Online Bible

BONAA 3 - Bisã Bible 2005

Luda Musa sisinaa

¹ Musa tɛni a anzure Midiã bùsu sa'ori pɔ́kãdenɔ dã à vĩ̀ gbárannala ari à kà kpi kũ òdi pi Orɛbu kĩnaa.

² Akũ Dikiri Malaikaa bò à sùa tɛ́vuraa gũn tariankpãn. Musa tariankpã pìi gwà à è tɛ́ kúa, ama àtɛn tɛ́ kũro.

³ Akũ à pì: Mani gɛ́ mà daboyã pì gwa de mà dɔ̃ pɔ́ kũ à tò tariankpã pì tɛn tɛ́ kũro.

⁴ Kũ Dikiri è à sù gwa, akũ à lɛ́ zùi zaa tariankpã pìi gũn à pì: Musa! Musa! Akũ à wèa à pì: Makũ di!

⁵ Luda pìnɛ: Ǹsun nairo. Ǹ n kyate bobo, zaakũ gu kũ ń zɛn kun adonamɛ.

⁶ Akũ à pì: Makũmɛ n dizinɔ Ibrahĩ kũ Isaakuo kũ Yakubuo Luda ũ. Akũ Musa pɔ́ kù a wɛ́a, kũ à wɛ́ kɛna pla kũ Ludao vĩna vĩ yãi.

⁷ Akũ Dikiri pì: Ma yã'ũmmana kũ ma gbɛ̃nɔ tɛn kɛ Misila è, ma wiki kũ ń wɛ́tãmmarinɔ tò òtɛn lɛ́ mà. Má ń wãwãkɛnaa dɔ̃̀.

⁸ Ma kipa mà ń sí Misilanɔa mà ń bɔtɛ bùsuu pìn mà gɛ́ kũńwo bùsu mana yàasan, gu kũ vĩ kũ zɔ́'io din, bùsu kũ Kanaanɔn kun kũ Itinɔ kũ Amɔrinɔ kũ Pɛrizinɔ kũ Ivinɔ kũ Yebusinɔo.

⁹ Isarailanɔ wikilɛna kà ma kĩnaa tera sà, ma wari kũ Misilanɔ tɛn dɔḿma è.

¹⁰ Ǹ gɛ́ tera sà, ma n zĩ Firi'aunaamɛ de ǹ ma gbɛ̃ Isarailanɔ bɔtɛ Misila.

¹¹ Akũ Musa pì Ludanɛ: Dín ma ũ kũ mani gɛ́ Firi'auna kĩnaa mà Isarailanɔ bɔtɛ Misilai?

¹² Luda pìnɛ: Manigɔ̃ kú kũnwo. Zĩna kũ ma n zĩ sèedaan dí. Tó n ń bɔ́tɛ Misila, áni donyĩ kɛmɛnɛ kpi dí pɔtɛa.

¹³ Akũ Musa pì Ludanɛ: Tó ma gɛ ma ò Isarailanɔnɛ ma pì, ń dizinɔ Luda mɛ́ à ma zĩḿma, tó ò ma la n tɔ́i sɔ̃ bi? Mani pińnɛ deramɛɛ?

¹⁴ Luda wèa à pì: Makũmɛ gbɛ̃ kũ má de a ũ ũ. Ǹ ońnɛ makũ mɛ́ ma n zĩḿma.

¹⁵ Luda pìnɛ dɔ: Ǹ o Isarailanɔnɛ makũ Dikiri ń dizinɔ Ibrahĩ kũ Isaakuo kũ Yakubuo Luda mɛ́ à n zĩḿma. Ma tɔ́n gwe gɔrɔ sĩnda pínki. Àgɔ̃ ma sísi lɛ ari á buria.

¹⁶ Ǹ gɛ́ ǹ Isaraila gbɛ̃ zɔ̃kɔ̃nɔ kakara ǹ ońnɛ makũ Dikiri ń dizinɔ Ibrahĩ kũ Isaakuo kũ Yakubuo Luda mɛ́ à bò à sùmma. Ǹ ońnɛ matɛni ń e ma yã kũ òtɛn kɛńnɛ Misila è.

¹⁷ Mani ń bɔtɛ Misila gu kũ òtɛn wɛ́ tãḿma pìn, mani gɛ́ kũńwo bùsu kũ Kanaanɔn kun kũ Itinɔ kũ Amɔrinɔ kũ Pɛrizinɔ kũ Ivinɔ kũ Yebusinɔo, gu kũ vĩ kũ zɔ́'io din.

¹⁸ Oni n yã ma. Mɔkɔ̃n kũ Isaraila gbɛ̃ zɔ̃kɔ̃nɔ à gɛ́ à Misila kína le à onɛ makũ Dikiri Eberunɔ Luda ma bo ma suáwa, ma pì à á gba zɛ́ à gɛ́ gɔrɔ aakɔ̃ kɛ gbárannan de à sa o makũ Dikiri á Ludaa.

¹⁹ Má dɔ̃ kũ Misila kína ni we à gɛ́ro, tó adi kɛ ma a dà tilasiro.

²⁰ Mani ɔ tɔ̃ Misilanɔa, mani daboyãnɔ kɛ mà wɛ́ tãoḿma, gbasa à á gbarɛ.

²¹ Mani tó Misilanɔ á wɛ́ gwa, de tó átɛn tá, áni tá ɔkoriro.

²² Á nɔgbɛ̃ sĩnda pínki andurufu ke wura nɔmanablebɔnɔ kũ pɔ́kasanɔ gbɛka a Misila nɔgbɛ̃ dakea kũ ń nɔgbɛ̃ kũ ò kú a bɛanɔ, à da á nɛ́gɔ̃gbɛ̃nɔnɛ kũ á nɛ́nɔgbɛ̃nɔ. Lɛn áni Misilanɔ pɔ́nɔ síḿma lɛ manamana.

« Předchozí

další »

Následuj nás:

Sponzorované odkazy

Reklamy