɛ, zaakũ á yã kú ma swɛ̃̀n. Má da kpɛ́sirann yá, má zɛ kũ baaru nna pìio a yãpura ona yãin yá, á pínki á baka vĩ zɛ́ kũ Luda ma gba gũn.

⁸ Luda dɔ̃ kũ matɛni á bɛgɛ kɛ á pínki kũ Kirisi Yesu yenyĩ burio.

⁹ Madì adua kɛárɛ, de á yenyĩ gɔ̃ kara àgɔ̃ gɛ́ dɔ̃naa gũn kũ wɛ́kɛ̃naao swáswa,

¹⁰ de à yã kũ à kũ̀ à kɛ dɔ̃, àgɔ̃ kun nɛ̀sɛpuradenɔ ũ taari sari Kirisi sugɔrɔ zĩ.

¹¹ Àgɔ̃ pana kũ yã mana kũ òdi bo Yesu Kirisi kĩnaanɔo, de ò Luda tɔ́ bo, ò a sáabu kpá.

Kirisimɛ Pɔlu wɛ̃̀ndi ũ

¹² Ma gbɛ̃nɔ, má ye àgɔ̃ dɔ̃ kũ yã kũ à ma le tɛ́ kà baaru nna gɛna arɛimɛ,

¹³ akũ soza kínabɛ dogarinɔ ń pínki kũ gbɛ̃ kparanɔ dɔ̃̀ kũ Kirisi yãin ò ma dà kpɛ́siran.

¹⁴ Ma dana kpɛ́siran yãi ó gbɛ̃nɔ Dikiri náani kɛ̀ dasi de yãla, akũ ń kùgbãna kàra, òtɛn Luda yã o gbɛ̃nɔnɛ vĩna sari.

¹⁵ Yãpuramɛ, ń gbɛ̃kenɔ dì Kirisi yã waazi kɛ denlana yãi kũ nɛ̀sɛgɔ̃baao, gbɛ̃kenɔ sɔ̃ kũ nɛ̀sɛmanao.

¹⁶ Gbɛ̃ díkĩnanɔ dì kɛ kũ yenyĩomɛ, zaakũ ò dɔ̃ kũ má zɛna kũ Yesu baarunnakpanaao yãin má yĩna la.

¹⁷ Nɛ̀sɛgɔ̃bade pìnɔ sɔ̃, òdi Kirisi yã waazi kɛ denlamɔnnɛna yãimɛ, adi kɛ kũ nɛ̀sɛpuraonlo. Òtɛn da òtɛni ń kunna kpɛ́siran wari karamɛnɛ.

¹⁸ Yãken yá? Manafiki gũnn yá, yãpura gũnn yá, a pínki dé, òtɛn Kirisi yã waazi kɛmɛ. Ma pɔ nna kũ abireo, akũsɔ̃ ani ɛra à kɛ nna dɔ,

¹⁹ zaakũ má dɔ̃ kũ adua kũ átɛn kɛmɛnɛ kũ Yesu Kirisi Nini kpányĩo ni tó mà bo.

²⁰ Ma wɛ́ dɔi, akũsɔ̃ má a náani vĩ manamana, kũ wé'i ni ma kũ yãke gũnlo. Tera sà lán yã bà kũ kùgbãnao mani Kirisi tɔ́ bo ma mɛ̀ɛ gũn, má kunn yá kesɔ̃ ma gan yá.

²¹ Zaakũ Kirisi yãin má kún, ga demɛnɛ àre ũ.

²² Tó ma kunna kũ wɛ̃̀ndiio demɛnɛ zĩ àrede ũ, má dɔ̃ a kũ mani sɛ́ro,

²³ ma laasun kpaatɛnamɛ. Má ye mà tá, de màgɔ̃ kú kũ Kirisio. Gwe manamɛnɛ de gu dila zã̀.

²⁴ Ama à mana màgɔ̃ kú kũ wɛ̃̀ndiio á yãi.

²⁵ Abire yã futɛna vĩro. Má dɔ̃ kũ mani gɔ̃ la màgɔ̃ kú kãáo á pínki, de à le à gɛ́ arɛ kũ pɔnnao ludanaanikɛnaa gũn.

²⁶ Lɛn gɔrɔ kũ mani ɛra mà su á gwa lɛ, áni zɛ́ le à ĩa dã Kirisi Yesu gũn manamana ma yãi.

²⁷ A pínki dé, tó ma su á gwa ke mádi suronlo, à tó á kunna kɔ̃ sɛ́ kũ Kirisi baaru nnao, de tó matɛni á baaru ma, mà ma kũ á zɛna gíngin kũ lɛ́dokɔ̃nɔo, átɛn ɔsi ká kũ nɛ̀sɛ mɛ̀n doo baaru nna pì zɛ́ yãi.

²⁸ Àsun tó á ibɛrɛnɔ yãke vĩna á kũro. Abire nigɔ̃ deńnɛ sèeda ũ kũ ò mìi pɛ̀ kakatɛnaaa, ákɔ̃nɔ sɔ̃ áni bo mana. Luda kɛnan gwe.

²⁹ Zaakũ Luda á gbá zɛ́ à wari kɛ Kirisinɛ, adi kɛ a náanikɛna adonlo.

³⁰ Ɔsi kũ a è matɛn ká yã, akũsɔ̃ a mà matɛn ká ari tera, ákɔ̃nɔ á kú ɔsi dokɔ̃nɔ pìi gũmmɛ.