Online Bible

AYUBA 3 - Bisã Bible 2005

Ayuba a igɔrɔ gyabonaa

¹ Abire gbɛra Ayuba lɛ́ wɛ̃̀ à yã vãni ò a igɔrɔ musu

² à pì:

³ Luda ma igɔrɔ kɛ pã atɛ̃nsa gwãani kũ ò ma nɔ̀ɔ sìi pìi.

⁴ Gɔrɔ pì li gusira ũ, zaa musu Luda sún a yã daro, àsun tó gu puaro.

⁵ Gusira kũ níkiniki gɔrɔ pìia, ludambɛ sira kútɛa, gusira bìtim daala.

⁶ Gwãani pì sɔ̃ à sira kũ níkiniki, òsun a da wɛ̃̀ gɔrɔnɔ tɛ́ doro, òsun a naro mɔ gɔrɔnɔ gũnlo.

⁷ Gwãani pì kɛ gwãani fĩni ũ, ayuwii súngɔ̃ dɔ gɔrɔ kũ̀aro.

⁸ Pɔ́dammari kũ òdi tó ifãntɛ̃ gu puronɔ láari kɛ gɔrɔ pìia, gbɛ̃ kũ ò dɔ̃ lákũ òdi ɔ ká kwãsaaii pìnɔ.

⁹ A gudɔnao susunɛnɔ sira kũ, oni a gudɔna dã pã, gu ni kɛ̃ro.

¹⁰ Zaakũ gɔrɔ pì dí ma da nɛ́'isɔ zɛ́ tatamalɛro, à tò ma wɛ́ wari è.

¹¹ À kɛ̀ dera òdi ma i gɛ̀ ũroo? Bɔ́yãi mádi bo gbɛrɛn ma ɛra gɔ̃̀nɔroo?

¹² À kɛ̀ dera ò ma kpa gbálaa? Bɔ́yãin ò yɔ̃ kpàma ma mìi?

¹³ Tó ma ga yã, de ma gɔ̃ kítikiti, de ma i ò ma kámma bò

¹⁴ kũ kínanɔ kũ andunia gũn lɛ́dammari kũ ò kínabɛ zĩnɔ kɛ̀kɛ ò bò ń zĩdanɛnɔ,

¹⁵ kínɛ kũ ò wuraa kàkarańyĩnɔ akũsɔ̃ ò andurufuu kà ń kpɛ́n à pà.

¹⁶ À mana yã ò ma vĩ lán nɔ̀bɔtɛnɛ bà, lán nɛ́ kũ à sù gɛ̀ ũ adi andunia ero bà.

¹⁷ Gwen yãvãnikɛrinɔ dì ń vãnikɛna tón akũsɔ̃ gbɛ̃ busananɔ dì kámma bon.

¹⁸ Zĩ̀zɔnɔ dì ĩampaki le gwe, òdi ń wɛ́tãmmarinɔ kòto ma doro.

¹⁹ Gbãnadenɔ kũ talakanɔn kú gwe ń pínki, akũsɔ̃ zɔ̀ɔ dìgɔ̃ de a dikiri pɔ́ ũ gwe doro.

²⁰ Bɔ́yãi Luda dì gu pu wɛ̃ndadenɔnɛɛ? À kɛ̀ dera àdi wɛ̃̀ndi kpá gbɛ̃ kũ ń pɔ siranɔaa?

²¹ Ń wɛ́ dìgɔ̃ dɔ gai òdi lero, òdi kpátɛ kɛi de aruzɛkɛ kũ à utɛnala.

²² Tó ò gà ò ń vĩ, òdi pɔnna kɛ, ń nɛ̀sɛɛ dì kɛ nna.

²³ Luda ń zia yã ùtɛńnɛ, à karaa lìkańyĩ kpa sĩnda pínkia.

²⁴ Wesakakara à bona mɛ́ à gɔ̃̀ ma pɔ́ble ũ, ma ndanaa dì lákaro.

²⁵ Yã kũ ma vĩna kɛ̀nɛɛ pì mɛ́ à ma le, yã kũ ma kã gìi pì mɛ́ à sùma.

²⁶ Má ĩampana vĩro, ma laakari kpátɛnaro. Má kámmabona vĩro, ma wari dì lákaro.

Následuj nás:

Sponzorované odkazy

Reklamy