Online Bible

DOKAGBƐSISINAA 34 - Bisã Bible 2005

Musa ganaa

¹ Musa bò Mɔabunɔ bùsu sɛ̃̀ntɛ à dìdi Nɛbo kpia ari Pisiga kpi mìsɔ̃ntɛ kũ à arɛ dɔ Yɛrikoa, akũ Dikiri bùsuu pìi mɔ̀nɛ pínki zaa Giliada bùsun ari Daninɔ bùsun

² kũ Nafatalinɔ bùsuuo pínki kũ Ɛflaimunɔ bùsuuo kũ Manasenɔ bùsuuo kũ Yudanɔ bùsuuo pínki ari ísira kũ à kú ifãlɛtɛ kpa

³ kũ Nɛgɛvio kũ Yɛriko wɛ̃tɛ dominalide guvutɛo ari Zoa.

⁴ Akũ Dikiri pìnɛ: Bùsu kũ ma la dà Ibrahĩnɛ kũ Isaakuo kũ Yakubuo ma pì mani kpá ń burinɔaa pìin gwe. Ma tò n wɛ́ sìalɛ, ama ĩni bikũ Yodaa ǹ gɛ̃nlo.

⁵ Akũ Dikiri zɔ̀bleri Musa gà Mɔabunɔ bùsun gwe lákũ Dikiri ò nà.

⁶ Akũ Dikiri a vĩ̀ guvutɛn gwe Bɛtɛpeo kpa. Gbɛ̃ke a mira ki dɔ̃ro ari kũ a gbãrao.

⁷ Musa gà a wɛ̃̀ basuddode gũmmɛ. A wɛ́ nna akũsɔ̃ a gbãna dí lagoro.

⁸ Isarailanɔ a gɛ̀ɛ kɛ̀ gɔrɔ baraakuri Mɔabunɔ bùsu sɛ̃̀ntɛ, akũ a gɛ̀kɛna kũ ɔ́ɔdɔo làka.

⁹ Ɔ̃ndɔ̃ pàpa Nuni nɛ́ Yɔsuaa kũ Musa ɔ nàa yãi. Isarailanɔ a yã mà, ò kɛ̀ lákũ Dikiri dà Musanɛ nà.

¹⁰ Annabi ke dí bo Isarailanɔ gũn lán Musa bà doro. Àdi yã o kũ Dikirio tɛ̃tɛ̃ntɛ̃

¹¹ akũsɔ̃ à sèedanɔ kũ daboyã kũ Dikiri à zĩ̀onɔ kɛ̀ Misila, Firi'auna kũ a ìbanɔ kũ a gbɛ̃nɔ arɛ ń pínki.

¹² Gbɛ̃ke dí yã naasi zɔ̃kɔ̃ kɛ kũ iko gbãnao lán Musa bà Isarailanɔ wɛ́ sìalɛ doro.

« Předchozí

další »

Následuj nás:

Sponzorované odkazy

Reklamy