ƐZƐRA 3 - Bisã Bible 2005

Dikiri gbagbaki bonaa

¹ Kũ wɛ̃̀ mɔ supplade kà, Isarailanɔn vutɛna ń wɛ̃tɛnɔ gũn, akũ ò kɔ̃ kàkara Yurusalɛmu gbɛ̃ dokɔ̃nɔnɔ ũ.

² Yozadaka nɛ́ Yesua kũ a sa'ori dakenɔ kũ Sealatiɛli nɛ́ Zɛrubabɛlio kũ a gbɛ̃nɔ Isarailanɔ Luda gbagbaki bò, de ò sa'opɔ kũ òdi ká tɛ́n à tɛ́ kũ oa lákũ Luda gbɛ̃ Musa ò a doka gũn nà.

³ Bee kũ òtɛn vĩna kɛ gbɛ̃ kũ ò kú bùsuu pìi gũnnɔnɛ, ò gbagbaki pìi bò a gbɛ̀n, akũ ò sa'opɔ kũ òdi ká tɛ́n à tɛ́ kũ ò Dikiria kɔnkɔ kũ ɔkɔsio.

⁴ Ò Kutadɔna dikpɛ kɛ̀ lákũ à kú takada gũn nà, òdigɔ̃ sa'opɔ kũ òdi ká tɛ́n à tɛ́ kũ o lákũ gu dìgɔ̃ dɔ nà lákũ ò a lɛ́ dìtɛ nà.

⁵ Abire gbɛra ò sa'opɔ kũ òdigɔ̃ ká tɛ́n à tɛ́ kũ gɔrɔ sĩnda pínki ò kũ mɔ dufu pɔ́o kũ dikpɛ kũ Dikiri dìtɛnɔ pɔ́o kũ gba kũ òdi suonɛnɔ.

⁶ Mɔ supplade gɔrɔ káaku zĩn ò nà Dikiri gbagbanaa lɛ, bee kũ odi a kpɛ́ bo kɔ̀ro.

⁷ Ò ɔgɔ kpà gbɛ̀'arinɔ kũ lí'arinɔa, akũ ò pɔ́ble kũ pɔ́minaao kũ nísio kpà Sidɔ̃denɔ kũ Tayadenɔa, de ò sida lí zɔ̃zɔ̃ Lɛbana bùsun ò yĩyĩ ò gɛ́o ari Yɔpa funa ísirala, lákũ Pɛsianɔ kína Sirusu ń gbá zɛ́ nà.

⁸ Ń kana Luda kpɛ́ bokia Yurusalɛmu wɛ̃̀ plade mɔ plade gũn, Sealatiɛli nɛ́ Zɛrubabɛli kũ Yozadaka nɛ́ Yesuao nà zĩa kũ ń gbɛ̃ kparanɔ, sa'orinɔ kũ Levinɔ kũ gbɛ̃ kũ ò bò zĩ̀zɔkɛn ò sù Yurusalɛmunɔ ń pínki. Ò Levi kũ ò kà wɛ̃̀ baro ke kũ ò dealanɔ dìtɛ Dikiri kpɛ́ zĩ pì gbɛ̃ zɔ̃kɔ̃nɔ ũ.

⁹ Yesua kũ a burinɔ nàkɔ̃a kũ Kadamiɛlio kũ a nɛ́ Odavia burinɔ, akũ ò gɔ̃̀ zĩ pì gbɛ̃ zɔ̃kɔ̃nɔ ũ kũ Enadadao kũ a burinɔ. Levinɔmɛ ń pínki.

¹⁰ Kũ Dikiri kpɛ́borinɔ tɛn kpɛ́ pì ɛ̃ pɛ́tɛ, sa'orinɔn zɛzɛ gwe sa'ori pɔ́kasanɔ dadana, ò ń kãkãkinɔ kũkũna, akũsɔ̃ Levi nɛ́ Asafa burinɔn kú gwe dɔ kũ sɛ̃̀gɛ̃nɔ de ò Dikiri táaki lɛ́o lákũ Isarailanɔ kína Dauda dìtɛ yã nà.

¹¹ Ò lɛ̀ sì ò Dikiri táaki lɛ̀ ò a sáabu kpà ò pì: Dikiri mana, a gbɛ̃kɛ kɛna ókɔ̃nɔ Isarailanɔnɛ lakana vĩro. Akũ gbɛ̃ sĩnda pínki wiki gbãna lɛ̀ ò Dikiri táaki lɛ̀, kũ ò Dikiri kpɛ́ ɛ̃ pɛ̀tɛ yãi.

¹² Ama sa'ori paride kũ Levinɔ kũ bede kũ ò zĩ kũ̀ ò wɛ́ sì kpɛ́ káakulɛnɔ, kũ ò kpɛ́ pì ɛ̃bonaa è, ò wɛ̃nda ɔ́ɔ dɔ̀. Gbɛ̃ kparanɔ sɔ̃, òtɛn pɔnna wiki lɛ́ dasi.

¹³ Gbɛ̃ke dí pɔnna wiki dɔ̃kɔ̃nɛ kũ wɛ̃nda ɔ́ kũ òtɛn dɔo doro, kũ baadi tɛn wiki gbãna lɛ́ yãi, akũsɔ̃ ò wiki pìi mà zã̀.