AYUBA 4 - Bisã Bible 2005

Ɛlifaza yãwena Ayubaa

¹ Akũ Temana gbɛ̃ Ɛlifaza yã wèa à pì:

² Asa tó gbɛ̃ yã ònnɛ, ĩni pɔ fɛ̃roo? Zaakũ mani fɔ̃ màgɔ̃ yĩtɛnaro.

³ Ǹ dɔn lákũ n lɛ́ dà gbɛ̃nɔa dasi nà, n gbɛ̃ kũ ń gbãna làkanɔ gbà swɛ̃̀ɛ.

⁴ N yã gbɛ̃ kũ òtɛn funɔ sɛ̀ lei, n gbɛ̃ kũ ò busananɔ gbà gbãna.

⁵ Kũ yã n le sà, akũ ntɛn fu, kũ à sùmma, n bídi kɛ̀.

⁶ N vĩnakɛna Ludanɛ dí n laakari kpátɛroo? N kunna taari sari dì tó ǹgɔ̃ tãmaa vĩroo?

⁷ Ǹ laasun lɛ́ ǹ gwa! Kisira taarisaride lè ziki ari à gà yá? Mán ò gbɛ̃ mananɔ kàkatɛn zikii?

⁸ Gbɛ̃ kũ à yã vãni bú wì à yãkete tɔ̃̀a, ma è abire mɛ́ àdi butɛnɛ.

⁹ Luda lɛ́'ĩa mɛ́ àdi a kakatɛ, a pɔ́ bona a yĩn mɛ́ àdi a dúgu zɔ̃.

¹⁰ A pũtãna kũ kòto gbãnao lán músuu bà dì láka, Luda dì a saka woronɛ.

¹¹ Àdi ga lán músu kũ à nɔ̀bɔɔ wɛ̀tɛ à kùraii bà, a nɛ́nɔ ni gbasa ò fãkɔ̃a.

¹² Yã sùma kpãni asiri gũn, a ĩa gɛ̃̀ ma sãn.

¹³ Gɔrɔ kũ matɛn nana bɛ̃̀nɛ o gwãani, gɔrɔ kũ gbɛ̃nɔ i ò ò kà zã̀,

¹⁴ vĩna ma kũ matɛn lukaluka, ma mɛ̀gu sĩnda pínki tɛn luka.

¹⁵ Ĩa ke buri ma pa ma ãnnwa, ma mɛ̀kãsɛsɛɛ fùtɛ à zɛ̀.

¹⁶ Kũ à zɛ̀, mádi a taka dɔ̃ro, pɔ́ pì kú ma arɛ, akũ ma a kòto kpãni mà à pì,

¹⁷ bisãsiri ni fɔ̃ àgɔ̃ de yãnnade ũ Ludanɛ yá? Gbɛ̃ ni fɔ̃ àgɔ̃ zɛ̃na a Kɛ̀ri arɛ yá?

¹⁸ Zaakũ Luda dì a malaikanɔ náani kɛro, akũsɔ̃ àdi a zĩkɛrii pìnɔ taari le,

¹⁹ ókɔ̃nɔ kũ ó mɛ̀ de lán ɛ̃ kpɛ́ bà, ó kasana de bùsu kori ũ akũsɔ̃ òdi ó dúgu zɔ̃ lán dã̀mboroo bà, oni ó pɔ́ o dɔ yá?

²⁰ Zaa kɔnkɔ ari ɔkɔsi gbɛ̃nɔ dì gaga, òdi kakatɛ ari gɔrɔ sĩnda pínki, òdi ń tàasi káro.

²¹ Luda dì ń kuta lí gborońnɛ, akũ òdi ga ɔ̃ndɔ̃ sari.