2 TIMƆTI 4 - Bisã Bible 2005

¹ Ma nannɛ Ludai kũ Kirisi Yesu kũ ani ɛra à su à kpata ble à yãkpatɛ kɛ kũ gbɛ̃ bɛ̃nɛnɔ kũ gyãwãndenɔo,

² ǹ Luda yã waazi kɛ. À zɛ́ kɛ̀ kesɔ̃ adi kɛro, ǹgɔ̃ kúo. Ǹ yã ditɛńnɛ, ǹ kpãkɛ̃ńyĩ, ǹ lɛ́ daḿma, ǹ yã dańnɛ kũ mɛna zɔ̃kɔ̃ɔo.

³ Zaakũ gɔrɔke ni su kũ gbɛ̃nɔ ni we ò sã kpá Luda yãzɛdedannɛnaairo. Oni yãdannɛrinɔ kakarańyĩ ń zĩda pɔyeinaaamɛ, de ò yã kũ à kàńgu dańnɛ.

⁴ Oni ń kɔ̀kɔtɔ zu yãpuranɛ ò arɛ dɔ garanɔa.

⁵ Mɔkɔ̃n sɔ̃, ǹgɔ̃ laakari vĩ yã sĩnda pínki musu. Ǹ wari fɔ̃, ǹ baarunnakpari kɛna kɛ, ǹ n zĩ lɛ́ papa.

Pɔlu kunna ga lɛ́i zaa Romu

⁶ Ma gɔrɔ pàpa kɔ̀, oni ma aru kɔ́tɛ sa'o'i ũ tera.

⁷ Ma ɔsi mana kà, ma bàa lɛ̀ ma bɔtɛ. Má Yesu yã kũna ma a lɛ́ pàpa.

⁸ Kunna mana fùra ditɛna, àtɛni ma dã sà. Dikiri yãkpatɛkɛri mana mɛ́ ani kúmɛnɛ yãkpatɛkɛgɔrɔ zĩ. Adi kɛ makũmɛ ma adoro, kũ gbɛ̃ kũ ò ye a sunaainɔ ń pínkimɛ.

⁹ Ǹ zɛ́ wɛtɛ ǹ su ma kĩnaa likalika.

¹⁰ Demasi ma ton à tà Tɛsalonika, kũ à ye anduniai yãi. Kɛrɛsɛnsi tà Galatia bùsun, akũsɔ̃ Titu tà Dalamatia bùsun.

¹¹ Luku mɛ́ à gɔ̃̀ kũmao ado. Ǹ Maaku sɛ́ à mɔ́ lɛɛlɛ, zaakũ àdi kpámai zĩ gũn manamana.

¹² Ma Tikiku gbàrɛ Ɛfesu.

¹³ Tó ntɛn su, ǹ ma utagyaba kũ ma tò Kaapu bɛa zaa Toroasi sɛ́ ǹ suomɛnɛ kũ ma takadanɔ, atɛ̃nsa a kũ ò kɛ̀ kũ báraonɔ.

¹⁴ Alɛsanda sia yã vãni kɛ̀mɛnɛ manamana. Dikiri ni yã kũ à kɛ̀ɛ pì fĩna bonɛ.

¹⁵ Ǹ laakari kɛi, zaakũ à bò ó yã kpɛ pãsĩpãsĩ.

¹⁶ Yãkpatɛkɛna kũmao káaku gũn gbɛ̃ke dí zɛ kũmaoro, ò ma ton ń pínki. Luda sún ń yã pì daro.

¹⁷ Dikiri zɛ̀ kũmao à ma gba gbãna, akũ ma zɛ́ lè ma waazi kɛ̀ ma a lɛ́ pàpa, buri pãndenɔ mà ń pínki. À ma bo músu lɛ́i.

¹⁸ Dikiri ni ma bo yã vãni gũn pínki, ani ma sura ba ari mà gɛ́ káo a kpatan musu. Àkũ mɛ́ à gakuri vĩ gɔrɔ sĩnda pínki, aami.

Lɛ́zammanaa

¹⁹ Ǹ fɔ kpá Pirisila kũ Akilaooa kũ Ɔnɛsifɔru bedenɔ.

²⁰ Erasatu gɔ̃̀ Kɔrinti. Ma Torofimu tò kũ gyão Milɛtu.

²¹ Ǹ zɛ́ wɛtɛ ǹ su ari bunsirɛ gɔ̃ ká. Yubulu kũ Pudɛnio kũ Linuo kũ Kalaudiao kũ ó gbɛ̃nɔ pínki fɔ kpàmma.

²² Dikiri gɔ̃ kú kũnwo. À gbɛ̃kɛ kɛárɛ.