Online Bible

ƐZƐRA 5 - Bisã Bible 2005

Tatenai takadakɛ̃na kína Dariusunɛ

¹ Annabi Agai kũ annabi Zakari, Ido nɛ́o annabikɛyã ò Yuda kũ ò kú Yurusalɛmunɔ kũ Yudanɔ bùsuuo kũ Isarailanɔ Luda tɔ́o.

² Akũ Sealatiɛli nɛ́ Zɛrubabɛli kũ Yozadaka nɛ́ Yesuao fùtɛ ò nà Luda kpɛ́ bonaaa Yurusalɛmu. Luda annabii pìnɔn kú kũńwo òtɛn kpáńyĩ.

³ Gwe gɔ̃̀nɔ Yuflati bara la don'arɛde Tatenai kũ Seta Bozɛnaio kũ ń gbɛ̃nɔ sù ò ń lé ò ń lá ò pì: Dí mɛ́ à á gbá zɛ́ à kpɛ́ dí kɛkɛ à boo?

⁴ Ò gbɛ̃ kũ òtɛn kpɛ́ pì bonɔ tɔ́ gbɛ̀ka dɔ.

⁵ Ama Luda wɛ́ tɛ́ Yuda gbɛ̃ zɔ̃kɔ̃ɔ pìnɔi, akũ odi ońnɛ ò kámma boro. Ò pì oni lɛ́gbãzã kɛ Dariusunɛ gĩa, oni takada kũ ani kɛ̃ a yã musu le.

⁶ Yuflati bara la don'arɛde Tatenai kũ Seta Bozɛnaio kũ ń gbɛ̃ Pɛsianɔ takada kɛ̃̀, akũ ò kpã̀zã kína Dariusunɛ.

⁷ Lɛ́gbãzã kũ ò kɛ̀nɛɛn dí, ò pì: Kína Dariusu, o fɔ kpàmma manamana.

⁸ Kína, ǹgɔ̃ dɔ̃ kũ o gɛ Yudanɔ bùsun ari Luda kũ à zɔ̃kɔ̃ kpɛ́n. Òtɛn kpɛ́ pì bo kũ gbɛ̀ gbɛ̃̀ntɛ̃nɔ òtɛn lí lɛ̀kɛtɛ kpátɛ kpɛ́ pìi gbĩ̀nɔn. Òtɛn zĩ pì kɛ kũ laakariio àtɛn táa o.

⁹ O yã làla ń gbɛ̃ zɔ̃kɔ̃nɔa o pì: Dí mɛ́ à á gbá zɛ́ à kpɛ́ díkĩna kɛkɛ à boo?

¹⁰ O ń tɔ́ gbɛ̀ka de ò le ò onnɛ, akũ o ń don'arɛde pìnɔ tɔ́ dà takadan.

¹¹ Lákũ ò yã wèwá nàn dí. Ò pì, musu kũ zĩtɛo Luda zɔ̀blerinɔmɛ ń ũ. Kpɛ́ kũ ò bò yã à wɛ̃̀ɛ kɛ̀ ò kɛ̀kɛ òtɛn bo dɔ. Isarailanɔ kína zɔ̃kɔ̃ mɛ́ à bò yã.

¹² Ò pì ń dizinɔ Luda Musude pɔ fɛ̃̀, akũ à ń ná Kaladia buri Nɛbukanɛza, Babilɔnu kínanɛ a ɔĩ, akũ à kpɛ́ pìi wìwi à gbɛ̃ pìnɔ sɛ̀tɛ à tà kũńwo Babilɔnu.

¹³ Ama Babilɔnu kína Sirusu kíblena wɛ̃̀ káaku gũn à yã dìtɛ à pì ò ɛra ò Luda kpɛ́ pì bo dɔ.

¹⁴ Bee wura kũ andurufu pɔ́ kũ Nɛbukanɛza sɛ̀tɛ Luda kpɛ́n zaa Yurusalɛmu à kàtɛ a tãna kpɛ́n Babilɔnunɔ, kína Sirusu bɔ̀tɛ à kpà Sesebaza kũ à dìtɛ bùsu don'arɛde ũa.

¹⁵ À pìnɛ à pɔ́ pìnɔ sɛ́ à gɛ́ à kátɛ Luda kpɛ́n zaa Yurusalɛmu, tó ò kpɛ́ pìi kɛ̀kɛ ò bò.

¹⁶ Akũ Sesebaza sù Luda kpɛ́ ɛ̃ pɛ̀tɛ. Òtɛn kpɛ́ pì bo zaa gɔrɔ kũ̀a ari kũ a gbãrao, ama adi láka kɔ̀ro.

¹⁷ Kína, tó à kɛ̀nnɛ mana, ǹ takada wɛtɛ kínanɔ takadakatɛkia zaa Babilɔnu ǹ gwa tó kína Sirusu yã dìtɛ ò Luda kpɛ́ bo Yurusalɛmu. Lákũ n è nà, ǹ lɛ́gbãzã kɛwɛrɛ.

« Předchozí

další »

Následuj nás:

Sponzorované odkazy

Reklamy