EBERUNƆ 3 - Bisã Bible 2005

Yesu de Musala

¹ Abire yãi ma gbɛ̃nɔ, ákɔ̃nɔ kũ Luda á sísi a su a kĩnaanɔ, à laasun lɛ́ Yesu kũ Luda a zĩ̀ Sa'oriki kũ o zɛo ũa.

² Náanidemɛ Luda kũ à a dìtɛnɛ lákũ Musa de nà Luda ɔnn.

³ Lákũ ɔnkatɛrii bɛ̀ɛrɛɛ dìgɔ̃ de ɔnla nà, lɛn Yesu gakuri zɔ̃kɔ̃ de Musa pɔ́la lɛ.

⁴ Ɔn sĩnda pínki a kàtɛri vĩ, akũsɔ̃ pɔ́ sĩnda pínki Kàtɛrin Luda ũ.

⁵ Luda ɔn zĩkɛri náaniden Musa ũ, yã kũ Luda ni o sèedademɛ.

⁶ Kirisi sɔ̃ bede pì nɛ́mɛ. Luda a ɔn nànɛ a ɔĩ. Ókɔ̃nɔmɛ ɔn pì ũ, tó ó kpɛ́ ótɛn tãmaa kũ ó vĩ lɛ́ gbɛ̃ kũ kù gbãnao.

Luda gbɛ̃nɔ kámmaboki

⁷ Abire yãi lákũ Luda Nini ò nà: Tó a Luda kòtoo mà gbãra,

⁸ àsun sãgbãna kɛ lákũ á dizinɔ kɛ̀ nàro, kũ ò ma lɛ ò ma gwa gɔrɔ kũ ò bò ma kpɛ gbárannan.

⁹ Bee kũ ò ma yãkɛnanɔ è wɛ̃̀ bupla, ò ma lɛ ò ma gwa gwe, ò ma gbãna lɛ́ gwà.

¹⁰ Akũ ma pɔ fɛ̃̀ gbɛ̃ pìnɔi, ma pì gbɛ̃ sãsãnanɔmɛ ń ũ, odi ma zɛ́nɔ dɔ̃ro.

¹¹ Akũ ma la dà ma pɔfɛ̃ gũn ma pì, oni gɛ̃ ma kámmabokinlo fá.

¹² Ma gbɛ̃nɔ, à laakari kɛ á gbɛ̃ke súngɔ̃ swɛ̃̀ vãni ludanaanikɛnasari vĩ ari à gɛ́ kɛ̃o Luda Wɛ̃̀ndidearo.

¹³ Gu kũ àdi dɔ kũ adì pi Gbãra pínki, àgɔ̃ lɛ́ dakɔ̃a, de durunna sún á gbɛ̃ke sãtɛ à sãgbãna kũro yãi.

¹⁴ Zaakũ Kirisi gbɛ̃nɔn ó ũ, tó ó náani kũ ó vĩ zaa káaku kũna gbãnagbãna ari a lɛ́a.

¹⁵ Lákũ ò ò nà: Tó a a kòtoo mà gbãra, àsun sãgbãna kɛ lákũ á dizinɔ kɛ̀ nà gɔrɔ kũ ò bò ma kpɛro.

¹⁶ Dínɔn gbɛ̃ kũ ò Luda kòtoo màa ò bò a kpɛnɔ ũ, tó adi kɛ gbɛ̃ kũ Musa ń bɔ́tɛ Misilanɔ baasiroo?

¹⁷ Dínɔn Luda pɔ fɛ̃̀ńyĩ ari wɛ̃̀ bupla, tó adi kɛ gbɛ̃ kũ ò durunna kɛ̀, ń gɛ̀ɛ gɔ̃̀ katɛna gbáranna gũnnɔ baasiroo?

¹⁸ Dínɔn à la dàńnɛ kũ oni gɛ̃ a kámmabokinlo, tó adi kɛ gbɛ̃ kũ ò gì a yã mainɔ baasiroo?

¹⁹ O è kũ odi le ò gɛ̃̀nlo ń ludanaanikɛnasari yãi.