BONAA 8 - Bisã Bible 2005

Blɔ̀nɔ dagulanaa

¹ Akũ Dikiri pì Musanɛ: Ǹ gɛ́ ǹ o Firi'aunanɛ, makũ Dikiri ma pì à ma gbɛ̃nɔ gbarɛ ò gɛ́ donyĩ kɛmɛnɛ.

² Tó à gì ń gbarɛi sɔ̃, mani tó blɔ̀nɔ da a bùsu gu sĩnda pínki la.

³ Blɔ̀nɔ ni Nili pa ari ò bikũ bara, ò gɛ̃ a ɔnn ari a kpɛ́n, ò didi a gádoa. Ò gɛ̃ a ìbanɔ ɔnnɔ gũn kũ a gbɛ̃nɔ ɔnnɔ. Ò ká a kĩninɔ kũ a gónɔ gũn.

⁴ Blɔ̀nɔ ni didia kũ a gbɛ̃nɔ kũ a ìbanɔ ń pínki.

⁵ Dikiri ɛ̀ra à pì Musanɛ: Ǹ o Harunanɛ à a gò sɛ́ à dɔ swanɔla kũ swa'ɔnɛnɔ kũ ísɛ̃bokinɔ, blɔ̀nɔ ni da Misila bùsula.

⁶ Kũ Haruna a gòo dɔ̀ Misila ínɔla, akũ blɔ̀nɔ bɔ̀tɛ ò dà bùsuu pìla.

⁷ Akũ ɛzɛde pìnɔ kɛ̀ lɛ se ń ɛzɛdekɛ gũn, ò tò blɔ̀nɔ dà Misilala.

⁸ Akũ Firi'auna Musa kũ Harunao sìsi à pì: À kútɛ kɛ Dikirinɛ à blɔ̀nɔ kɛ̃ma kũ ma gbɛ̃nɔ, mani á gbɛ̃nɔ gbarɛ ò gɛ́ sa oa.

⁹ Akũ Musa pì Firi'aunanɛ: Ǹ gɔrɔ ditɛmɛnɛ mà kútɛ kɛnnɛ Dikirinɛ kũ n ìbanɔ kũ n gbɛ̃nɔ, de à blɔ̀nɔ kɛ̃mma kũ n ɔnnɔ ògɔ̃ kú swai ado.

¹⁰ Firi'auna pì: Zia. Akũ Musa pì: Ani kɛ lákũ n ò nà, de ǹgɔ̃ dɔ̃ kũ gbɛ̃ke de lán Dikiri ó Luda bàro.

¹¹ Blɔ̀nɔ ni kɛ̃mma kũ n ɔnnɔ kũ n ìbanɔ kũ n gbɛ̃nɔ ògɔ̃ kú swai ado.

¹² Kũ Musa kũ Harunao bò Firi'auna kĩnaa, Musa wɛ́ kɛ̀ Dikiria blɔ̀ kũ ò dà Firi'aunalanɔ yã musu.

¹³ Dikiri Musa wɛ́kɛ sì, akũ blɔ̀nɔ gàga kpɛ́nɔ gũn kũ ɔnnɔ kũ buranɔ.

¹⁴ Ò ń kákara, akũ bùsu gbĩ sɔ̃̀ pínki.

¹⁵ Kũ Firi'auna è à kɛ̀ sã̀na, a sã kpɛ́ gbãna, akũ à gì Musa kũ Harunao yã mai lákũ Dikiri ò nà.

Sàa dagulanaa

¹⁶ Dikiri pì Musanɛ: Ǹ o Harunanɛ à a gò sɛ́ à zĩtɛ lɛ́o, bùsutiti ni li sàa ũ Misila gu sĩnda pínkia.

¹⁷ Akũ ò kɛ̀ lɛ. Haruna a gòo sɛ̀ à zĩtɛ lɛ̀o, akũ bùsutiti lì sàanɔ ũ, ò dà bisãsirinɔla kũ nɔ̀bɔnɔ. Misila bùsutiti lì sàanɔ ũ pínki.

¹⁸ Ɛzɛdenɔ yɔ̃̀ ò gwà se ń ɛzɛdekɛ gũn, akũ ò fùa. Sàanɔ dà bisãsirinɔla kũ nɔ̀bɔnɔ.

¹⁹ Akũ ɛzɛdenɔ pì Firi'aunanɛ: Luda ɔgbɛɛmɛ. Ama Firi'auna sã kpɛ́ gbãna, à gì ń yã mai lákũ Dikiri ò nà.

Ífĩninɔ dagulanaa

²⁰ Dikiri pì Musanɛ: Ǹ futɛ kɔnkɔkɔnkɔ ǹ gɛ́ ǹ Firi'auna le gɔrɔ kũ àtɛn gɛ́ swai, ǹ onɛ makũ Dikiri ma ò, à ma gbɛ̃nɔ gbarɛ ò gɛ́ donyĩ kɛmɛnɛ.

²¹ Tó à gì ń gbarɛi, mani ífĩninɔ daala kũ a ìbanɔ kũ a gbɛ̃nɔ kũ a kpɛ́nɔ. Misila kpɛ́nɔ ni pa kũ ífĩninɔ, bee zĩtɛ oni daala.

²² Gɔrɔ birea mani Gosɛ̃ bùsu gu kũ ma gbɛ̃nɔn kun bo ado. Gwen ífĩninɔ ni dan gularo, de àgɔ̃ dɔ̃ kũ makũmɛ Dikiri ũ a bùsun.

²³ Mani ma gbɛ̃nɔ dɔ̃kɔ̃nɛ kũ a gbɛ̃nɔ. Zian sèedaa pì ni kɛ.

²⁴ Akũ Dikiri kɛ̀ lɛ. Ífĩninɔ kà Firi'auna ɔnn kũ a ìbanɔ ɔnnɔo. Misila yàka pínki ífĩninɔ yãi.

²⁵ Akũ Firi'auna Musa kũ Harunao sìsi à pì: À gɛ́ sa o á Ludaa bùsun la.

²⁶ Akũ Musa pìnɛ: Ani sí kɛ ò kɛ lɛro, zaakũ pɔ́ kũ óni sa o Dikiri ó Ludaa pì de Misilanɔnɛ tɛ̃̀ ũmɛ. Tó o sa ò kũ pɔ́ kũ à deńnɛ tɛ̃̀ ũo ń wára, oni ó pápa kũ gbɛ̀ɛo ò ó dɛdɛroo?

²⁷ Óni táa o gbárannan gɔrɔ aakɔ̃mɛ, gbasa ò sa o Dikiri ó Ludaa lákũ à òwɛrɛ nà.

²⁸ Akũ Firi'auna pì: Mani á gbarɛ à gɛ́ sa o Dikiri a Ludaa gbárannan, ama àsun gɛ́ zã̀ro. À kútɛ kɛnɛmɛnɛ.

²⁹ Musa pìnɛ: Tó ma ta, mani kútɛ kɛnɛ, ani ífĩninɔ kɛ̃mma zia kũ n ìbanɔ kũ n gbɛ̃nɔ. Ama ǹsun manafiki kɛ doro. Ǹ tó gbɛ̃nɔ gɛ́ sa o Dikiria.

³⁰ Kũ Musa bò Firi'auna kĩnaa, a kútɛ kɛ̀nɛ Dikirinɛ.

³¹ Dikiri a wɛ́kɛ sì, akũ ífĩninɔ kɛ̃̀ Firi'aunaa kũ a ìbanɔ kũ a gbɛ̃nɔ. Adi gɔ̃ gukearo, bee mɛ̀n do.

³² Ama Firi'auna sã kpɛ́ gbãna ari tera, à gì ń gbarɛi.