Online Bible

BONAA 6 - Bisã Bible 2005

Dikiri lɛ́sɛna Musanɛ Isarailanɔ surabana yã musu

¹ Akũ Dikiri pìnɛ: Ĩni yã kũ mani kɛ Firi'aunanɛ e tera. Ani ń gbarɛ ma gbãna zɔ̃kɔ̃ yãi. Ani pɛ́ḿma a bùsun ma gbãna zɔ̃kɔ̃ yãi.

² Akũ Luda ɛ̀ra à yã ò Musanɛ à pì: Makũmɛ Dikiri ũ,

³ ma bo ma su Ibrahĩ kũ Isaakuo kũ Yakubuooa Luda Gbãnasĩndapinkide ũ, ama odi ma dɔ̃ ma tɔ́ Dikiriaro.

⁴ Ma bàka kú kũńwo, ma pì mani Kanaanɔ bùsu kũ ò kú a gũn buri zĩ̀tɔ ũ kpáḿma.

⁵ Ma Isarailanɔ ndanaa mà ń zɔ̀blena Misilanɔnɛ yãi, akũ ma bàka kũ à kú kũńwoo pì yã dí sãmaguro.

⁶ A yã mɛ́ à tò ǹ o Isarailanɔnɛ makũmɛ Dikiri ũ. Mani á bo zĩ gbãna kũ Misilanɔ dàárɛ gũn, mani á bo zɔ̀blen. Mani yãkpatɛ kɛ kũńwo mani a bo kũ ma gã̀sã gbãnao.

⁷ Mani á sɛ́ ma gbɛ̃nɔ ũ màgɔ̃ de á Luda ũ, ánigɔ̃ dɔ̃ kũ makũmɛ Dikiri á Luda kũ à á bó Misila zĩ gbãna gũn ũ.

⁸ Mani gɛ́ kãáo bùsu kũ ma a la dà Ibrahĩnɛ kũ Isaakuo kũ Yakubuo gũn. Mani á gba àgɔ̃ vĩ. Makũmɛ Dikiri ũ.

⁹ Musa yã pìi ò Isarailanɔnɛ, ama odi a yã maro kũ zɔ̀zĩ pãsĩ ń mɛ̀ɛ yɔ̀ yãi.

¹⁰ Akũ Dikiri ò Musanɛ à pì:

¹¹ Ǹ gɛ́ ǹ o Misilanɔ kína Firi'aunanɛ à Isarailanɔ gbarɛ ò bɔtɛ a bùsun.

¹² Akũ Musa wè Dikiria à pì: Lákũ Isarailanɔ dì ma yã maro nà, makũ kũ ma lɛ́ tìkisi, deran Firi'auna ni ma yã ma sɔ̃ɔ?

Musa kũ Harunao buri bozirɛ

¹³ Dikiri yã ò Musanɛ kũ Harunao Isarailanɔ yã musu kũ Misila kínao, à òńnɛ ò bɔtɛ kũ Isarailanɔ Misila.

¹⁴ Ń buri ɔmbede káakunɔ tɔ́n dí. Isaraila daudu Rubɛni nɛ́gɔ̃gbɛ̃nɔn dí: Anɔku, Palu, Ɛzɛrɔnu, Kaami. Rubɛni burinɔn gwe danɛdanɛ.

¹⁵ Simɛɔ nɛ́gɔ̃gbɛ̃nɔn dí: Yemuɛli, Yami, Oada, Yakĩ, Zoa kũ Kanaa nɔgbɛ̃ nɛ́ Soluo. Simɛɔ burinɔn gwe danɛdanɛ.

¹⁶ Levi nɛ́gɔ̃gbɛ̃nɔ tɔ́n dí ń burinɔa: Gɛsɔmu, Koa, Mɛrari. Levi kɛ̀ wɛ̃̀ basuddo akuri awɛɛsupplamɛ.

¹⁷ Gɛsɔmu nɛ́gɔ̃gbɛ̃nɔn dí ń burinɔa danɛdanɛ: Libini kũ Simɛio.

¹⁸ Koa nɛ́gɔ̃gbɛ̃nɔ tɔ́n dí: Amlamu, Iza, Ɛblɔnu, Uziɛli. Koa kɛ̀ wɛ̃̀ basuddo akuri awɛɛ'aakɔ̃mɛ.

¹⁹ Mɛrari nɛ́gɔ̃gbɛ̃nɔn Mali kũ Musio ũ. Levi burinɔn gwe danɛdanɛ.

²⁰ Amlamu a dasɛ̃ Yɔkɛbɛdi sɛ̀ nɔ ũ, akũ à Haruna kũ Musao ì kãao. Amlamu kɛ̀ wɛ̃̀ basuddo akuri awɛɛsupplamɛ.

²¹ Iza nɛ́gɔ̃gbɛ̃nɔn Kora kũ Nɛfɛgio kũ Zikirio ũ.

²² Uziɛli nɛ́gɔ̃gbɛ̃nɔn Misaili kũ Ɛlɛzafão kũ Sitirio ũ.

²³ Haruna Aminadabu nɛ́ Ɛlisɛba, Nasɔ̃ dãre sɛ̀ nɔ ũ, akũ à Nadabu kũ Abiuo kũ Ɛlɛazao kũ Itamao ì kãao.

²⁴ Kora nɛ́gɔ̃gbɛ̃nɔn Asi kũ Ɛlɛkanao kũ Abiasafao ũ. Kora burinɔn gwe danɛdanɛ.

²⁵ Haruna nɛ́ Ɛlɛaza Putiɛli nɛ́nɔgbɛ̃nɔ doke sɛ̀ nɔ ũ, akũ à Finɛasi ì kãao. Levi buri ɔmbede káakunɔn gwe danɛdanɛ.

²⁶ Haruna kũ Musa kũ Dikiri òńnɛ ò Isarailanɔ bɔtɛ Misila gã̀ kũ gã̀aon gwe.

²⁷ Mɔ́kɔ̃nɔ mɛ́ ò yã ò Misilanɔ kína Firi'aunanɛ de ò Isarailanɔ bɔtɛ Misila.

²⁸ Kũ Dikiri yã ò Musanɛ Misila,

²⁹ à pì akãamɛ Dikiri ũ, yã kũ átɛn onɛn à o Firi'aunanɛ pínki.

³⁰ Akũ Musa pìnɛ a lɛ́ tìkisi, deran Firi'auna ni a yã maa?

« Předchozí

další »

Následuj nás:

Sponzorované odkazy

Reklamy