ƐZƐRA 4 - Bisã Bible 2005

Ibɛrɛsɛna kũ Dikiri kpɛ́borinɔ

¹ Kũ Yudanɔ kũ Biliaminunɔ ibɛrɛnɔ mà zĩ̀zɔ kũ ò sùnɔ tɛn kpɛ́ bo Dikiri Isarailanɔ Ludanɛ,

² ò sù ò Zɛrubabɛli kũ ɔmbedenɔ lè ò pìńnɛ: À tó ò kpɛ́ bo kãáo, zaakũ odì á Luda ki wɛtɛ lán á bàmɛ se. Odìgɔ̃ a gbagbamɛ zaa gɔrɔ kũ Asirianɔ kína Esaradɔ̃ sù kũoo la.

³ Akũ Zɛrubabɛli kũ Yesuao kũ Isaraila bede kparanɔ pìńnɛ: Ó Luda kpɛ́bona de á yã ũro. Óni ó pɔ́ bo Dikiri Isarailanɔ Ludanɛ ó tɛ̃nɛ lákũ Pɛsianɔ kína Sirusu dìtɛwɛrɛ nà.

⁴ Akũ bùsupidenɔ tɛn wɛtɛ ò Yudanɔ nɛ̀sɛɛ yaka, òtɛn wɛ́ tãḿma de òsun kpɛ́ pì boro yãi.

⁵ Ò fĩna bò kína lɛ́dammarinɔnɛ zaa Sirusu gɔrɔ ari à gɛ̀ɛ pɛ́ Pɛsianɔ kína Dariusu kíblegɔrɔa, akũ ò gìńnɛ kũ yã kũ òtɛn pɛ́aao.

⁶ Ò takada kɛ̃̀ Asuerunɛ kũ à kí blè gɔ̃nɔ ò gbɛ̃ kũ ò kú Yurusalɛmunɔ kũ Yudanɔ bùsuuo pínki káara kɛ̀ a kia.

⁷ Bisilamu kũ Mitirɛdao kũ Tabɛlio kũ ń gbɛ̃ kparanɔ takada kɛ̃̀ Pɛsianɔ kína Atasɛsɛnɛ dɔ a kíblegɔrɔa. Ò kɛ̃̀nɛ kũ Siria yão, akũ ò bɔ̀kɔtɛnɛ.

⁸ Bùsu gbɛ̃ zɔ̃kɔ̃ Reumu kũ a takadakɛ̃ri Simisaio takada kɛ̃̀ kína Atasɛsɛnɛ Yurusalɛmu yã musu dɔ ò pì:

⁹ Bùsu gbɛ̃ zɔ̃kɔ̃ Reumu kũ a takadakɛ̃ri Simisaio kũ ń gbɛ̃ kpara yãkpatɛkɛrinɔ kũ gbãnadenɔ kũ Tiripɔlidenɔ kũ Pɛsianɔ kũ Ɛrɛkidenɔ kũ Babilɔnudenɔ kũ Susade kũ ò bɔ̀tɛ Elamu bùsuu gũnnɔ

¹⁰ kũ gbɛ̃ kũ kína zɔ̃kɔ̃ bɛ̀ɛrɛde Asubanipali ń bɔ́tɛ ń bùsun à ń vútɛvutɛ Samaria wɛ̃tɛn kũ Yuflati bara la gu pãndenɔ,

¹¹ ókɔ̃nɔ Yuflati baraladenɔ n zɔ̀blerinɔ mɛ́ o takada dí kɛ̃̀nnɛ kína Atasɛsɛ, o pì:

¹² Kína, ǹgɔ̃ dɔ̃ kũ Yuda kũ ò bò n kĩnaa ò sù lanɔ gɛ̀ɛ òtɛn Yurusalɛmu wɛ̃tɛ vãni pãsĩ pì kátɛ, ò ɛ̀ra òtɛni a bĩni bo dɔ, òtɛni a bɛzĩ futɛ.

¹³ Kína, ǹgɔ̃ dɔ̃ dɔ, tó ò ɛ̀ra ò wɛ̃tɛ pìi kàtɛ ò a bĩni bò ò làka, oni táfe bonnɛ doro ke ɛtɛ'ɔgɔ ke bɛ'ɔgɔ, n ɔgɔ kũ ndì sí ni lago.

¹⁴ Tera lán dí bà kína, lákũ n bɛ wisin odì ble nà, adi kũ ò n kpɛ ero. A yã mɛ́ à tò o takada díkĩna kpã̀zãnnɛ de ò yã pì onnɛ.

¹⁵ Ǹ wɛtɛ n dizinɔ takadanɔ gũn ǹ gwa, ĩni dɔ̃ dera wɛ̃tɛpidenɔ sã gbãna, ò wari dɔ̀ kínanɔa kũ bùsu gbãnadenɔ. Zaa zĩ wɛ̃tɛpidenɔ yãkete kɛ̀ zɔ̃kɔ̃. Abire yãin ò wɛ̃tɛ pìi gbòro.

¹⁶ Kína, ótɛn onnɛ, tó ò ɛ̀ra ò wɛ̃tɛ pìi fùtɛ ò ɛ̀ra ò a bĩni bò ò làka, ĩnigɔ̃ pɔ́ke vĩ Yuflati bara la doro.

¹⁷ Abire gbɛra kína takada kpã̀zãńnɛ à pì: Bùsu gbɛ̃ zɔ̃kɔ̃ Reumu kũ a takadakɛ̃ri Simisaio kũ á gbɛ̃ kpara kũ ò kú Samaria kũ Yuflati bara direnɔ, ma fɔ kpàáwa.

¹⁸ Takada kũ a kpã̀zãmɛnɛ, ò a kyó kɛ̀ ò bɔ̀kɔtɛmɛnɛ.

¹⁹ Ma pì ò wɛtɛ takada zĩnɔ gũn, akũ ò lè yãpuramɛ, wɛ̃tɛpidenɔ dìgɔ̃ bo kínanɔ kpɛmɛ. Zaa zĩ yãketedenɔmɛ.

²⁰ Kína zɔ̃kɔ̃nɔ kpata blè Yurusalɛmu gwe, ò gbãna blè Yuflati baradiredenɔa ń pínki, akũ ò táfe bòńnɛ kũ ɛtɛ'ɔgɔo kũ bɛ'ɔgɔo.

²¹ À yã ditɛ gbɛ̃ pìnɔnɛ ò kámma bo sà. Òsun ɛra ò wɛ̃tɛ pì futɛro ari mà ń gba lɛ́.

²² À laakari kɛ! Àsun nigãzĩ kpá yã pìiaro, de yã vãni pì sún ɔ tá à ó ásaru kɛro yãi.

²³ Kũ ò kína Atasɛsɛ takada pì kyó kɛ̀ ò bɔ̀kɔtɛ Reumunɛ kũ a takadakɛ̃ri Simisaio kũ ń gbɛ̃ kparanɔ, akũ ò fùtɛ ò gɛ̀ɛ ò Yudanɔ lè Yurusalɛmu gɔ̃̀nɔ. Ò gìńnɛ pãsĩpãsĩ ò pì ò kámma bo.

²⁴ Lɛn ò kámma bò lɛ kũ Luda kpɛ́ zĩ kũ òtɛn kɛ Yurusalɛmuo ari Pɛsianɔ kína Dariusu kíblena wɛ̃̀ plade gũn.