EBERUNƆ 5 - Bisã Bible 2005

¹ Òdi sa'oriki sĩnda pínki sɛ́ gbɛ̃nɔ tɛ́mɛ, òdi a ditɛ ń wɛ́de ũ Luda kĩnaa, àgɔ̃ gba kpáa, àgɔ̃ a gbagbańnɛ ń durunnanɔ yãi.

² Ani fɔ̃ à kɛ kũ gbɛ̃ kũ ò sã̀tɛ ń dɔ̃nasarikɛ gũnnɔo busɛbusɛ, zaakũ àpii kú kũ gbãnasarikɛomɛ se.

³ Abire yãi séde à sa o a zĩda durunna yã musu, lákũ àdi o gbɛ̃ kparanɔ pɔ́ musu nà dɔ.

⁴ Gbɛ̃ke dì a zĩda ká kpataa pìi gũnlo. Luda mɛ́ àdi a ká, lákũ à Haruna kàn nà.

⁵ Lɛn se Kirisi dí a zĩda ká sa'oriki kpataa gũnlo, Luda mɛ́ à a kàn à pì: Ma Nɛ́mɛ n ũ, gbãran ma n i.

⁶ À pì Luda yãn gukea dɔ: Ĩnigɔ̃ de sa'ori ũ gɔrɔ sĩnda pínki lán Mɛlɛkizɛdɛki bà.

⁷ Gɔrɔ kũ Yesu kú andunia gũn à adua kɛ̀ kũ wiki gbãnao kũ wɛ́'io, à kútɛ kɛ̀ Luda kũ ani fɔ̃ à a sí gaaanɛ, akũ Luda a yã mà, kũ àdi a yã da yãi.

⁸ Bee kũ a Ludanɛkɛo, à mìnatɛna Ludanɛ dàda a warikɛnaa gũn.

^9-10 Kũ mana pɛ̀kɛrɛa à làka, Luda a kà sa'oriki ũ lán Mɛlɛkizɛdɛki bà, akũ à gɔ̃̀ surabana kũ àdi lákaro boki ũ gbɛ̃ kũ òdi a yã manɔnɛ ń pínki.

Laakarikɛna funaai

¹¹ Yã bire musu ó yã vĩ dasi ò oárɛ, ama a bɔkɔtɛna zĩ'ũmɛ, zaakũ adì yã dɔ̀rɔ dɔ̃ likaro.

¹² Ákɔ̃nɔ kũ a gìi kɛ̀n lán dí bà, à mana àgɔ̃ de yãdannɛrinɔ ũmɛ, ama ari tera á kpɛ́ kú ò ɛra ò Luda yã kũ òdi dada gbɛ̃ dufunɔnɛ daárɛ dɔ. Yɔ̃'i mɛ́ à kɔ̃ sì kãáo, adi ká à yũku pɔ́ blero.

¹³ Zaakũ yɔ̃miri sĩnda pínki bi nɛ́mɛ, adi ká à ɔzɛ dɔ̃kɔ̃nɛ kũ ɔplaoro.

¹⁴ Yũku sɔ̃, gbɛ̃ kàsara kũ ò dɔ́nɛ kɛ̀onɔ pɔ́mɛ. Ò a mana dɔ̃na kɔ̃nɛ kũ a vãnioo dàda.