DOKAGBƐSISINAA 30 - Bisã Bible 2005

Dikiri Isarailanɔ ɛrana ń gwena zĩn

¹ Tó arubarika kũ láari yã kũ ma dìtɛárɛ dínɔ á lé pínki, àgɔ̃ dɔn buri kũ Dikiri á Luda ni pɛ́áwa à á fãkɔ̃a ń tɛ́nɔ gũn.

² Tó ákɔ̃nɔ kũ á nɛ́nɔ ɛ̀ra ò arɛ dɔ̀ Dikiri á Ludaa, tó a a yã kũ matɛn ditɛárɛ gbãra mà pínki kũ nɛ̀sɛ doo kũ pɔyeinaao,

³ Dikiri á Luda ni á wɛ̃nda gwa, ani ɛra à á kakara zaa buri kũ à á fãkɔ̃a ń tɛ́nɔ gũn à su kãáo á gwena zĩn.

⁴ Bee tó à pɛ̀áwa à á fãkɔ̃a bùsu kũ ò kú ari andunia lɛ́anɔ gũn, ani á burinɔ kakara gwe à su kũńwo.

⁵ Ani ɛra kũńwo bùsu kũ à de ń dizinɔ pɔ́ ũ gũn. Tó ò bùsuu pìi kũ̀, ani arubarikaa dańgu, ani tó ò dasi kũ de ń dizinɔla.

⁶ Dikiri á Luda ni á swɛ̃̀ pípiárɛ kũ á burinɔ, á nini nigɔ̃ yei kũ nɛ̀sɛ doo de àgɔ̃ kú kũ wɛ̃̀ndiio.

⁷ Dikiri á Luda ni láari dínɔ bo á ibɛrɛ kũ ò zã̀águ òtɛn wɛ́ tãáwanɔa,

⁸ áni ɛra à Dikiri yã ma àgɔ̃ zĩ kɛ kũ a yãditɛna kũ matɛn oárɛ gbãranɔo.

⁹ Dikiri á Luda ni arubarika daágu kũ á zĩ sĩnda pínkio, ani tó á nɛ́nɔ kɔ̃ kũ á pɔ́kãdenɔ kũ á burapɔnɔ. A pɔ ni ɛra à kɛáwa nna, ani yã mana kɛárɛ lákũ a pɔ kɛ̀ nna á dizinɔa nà.

¹⁰ Tó a Dikiri á Luda yã mà a a ɔdɔki gwà akũsɔ̃ á a yãditɛna kũ ò kú doka takada díkĩna gũnnɔ kũna, tó a arɛ dɔ̀ Dikiri á Ludaa kũ nɛ̀sɛ doo kũ pɔyeinaao, ani abirenɔ kɛárɛ pínki.

Wɛ̃̀ndi ke ga

¹¹ Yã kũ matɛn ditɛárɛ gbãra pì zĩ'ũ de á gbãna lɛ́laro. À zã̀ kãáoro.

¹² À kú ludambɛro, gbasa à pi, dí mɛ́ ani gɛ́ ludambɛ à kipao de à ma à zĩ kɛa.

¹³ À kú ísira bara direro, gbasa à pi, dí mɛ́ ani bikũ ísira bara à suo de à ma àgɔ̃ kũna.

¹⁴ Yã pì kú kãáo kãnikãni, à kú á lɛ́n kũ á nɛ̀sɛɛo de à le à zĩ kɛa.

¹⁵ À ma! Matɛn wɛ̃̀ndi kũ yã manao ditɛ á arɛ gbãra kũ gao kũ yã vãnio.

¹⁶ Matɛn ditɛárɛ gbãra, àgɔ̃ ye Dikiri á Ludai àgɔ̃ tɛ́ a gɛ̀sɛgbɛɛi, à a ɔdɔki gwa àgɔ̃ a yãditɛnanɔ kũ a dokayãnɔ kũna, de àgɔ̃ kun à kɛ̀ dasi, Dikiri á Luda ni arubarika daágu bùsu kũ átɛn gɛ́ sí gũn.

¹⁷ Ama tó a kpɛ lìnɛ akũsɔ̃ ádi a yã maro, tó a kɛ̃a akũsɔ̃ a tãnanɔ gbàgba a donyĩ kɛ̀ńnɛ,

¹⁸ matɛn oárɛ gbãra, a kakatɛn gwe! Áni gì kɛ bùsu kũ átɛn bikũ Yodaa átɛn gɛ́ sí gũnlo.

¹⁹ Ludambɛ kũ zĩtɛomɛ ma sèedadenɔ ũ gbãra á yã musu. Ma wɛ̃̀ndi kũ gao dìtɛ á arɛ, arubarika yãnɔ kũ láaribona yãnɔ. À wɛ̃̀ndi sɛ́ de ákɔ̃nɔ kũ á nɛ́nɔ le àgɔ̃ kun.

²⁰ Àgɔ̃ ye Dikiri á Ludai àgɔ̃ a yã ma à naa, zaakũ àkũmɛ á wɛ̃̀ndi ũ. Ani tó à gì kɛ bùsu kũ à la dà á dizi Ibrahĩ kũ Isaakuo kũ Yakubuonɔnɛ, à pì áni kpáḿma gũn.