Online Bible

BONAA 5 - Bisã Bible 2005

Musa kũ Harunao gɛna Firi'auna arɛ

¹ Abire gbɛra Musa kũ Harunao gɛ̀ɛ ò Firi'auna lè ò pìnɛ: Yã kũ Dikiri Isarailanɔ Luda òon dí. À pì ǹ a gbɛ̃nɔ gbarɛ ò gɛ́ dikpɛ kɛarɛ gbárannan.

² Firi'auna wèḿma à pì: Dímɛ Dikiri ũ kũ mà a yã ma mà Isarailanɔ gbarɛɛ? Má Dikiri dɔ̃ro. Mani Isarailanɔ gbarɛro.

³ Akũ ò pìnɛ: Eberunɔ Luda bò à sùwá. Ǹ ó gba zɛ́ ò gɛ́ ò gɔrɔ aakɔ̃ kɛ gbárannan ò sa o Dikiri ó Luda pìia, de àsun gyã káwáiro kesɔ̃ zĩ̀i.

⁴ Akũ Misila kína pìi pì Musanɛ kũ Harunao: À kɛ̀ dera a tò gbɛ̃nɔ laakari tɛn go ń zĩaa? À ɛra á zĩa.

⁵ Akũ à ɛ̀ra à pì: Kũ gbɛ̃nɔ dasi kũ̀ sà, akũ á ye ò kámma bo kũ ń zĩo yá?

⁶ Zĩ birea Firi'auna yã dìtɛ Isaraila wɛ́tãmmarinɔnɛ kũ ń don'arɛdenɔ à pì:

⁷ Àsun sɛ̃̀buru kpáḿma ò kúnku kɛo lákũ adì kɛ nà yã doro. Ò gɛ́ ò ń pɔ́ kɛ̃ ń zĩda.

⁸ Ama ò kúnku kɛ lákũ òdi kɛ nà yã lɛ́n. Àsun lagońnɛro, zaakũ ma'ãdenɔmɛ. A yã mɛ́ à tò ń wiki dìgɔ̃ dɔ, òtɛn pi ò ye ò gɛ́ sa o ń Ludaamɛ.

⁹ À zĩ karańnɛ de òsun ĩampaki le ò laakari kpá ɛ́kɛyãnɔa doro.

¹⁰ Akũ ń wɛ́tãmmarii pìnɔ kũ ń don'arɛdenɔ sù ò pìńnɛ: Firi'auna pì òsun sɛ̃̀buru kpááwa doro.

¹¹ À gɛ́ à wɛtɛ á zĩda gu kũ áni len. Bee kũ abireo óni zĩ lagoárɛro, bee fíti.

¹² Akũ ò fã̀kɔ̃a ò gɛ̀ɛ Misila gu sĩnda pínki sɛ̃̀ kɛ̃ sɛ̃̀buru ũ.

¹³ Ń wɛ́tãmmarii pìnɔ dìgɔ̃ nakaraḿma lákũ gu dìgɔ̃ dɔ nà, de ò ń zĩ láka lákũ òdi láka nà gɔrɔ kũ òdi sɛ̃̀buru kpáḿma.

¹⁴ Ò gbɛ̃naa kɛ̀ Isaraila don'arɛde kũ ń wɛ́tãmmarinɔ dìtɛnɔnɛ ò pìńnɛ: À kɛ̀ dera ádi kúnku kɛ gbãra ke gĩa à kà lákũ ò a lɛ́ dìtɛárɛ nà yãroo?

¹⁵ Akũ Isaraila don'arɛdenɔ gɛ̀ɛ ò wiki lɛ̀ Firi'aunaa ò pì: À kɛ̀ dera ntɛn kɛ ókɔ̃nɔ n zɔ̀blerinɔnɛ lɛɛ?

¹⁶ Òtɛni sɛ̃̀buru kpáwá doro, akũ òtɛn pi ò kúnku kɛ. Òtɛni ó gbɛ̃, ama n gbɛ̃nɔ mɛ́ ò taari vĩ.

¹⁷ Akũ à pì: Ma'ãdenɔn á ũ. Lɛn á de lɛ! A yã mɛ́ à tò adìgɔ̃ pi áni gɛ́ sa o Dikiria.

¹⁸ À gɛ́ zĩ kɛ. Oni sɛ̃̀buru kpááwa doro, bee kũ abireo áni kúnku kɛ lákũ ò dàárɛ nà lɛ́a.

¹⁹ Kũ ò ò Isaraila don'arɛdenɔnɛ òsun gɔrɔ do kúnkubona lagoro, ò dɔ̃̀ kũ ò yã è sà.

²⁰ Kũ ò bò Firi'auna kĩnaa, ò dàkarɛ kũ Musao kũ Harunao, òtɛni ń dã,

²¹ akũ ò pìńnɛ: Dikiri á yã gwa à yãkpatɛ kɛ kãáo, zaakũ a tò Firi'auna kũ a gbɛ̃nɔn ye ó kãiro. A ó dɛna zɛ́ kpàḿman gwe.

²² Akũ Musa ɛ̀ra à gɛ̀ɛ à pì Dikirinɛ: Dikiri, bɔ́yãi n wari dɔ̀ gbɛ̃ pìnɔaa? Abire yãin n ma zĩ yá?

²³ Zaa gɔrɔ kũ ma gɛ ma yã ò Firi'aunanɛ kũ n tɔ́o, akũ àtɛn wari dɔ n gbɛ̃nɔa, akũ ńdi ń bo sɔ̃ro bi!

Následuj nás:

Sponzorované odkazy

Reklamy