BONAA 7 - Bisã Bible 2005

Kisira mɛ̀n kuri zĩna Misilaa

¹ Akũ Dikirii pì Musanɛ: Ǹ gwa! Ma n kɛ lán ma bà Firi'aunanɛ, akũsɔ̃ n vĩ̀ni Haruna de n lɛ́gbɛkpari ũ.

² Ǹ yã kũ ma ònnɛ pínki o n vĩ̀ni Harunanɛ, ani o Firi'aunanɛ à Isarailanɔ gbarɛ ò bɔtɛ a bùsun.

³ Bee kũ abireo mani a kù kɛ gbãna. Mani sèedanɔ kũ daboyãnɔ kɛ Misila dasi,

⁴ ama Firi'auna ni á yã maro. Mani ɔ tɔ̃ Misilaa mà yãkpatɛ kɛ kũńwo pãsĩpãsĩ, mani bo kũ ma zĩ̀kari Isarailanɔ gã̀ kũ gã̀ao.

⁵ Tó ma bo kũ ma gbãnao Misilaa, mani Isarailanɔ bɔtɛn, Misilanɔ ni dɔ̃ sà kũ makũmɛ Dikiri ũ.

⁶ Akũ Musa kũ Harunao kɛ̀ lákũ Dikiri òńnɛ nà.

⁷ Gɔrɔ kũ ò yã ò Firi'aunanɛ, Musa kun wɛ̃̀ basiikɔ̃, Haruna sɔ̃ wɛ̃̀ basiikɔ̃ awɛɛ'aakɔ̃.

⁸ Akũ Dikiri pì Musanɛ kũ Harunao:

⁹ Tó Firi'auna daboyã gbɛ̀kamma, ǹ o Harunanɛ à a gò sɛ́ à pãtɛ a arɛ, ani li mlɛ̃̀ ũ.

¹⁰ Kũ Musa kũ Harunao gɛ̀ɛ Firi'auna kĩnaa, ò kɛ̀ lákũ Dikiri òńnɛ nà. Haruna a gòo sɛ̀ à pã̀tɛ Firi'auna kũ a ìbanɔ arɛ, akũ à lì mlɛ̃̀ ũ.

¹¹ Akũ Firi'auna Misila wɛ́zɛ̃rinɔ kũ ɛzɛdenɔ sìsi, akũ ò daboyã dokɔ̃nɔ pìnɔ kɛ̀ se ń ɛzɛdekɛ gũn.

¹² Kũ ń baadi a gòo pã̀tɛ, akũ ń gòo pìnɔ lì mlɛ̃̀nɔ ũ, akũ Haruna gò ń pɔ́nɔ mɔ̀mɔ.

¹³ Firi'auna sã gbãnamɛ, adi ń yã maro lákũ Dikiri ò nà.

Ínɔ linaa aru ũ

¹⁴ Dikiri pì Musanɛ: Firi'auna kù gbãna à gì gbɛ̃nɔ gbarɛi.

¹⁵ Ǹ gɛ́ ǹ a le zia kɔnkɔ gɔrɔ kũ àtɛn gɛ́ swai. Ǹgɔ̃ a dã Nili sarɛ gwe. Ǹgɔ̃ n gò kũ à lì mlɛ̃̀ ũ pì kũna.

¹⁶ Ǹ pinɛ makũ Dikiri Eberunɔ Luda ma n zĩa, n ònɛ à ma gbɛ̃nɔ gbarɛ ò gɛ́ donyĩ kɛmɛnɛ gbárannan, ama ari tera à gìmai.

¹⁷ Makũ Dikiri ma pì, yã kũ ani tó àgɔ̃ dɔ̃ kũ makũmɛ Dikiri ũn dí. Tó n Nili í lɛ̀ kũ gò kũ ń kũnaao, ani li aru ũ.

¹⁸ Kpɔ̀ kũ ò kú í pìi gũnnɔ ni gaga, Nili í ni gbĩ sɔ̃, Misilanɔ ni fu í pì minaa.

¹⁹ Akũ Dikiri ɛ̀ra à pì Musanɛ: Ǹ o Harunanɛ à a gò sɛ́ à dɔ Misila ínɔ la, ń swanɔ kũ ń swa'ɔnɛnɔ kũ ń ísɛ̃bokinɔ kũ ń íkakinɔ pínki ni gɔ̃ aru ũ. Aru nigɔ̃ dagula Misila, bee kũ kpɛ̃nɛnɔ kũ orozã gũnnɔ.

²⁰ Akũ Musa kũ Harunao kɛ̀ lákũ Dikiri òńnɛ nà. Haruna a gòo pìi sɛ̀, à Nili í lɛ̀o Firi'auna kũ a ìbanɔ wára, akũ í pìi gɔ̃̀ aru ũ pínki.

²¹ Kpɔ̀ kũ ò kú a gũnnɔ gàga, akũ Nili í pì gbĩ sɔ̃̀, Misilanɔ fùa ò mi. Aru dàgula Misila.

²² Misila ɛzɛdenɔ kɛ̀ lɛ se ń ɛzɛdekɛ gũn, akũ Firi'auna kùgbãna kũ̀, adi ń yã maro lákũ Dikiri ò nà.

²³ Firi'auna ɛ̀ra à tà a bɛa, adi yã pì da sero.

²⁴ Misilanɔ bia yɔ̃̀yɔ̃ Nili bara de ò í mi, zaakũ odi fɔ̃ ò swada'i mìro.

²⁵ À kun lɛ ari gɔrɔ supplamɛ Dikiri Nili lɛnaa gbɛra.