ƐZƐRA 7 - Bisã Bible 2005

Ɛzɛra su à Yurusalɛmu sorukɛnaa

^1-5 Yã birenɔ gbɛra Pɛsianɔ kína Atasɛsɛ kíblegɔrɔa Ɛzɛra bò Babilɔnu à sù. Sa'oriki zɔ̃kɔ̃ Haruna mɛ́ à Ɛlɛaza ì, Ɛlɛaza Finɛasi ì, Finɛasi Abisua ì, Abisua Buki ì, Buki Uzi ì, Uzi Zeraya ì, Zeraya Mɛrayo ì, Mɛrayo Azaria ì, Azaria Amaria ì, Amaria Aitubu ì, Aitubu Zadɔki ì, Zadɔki Salumu ì, Salumu Ilikia ì, Ilikia Azaria ì, Azaria Seraya ì, akũ Seraya Ɛzɛra pìi ì.

⁶ Ɛzɛra bi yãdannɛriimɛ, à Musa doka kũ Dikiri Isarailanɔ Luda dìtɛ dɔ̃ sãnsãn. Lákũ Dikiri a Luda ɔ kúa nà, kína pɔ́ kũ à wɛ́ kɛ̀aa kpàa pínki.

⁷ Kína Atasɛsɛ kíblena wɛ̃̀ supplade gũn Isaraila kenɔ sù Yurusalɛmu dɔ. Sa'orinɔn kú ń tɛ́ kũ Levinɔ kũ lɛ̀sirinɔ kũ zɛ́dãkpãrinɔ kũ Luda ɔn zĩkɛrinɔ.

⁸ Ɛzɛra kà Yurusalɛmu kína kíblena wɛ̃̀ supplade mɔ sɔɔrode gũn.

⁹ À fùtɛ Babilɔnu mɔ káaku gɔrɔ káaku zĩ, akũ à kà Yurusalɛmu mɔ sɔɔro gɔrɔ káaku zĩ. A Luda ɔ kúa,

¹⁰ zaakũ Ɛzɛra mɛ̀ɛ kpà Dikiri doka wàaripanaaa kũ a kɛnaao, de à le à a yãditɛnanɔ kũ a dokayãnɔ dada Isarailanɔnɛ.

Takada kũ kína Atasɛsɛ kpà Ɛzɛraa

¹¹ Takada kũ kína Atasɛsɛ kpà sa'ori Ɛzɛraa yãn dí, kũ àdi Dikiri yãditɛnanɔ kũ a dokayãnɔ da Isarailanɔnɛ.

¹² Atasɛsɛ, kínanɔ kína mɛ́ à takada díkĩna kɛ̃̀ Luda Musude dokadannɛri sa'ori Ɛzɛranɛ. Ma fɔ kpàmma.

¹³ Ma yã dìtɛ ma pì Isaraila ke sa'ori ke Levi kũ à kú ma bùsun kũ à ye à gɛ́ kũnwo Yurusalɛmu à gɛ́.

¹⁴ Makũ kũ ma ìba gbɛ̃nɔn supplanɔ mɛ́ o n gbarɛ de ǹ gɛ́ Yurusalɛmu kũ Yudanɔ bùsuuo pínki yã gwagwa n Luda doka kũ ń kũna musu.

¹⁵ Ǹ andurufu kũ wura kũ makũ kũ ma ìbanɔ o Isarailanɔ Luda kũ a bɛ kú Yurusalɛmu gbà sɛ́tɛ ǹ gɛ́o

¹⁶ kũ andurufuuo kũ wura kũ n lè Babilɔnu bùsunwo pínki kũ pɔ́ kũ gbɛ̃nɔ kũ sa'orinɔ kpà ń Luda kpɛ́ pɔ́ ũ Yurusalɛmuo.

¹⁷ Ǹ zùsanɔ kũ sãkaronɔ kũ sãnɛ bɔ̀rɔnɔ lúlu kũ ɔgɔ pìio n laakariia ǹ sa'opɔ kũ òdi ká tɛ́n à tɛ́ kũ o n Luda kpɛ́ gbagbakia Yurusalɛmu kũ flawa gbao kũ pɔ́mina gbao.

¹⁸ Mɔkɔ̃n kũ n gbɛ̃nɔ à kɛ kũ andurufuuo kũ wura kũ à gɔ̃̀ɔo lákũ à kɛ̀árɛ mana nà, lákũ á Luda yei nà.

¹⁹ Ǹ pɔ́ kũ ò nànnɛ n ɔĩ n Luda kpɛ́ donyĩkɛbɔ ũnɔ kpá Luda kũ à kú Yurusalɛmu pìia.

²⁰ Tó ń ye Luda kpɛ́ pɔ́ kparanɔi, tó a kɛkɛnaa gɔ̃̀ n yã ũmɛ, ǹ sɛ́ ma laasin gwe.

²¹ Makũ kína Atasɛsɛ, ma yã dìtɛ Yuflati bara dire ɔgɔ'utɛrinɔnɛ ń pínki. À wɛ́kɛ kũ Luda Musude dokadannɛri sa'ori Ɛzɛra kɛ̀áwa kpáa gɔ̃̀nɔ pínki.

²² Andurufu sún de tɔn aakɔ̃laro. Pɔ́blewɛ sún de tɔn baraakurilaro. Sèwɛ̃ kũ nísio sún de lita wàa basɔsɔɔrolaro. Wisi sɔ̃, lákũ à yei nà lɛ́n.

²³ Lákũ Luda Musude dìtɛ pínki nà, à kpá gɔ̃̀nɔ a kpɛ́ pɔ́ ũ, de àsun pɛ̃tɛ̃ kɛ kũ ma kíkɛo ke kũ ma nɛ́nɔoro.

²⁴ Àgɔ̃ dɔ̃ sɔ̃ kũ á zɛ́ vĩ à táfe ke ɛtɛ'ɔgɔ ke bɛ'ɔgɔ sí Luda ɔnn pì zĩkɛrinɔaro ke sa'orinɔ ke Levinɔ ke lɛ̀sirinɔ ke zɛ́dãkpãrinɔ ke zĩkɛri pãndenɔ.

²⁵ Mɔkɔ̃n sɔ̃ Ɛzɛra, ǹ yãkpatɛkɛrinɔ kũ yãgɔ̃gɔ̃rinɔ ditɛditɛ ɔ̃ndɔ̃ kũ n Luda kpàmma lɛ́n, de ògɔ̃ yã kɛkɛ a zɛ́a gbɛ̃ kũ ò kú Yuflati bara direnɔnɛ ń pínki. Onigɔ̃ de gbɛ̃ kũ ò n Luda doka dɔ̃nɔ ũ. Gbɛ̃ kũ ò dɔ̃ronɔ sɔ̃, ǹ dadańnɛ.

²⁶ Gbɛ̃ kũ n Luda doka kũ bùsu dokao kũna ɔplaplaro, oni yã daala, a dɛnaa ke a bona bùsun ke a aruzɛkɛ sinaa ke a dana kpɛ́sirann yá.

²⁷ Akũ Ɛzɛra pì: Ò Dikiri ó dizinɔ Luda sáabu kpá! À laasun mana dà kínanɛ a swɛ̃̀n, akũ kína pì gbãna kpà a kpɛ́ kũ à kú Yurusalɛmua lɛ.

²⁸ À tò ma yã kà kína kũ a ìbanɔgu kũ a kína gbãnade dakenɔ ń pínki. Lákũ Dikiri ma Luda ɔ kúma nà, ma kùu kɛ̀ gbãna, akũ ma Isaraila don'arɛdenɔ kàkara ò gɛ́ kũmao.