AYUBA 14 - Bisã Bible 2005

Ayuba yã'ona Ludanɛ

¹ Bisãsiri dì bo nɔgbɛ̃ kĩnaamɛ, a wɛ̃̀ndii kusu, àdigɔ̃ kun yãkete sariro.

² Àdi pia lán lávu bà àdi kori kɛ, àdi gɛ̃tɛ lán uraa bà àdi gì kɛro.

³ Gbɛ̃ dí takan ĩni wɛ́ dɔa ǹ yãkpatɛ kɛ kãao yá?

⁴ Pɔ́ gbãsĩ ni fɔ̃ à pɔ́ gbãsĩsari i yá? Ani sí kɛro.

⁵ N bisãsiri gɔrɔ dìtɛnɛ, a mɔ lɛ́ kú n ɔĩ, n a wɛ̃̀ lɛ́ dànɛ, ani fɔ̃ à vĩalaro.

⁶ Ǹ wɛ́ goa ǹ a tó gwe ari a gɔrɔ lɛ́ papa lán zamalingakɛrii bà.

⁷ Lí dìgɔ̃ tãmaa vĩmɛ, zaakũ tó ò zɔ̃̀, àdi ɛra à bɔ̀tɔ pá, akũsɔ̃ a bɔ̀tɔ dufu pìi dì furo.

⁸ Bee tó a zĩni zĩ kũ̀ zĩtɛ gũn, akũsɔ̃ a mukutu gà bùsun,

⁹ tó à í gbĩ mà, ani bɔ̀tɔ pá, ani gã̀ bo lán lí kũ ò pɛ̀ɛ bà.

¹⁰ Tó gbɛ̃ gà sɔ̃, àdigɔ̃ wutɛna sɔ̀rɔrɔ, àdi tá àdigɔ̃ kun doro.

¹¹ Lákũ sɛ̀bɛ'i dì lago nà, akũsɔ̃ swa'i dì baba à láka,

¹² lɛn bisãsiri dì wútɛ lɛ àdi futɛ doro, ari ludambɛ gɛ́ gɛ̃tɛo, ani vuro, ani vu kũ i pìioro.

¹³ Tó ĩni ma utɛ gyãwãnn ǹ ɔ kúma ari n pɔ gòma dé! Tó ĩni gɔrɔ lɛ́ ditɛmɛnɛ gwe gbasa ǹ dɔ ma yãn dé!

¹⁴ Tó gbɛ̃ gà, ani ɛra àgɔ̃ kun yá? Tó lɛmɛ, manigɔ̃ wɛ́ dɔ ma vunaai ma ɔsikanaa gũn gɔrɔ sĩnda pínki.

¹⁵ Ĩni lɛ́ zumai mani wemma, ĩni makũ kũ má de n ɔzĩ ũ bɛgɛ kɛ.

¹⁶ Gɔrɔ birea n wɛ́ nigɔ̃ tɛ́ ma yãkɛnanɔi, ama ĩni ma durunna yã da doro.

¹⁷ Ĩni ma taarinɔ ká bɔ̀kɔn ǹ yĩ ǹ ditɛ, ĩni lá kú ma yãvãnikɛnaa pìnɔa.

¹⁸ Lákũ kpi dì gboro à fãkɔ̃a nà, akũsɔ̃ sĩ̀sĩ musu gbɛ̀ gbɛ̃̀ntɛ̃ɛ dì sɔ̃sɔ̃,

¹⁹ lákũ swa'i dì gbɛ̀ lɔ́lɔ nà, akũsɔ̃ í dì bùsu sɛ́tɛ à táo, lɛn ndì bisãsiri tãmaa nɛnɛ lɛ.

²⁰ Ndì gbãna mɔnɛ à tá, àdi su doro, ndì tó a ãn litɛ à andunia tó.

²¹ Tó a nɛ́nɔ gɔ̃̀ gbɛ̃ bɛ̀ɛrɛdenɔ ũ, ani dɔ̃ro, tó ò kɛ̀ gbɛ̃ fítinɔ ũmɛ sɔ̃, ani ero.

²² Wãwãn anigɔ̃ ma ado, a zĩda pɔsiran àdigɔ̃ kɛ.