AYUBA 5 - Bisã Bible 2005

¹ Ǹ lɛ́ zú sà ǹ ma tó gbɛ̃ke ni wemma. Malaika kpaten ĩni arɛ dɔaa?

² Íbɛtɛsɛnaa dì yɔ̃nkɔ dɛ, nɛ̀sɛgɔ̃baa dì mìsaride kakatɛ.

³ Ma è yɔ̃nkɔ zĩni pɛ̀tɛ, akũ zĩni pìi yɔ̀ kãnto.

⁴ A nɛ́nɔ zã̀ kũ aafia kĩnaao, òdi ń yãnɔ mátɛmatɛńnɛ yãkpatɛkɛkia, gbɛ̃ke dì zɛ kũńworo.

⁵ Nàdɛrinɔ dì a burapɔnɔ ble, bee pɔ́ kũ à lɛ̀ɛ lìkainɔ, ímidɛrinɔ dì luka a aruzɛkɛi.

⁶ Kisira dì futɛ bùsunlo, wari dì butɛ zĩtɛro.

⁷ Lákũ tɛ́pũtãna gɛna musu sika vĩro nà, lɛn gbɛ̃ kũ ò ì pínki dì wari le lɛ.

⁸ Tó makũmɛ sɔ̃, Ludan mani gbɛka, mani ma yã kpátɛ a arɛ.

⁹ Àdi yã zɔ̃kɔ̃ kɛ kũ oni fɔ̃ ò a gbá dɔ̃ro, oni fɔ̃ ò a yãbonsarɛkɛnanɔ lɛ́ dɔ̃ro.

¹⁰ Àdi tó legũ ma zĩtɛ, àdi tó a í dagula sɛ̃̀ntɛ.

¹¹ Àdi gbɛ̃ busananɔ sɛ́ lei, àdi wɛ̃ndadenɔ da pɔnnan.

¹² Àdi yã kũ manafikidenɔ tɛn pɛ́a gboro, de ń ɔzĩ súngɔ̃ arubarika vĩro yãi.

¹³ Àdi ɔ̃ndɔ̃rinɔ kũ ń wɛ́zɛ̃ gũn, àdi tó yãlɛkpɛrɛ'orinɔ yãgɔ̃gɔ̃na kɛ pã.

¹⁴ Gu dì sira kũḿma fãnantɛ̃, òdi ɔ mátɛmatɛ fãnantɛ̃ lán gwãani bà.

¹⁵ Àdi takasidenɔ bo ga lɛ́i, àdi pɔ́saridenɔ bo gbãnamɔnnɛrinɔ ɔĩ.

¹⁶ A yã mɛ́ à tò gbãnasaridenɔn tãmaa vĩ, yãzɛdesaridenɔ dì yĩtɛ kyáu.

¹⁷ Arubarikaden gbɛ̃ kũ Luda dì a toto ũ. Tó àtɛni n sã gaga, ǹsun yãvunu káro.

¹⁸ Zaakũ àdi gbɛ̃ kĩnna akũ àdi a bɔ̀ gwa, àdi gbɛ̃ wíwi akũ àdi a werekɔ̃a.

¹⁹ Ani n bo yãn gɛ̃̀n suddo, bee tó à kà gɛ̃̀n suppla, kisira ni n lero.

²⁰ Ani n sí gaa nàgɔrɔ, ani n bo fɛ̃nɛda lɛ́i zĩ̀lan.

²¹ Dikiri ni n bo gbɛ̃yakarinɔ ɔĩ, tó yakanaa sù, vĩna ni n kũro.

²² Ĩni yakana kũ nàao yáa dɔ, ĩni vĩna kɛ nɔ̀bɔ pãsĩnɔnɛro.

²³ Zaakũ ĩnigɔ̃ kun aafia kũ gbɛ̀nɔ, ĩnigɔ̃ nna kũ nɔ̀bɔsɛ̃ntɛnɔ,

²⁴ ĩnigɔ̃ dɔ̃ kũ n ɔn nigɔ̃ nna, tó n gɛ n kpàsan, pɔ́ke ni kĩaro.

²⁵ Ĩnigɔ̃ dɔ̃ kũ n nɛ́nɔ ni kɛ dasi, n burinɔ ni dagula lán sɛ̃̀ɛ bà.

²⁶ Ĩni zĩ kũ yúkuyuku gbasa ǹ ga lán ése kũ à mà ò kɛ̃̀ a gɔrɔaa bà.

²⁷ Kũ o yã pìi asiri gbɛ̀ka, lɛn à de lɛ. Ǹ yã pì sí ńgɔ̃ dɔ̃ kũ n zĩda yãmɛ.