ƐZƐRA 6 - Bisã Bible 2005

Dariusu yãditɛna Luda kpɛ́ bona yã musu

¹ Kína Dariusu yã dìtɛ, akũ ò takada pìi wɛ̀tɛ takada kũ ò kàtɛ Babilɔnu takadakatɛkianɔ tɛ́.

² Akũ ò bò takada kokonaaa Ɛkɛbatana wɛ̃tɛ bĩniden Midiã bùsun. Yã díkĩna kú a gũn de òsun sãsãiro yãi:

³ Kína Sirusu kíblena wɛ̃̀ káaku gũn à yã dìtɛ Luda kpɛ́ kũ à kú Yurusalɛmu musu, à pì ò kpɛ́ pì bo sa'oki ũ. Ò a ɛ̃ kpátɛ, kpɛ́ pì lei ká gã̀sãkuru baaakɔ̃, a yàasa gã̀sãkuru baaakɔ̃.

⁴ Ò gbɛ̀ gbɛ̃̀ntɛ̃ mɛ̀n aakɔ̃ didikɔ̃a, lí lɛ̀kɛtɛ mɛ̀n do, gbɛ̀ gbɛ̃̀ntɛ̃ aakɔ̃, lí lɛ̀kɛtɛ mɛ̀n do. Oni a fĩna bo kũ kínabɛ ɔgɔo.

⁵ Wura kũ andurufu pɔ́ kũ Nɛbukanɛza sɛ̀tɛ Luda kpɛ́n Yurusalɛmu à sùo Babilɔnunɔ sɔ̃, oni ɛra ò gɛ́ kátɛ a gbɛ̀n Luda kpɛ́n Yurusalɛmu.

⁶ Akũ kína Dariusu lɛ́gbãzã kɛ̀ à pì: Tera sà Yuflati bara dire gbɛ̃ zɔ̃kɔ̃ Tatenai kũ Seta Bozɛnaio kũ á gbɛ̃ kũ ò kú Yuflati bara gwenɔ, à á zĩda gá gwe.

⁷ À Luda kpɛ́ bòrinɔ tó tɛɛnɛ. À tó Yuda don'arɛdenɔ kũ ń gbɛ̃ zɔ̃kɔ̃nɔ Luda kpɛ́ pì kɛkɛ ò bo.

⁸ Matɛn yã kũ àsun kɛ Yuda gbɛ̃ zɔ̃kɔ̃nɔnɛ Luda kpɛ́ pì bonaa musu ditɛárɛ. À pɔ́ kũ ò yeinɔ sɛ́tɛ ma aruzɛkɛkatɛkin gwe kũ Yuflati bara dire táfe kũ ò bòo, à kpáḿma pínki de zĩ pì sún zɛ doro yãi.

⁹ Pɔ́ kũ ò yei pínki, zùsaa, sãkaroo, sãnɛ bɔ̀rɔ kũ òdi Luda Musude gbagbaoo, pɔ́blewɛ, wisi, sèwɛ̃, nísi, àgɔ̃ kpá Yurusalɛmu sa'orinɔa lákũ gu dìgɔ̃ dɔ nà lákũ ò gbɛ̀ka nà funaa sari,

¹⁰ de ò le ò sa kũ à kà Luda Musudegu oa, ò wɛ́ kɛamɛnɛ kũ ma nɛ́gɔ̃gbɛ̃nɔ.

¹¹ Tó gbɛ̃ke yã kũ ma dìtɛ díkĩna lìtɛ, oni ade kpɛ́ lí wo ò a páa ò pɛ́tɛ ò a bɛ kɛ tubura ũ.

¹² Tó kína ke buri ke tɛn wɛtɛ yã pì litɛ ke àtɛn wɛtɛ Luda kpɛ́ kũ à kú Yurusalɛmu pì wí, Luda kũ à tò a tɔ́ kúaa pì a kakatɛ. Makũ Dariusu makũ mɛ́ ma yã pìi dìtɛ. Ò zĩ kɛa manamana.

Luda kpɛ́ sakɛnaa

¹³ Kũ kína Dariusu lɛ́gbãzã pìi kɛ̀ lɛ, Yuflati bara la gbɛ̃ zɔ̃kɔ̃ Tatenai kũ Seta Bozɛnaio kũ ń gbɛ̃nɔ yã pìi kɛ̀ kũ laakariio.

¹⁴ Akũ Yuda gbɛ̃ zɔ̃kɔ̃nɔ kpɛ́bona tɛn gɛ́ arɛ lákũ annabi Agai kũ annabi Zakari Ido nɛ́o annabikɛyã ò nà. Ò kpɛ́ pìi bò ò làka lákũ Isarailanɔ Luda ò nà, lákũ Pɛsianɔ kínanɔ Sirusu kũ Dariusuo kũ Atasɛsɛo a yã dìtɛ nà.

¹⁵ Ò Luda kpɛ́ làka Ada gɔrɔ aakɔ̃de zĩ kína Dariusu kíblena wɛ̃̀ suddode gũn.

¹⁶ Akũ Isarailanɔ Luda kpɛ́ sa kɛ̀ kũ pɔnnao, sa'orinɔ kũ Levinɔ kũ gbɛ̃ kpara kũ ò sù kũ zĩ̀zɔkɛonɔ ń pínki.

¹⁷ Luda kpɛ́ sakɛnaa pì yãi ò sa ò kũ zùsanɔ mɛ̀n basɔɔro kũ sãkaronɔ mɛ̀n wàa do kũ sãnɛ bɔ̀rɔnɔ mɛ̀n wàa pla, akũ ò sa ò kũ blèkofĩninɔ mɛ̀n kuri awɛɛpla Isaraila dasi lɛ́n ń pínki durunna kútɛkɛbɔ ũ.

¹⁸ Ò sa'orinɔ dìtɛditɛ gã̀ kũ gã̀ao, akũ ò Levinɔ dìtɛditɛ gã̀ kũ gã̀ao dɔ de ò zĩ kɛ Ludanɛ Yurusalɛmu lákũ à kú Musa takada gũn nà.

¹⁹ Mɔ káaku gɔrɔ kuri awɛɛsiikɔ̃de zĩ, zĩ̀zɔ kũ ò sùu pìnɔ Vĩnla dikpɛ kɛ̀.

²⁰ Sa'orinɔ kũ Levinɔ gbã̀ bò ń zĩdanɛ ò gɔ̃̀ gbãsĩ sari ń pínki, akũ ò Vĩnla sã kùtu kpàkpa zĩ̀zɔ kũ ò sùnɔnɛ kũ ń sa'ori dakenɔ pɔ́o kũ ń zĩda pɔ́o.

²¹ Isaraila zĩ̀zɔ kũ ò sùu pìnɔ mɛ́ ò sò kũ gbɛ̃ kũ ò ń zĩda kɛ̃̀ buri pãndenɔ yãbɛ̃̀nɛkɛnanɔa òtɛn Dikiri Isarailanɔ Luda ki wɛtɛnɔ.

²² Akũ ò Burodi Futɛnasari dikpɛ kɛ̀ kũ pɔnnao ari gɔrɔ suppla. Dikiri tò ń pɔ kɛ̀ nna, zaakũ à tò Asirianɔ kína nɛ̀sɛɛ lìtɛ ń yã musu, akũ à kpàńyĩ a kpɛ́ bona zĩ gũn, Isarailanɔ Luda pìi.