Online Bible

ƐSITA 8 - Bisã Bible 2005

Kína yã pãnde ditɛna Yudanɔ yã musu

¹ Zĩ pìian kína Asueru Yudanɔ zãnguri Amana bɛ kpà a nanɔ Ɛsitaa. Ɛsita pì kínanɛ Mɔdekaimɛ a danɛ ũ, akũ Mɔdekai nà kínai.

² Kína a tãnka kũ à sì Amanaa bò à dà Mɔdekainɛ, akũ Ɛsita Amana bɛ nànɛ a ɔĩ.

³ Ɛsita ɛ̀ra à gɛ̀ɛ yã o kínanɛ dɔ. À wùtɛ a gbá arɛ àtɛn wɛ́tɛ̃ kɔ́tɛ, à kútɛ kɛ̀nɛ de à yã vãni kũ Agaga buri Amana a lɛ́ kpàkũsũ Yudanɔii gboro.

⁴ Kína wura gò dɔ̀a, akũ à fùtɛ à zɛ̀ a arɛ

⁵ à pì: Tó ma yã kàngu akũsɔ̃ ma n pɔnna lè, tó yã díkĩna zɛ́ vĩ akũsɔ̃ ma yã kànnɛ, zaakũ Amɛdata nɛ́ Amana, Agaga buri zɛ̀o à Yuda kũ ò kú n bùsu gũnnɔ dɛdɛ ń pínki, ǹ o n takadakɛ̃rinɔnɛ ò takada kɛ̃ ò Amana yã pì litɛ kpɛdangara.

⁶ Mani kɛ deran mà kisira kũ ani su ma gbɛ̃nɔ le gwaa? Mani kɛ dera mà wɛ́ kɛ pla kũ ma burinɔ dɛdɛnaaoo?

⁷ Akũ kína Asueru pì a nanɔ Ɛsitanɛ kũ Mɔdekaio: À gwa, ma Amana bɛ kpà Ɛsitaa, akũ ma Amana pìi lòko lía kũ à yã vãni kpàkũsũ Yudanɔi yãi.

⁸ À takada kɛ̃ Yudanɔ yã musu lákũ à kɛ̀árɛ mana nà. À kɛ̃ kũ ma tɔ́o à ma tãnka sèeda kɛa, zaakũ takada kũ ò kɛ̃̀ kũ ma tɔ́o ò ma tãnka sèedaa kɛ̀a litɛna vĩro.

⁹ Gwe gɔ̃̀nɔ ò kína takadakɛ̃rinɔ sìsi. Mɔ aakɔ̃de Sivã gɔrɔ baro awɛɛ'aakɔ̃de zĩn ò yã kũ Mɔdekai dìtɛ Yudanɔnɛ kũ kína ìbanɔ kũ kínanɔ kũ bùsu gbãnadenɔo kɛ̃̀ pínki bùsu mɛ̀n basuddo awɛɛsupplanɔnɛ sɛna zaa India bùsun ari à gɛ̀ɛ pɛ́ Etiopia bùsuua. Ò takada kɛ̃̀ bùsu kũ bùsuuo kũ ń takadakɛ̃na burio, buri kũ burio kũ ń yão. Ò takada kɛ̃̀ Yudanɔnɛ kũ ń takadakɛ̃na takao kũ ń buriyão dɔ.

¹⁰ Mɔdekai takada kɛ̃̀ kũ kína Asueru tɔ́o à kína tãnka sèedaa kɛ̀a à takada pìnɔ nà zĩ̀rinɔnɛ ń ɔĩ, akũ ò dì sɔ̃ bàalɛri kũ ò bò kína sɔ̃yĩkianɔa ò gɛ̀ɛo.

¹¹ Yã kũ kína dìtɛ pì Yuda kũ ò kú wɛ̃tɛ kũ wɛ̃tɛonɔ gbà zɛ́ ò kɔ̃ kakara ò gí kũ ń zĩdao. Tó buri ke bùsu zĩ̀kari ke lɛ̀tɛḿma kũ ń nɛ́nɔ kũ ń nɔgbɛ̃nɔ, ò ń dɛdɛ ò láka kũńwo ò ń mì dɛ ò ń pɔ́nɔ sɛ́tɛ.

¹² À ń gbá zɛ́ ò abire kɛ kína Asueru bùsunɔ gũn pínki mɔ kuri awɛɛplade Ada gɔrɔ kuri awɛɛ'aakɔ̃de zĩn.

¹³ Ò yã kũ à dìtɛ pì takada kpã̀zã bùsu kũ bùsuuo pínki doka ũ. Ò a kpàkpaa kɛ̀ buri sĩnda pínkinɛ de Yudanɔ gɔ̃ kú soru gũn ò yã yía ń ibɛrɛnɔa zĩ birea.

¹⁴ Kína yãditɛna pì yãin zĩ̀rii pìnɔ kɛ̀ likalika dina kína sɔ̃ bàalɛrinɔa ò gɛ̀ɛ. Akũsɔ̃ ò yã pìi kpàkpaa kɛ̀ Susa wɛ́ran.

¹⁵ Mɔdekai bò kínabɛa à kíkɛ pɔ́ pura kũ pɔ́ búguo dana, à kífura zɔ̃kɔ̃ kũ ò pì kũ wuraao kuna. À táaru biza arukĩmba tɛ̃ra dana dɔ, akũ Susadenɔ ayuwii kɛ̀ kũ pɔnnao.

¹⁶ Gu pù Yudanɔnɛ zĩ birea, òtɛn pɔnna kɛ kũ yáa dɔo, zaakũ ò ń gbá gbãna.

¹⁷ Bùsu kũ bùsuuo wɛ̃tɛ kũ wɛ̃tɛo, gu kũ kína yã ditɛnaa pìi kàn pínki Yudanɔ pɔnna kɛ̀ kũ yáa dɔo ò dikpɛ kɛ̀ kũ pɔ́blegbɛ̃naao. Buri pãndenɔ gɔ̃̀ Yudanɔ ũ dasi, kũ vĩna ń kũ Yudanɔ yã musu yãi.

« Předchozí

další »

Následuj nás:

Sponzorované odkazy

Reklamy