2 TIMƆTI 3 - Bisã Bible 2005

Bisãsirinɔ yãkɛna gɔrɔ kpɛdenɔa

¹ Ǹgɔ̃ dɔ̃ kũ gɔrɔ kpɛdenɔ nigɔ̃ pãsĩ.

² Gbɛ̃nɔ zĩda yã ni dońnɛ arɛ, ɔgɔ ni ń swɛ̃̀ ble. Onigɔ̃ de karambaanidenɔ ũ, zĩdabirinɔ, gbɛ̃sɔ̃sɔ̃rinɔ, de kũ dao yãdarisarinɔ, guturunɔ, ludayãdarisarinɔ,

³ gbɛ̃yãkɛrisaridenɔ, sùrusaridenɔ, gbɛ̃yakarinɔ, fayasaridenɔ, aniapãsĩdenɔ, yã mana ibɛrɛnɔ,

⁴ bonkpɛdenɔ, laasunsaridenɔ, yɔ̃̀gɔ̃denɔ. Onigɔ̃ ye pɔnnakɛnaai de Luda yãla.

⁵ Òdi donyĩ kɛ, ama ò ye a gbãnairo. Ǹ kɛ zã̀ kũ gbɛ̃ bire takanɔ.

⁶ Ń gbɛ̃kenɔ dì gɛ̃ nɔgbɛ̃ kũ òdi mì gbãkɛnnɛronɔi, ò ń fu kũ lɛ́o. Durunna sàa dà nɔgbɛ̃ pìnɔn, dà vãni mɛ́ à gɔ̃̀ńnɛ,

⁷ òdigɔ̃ yã dada gɔrɔ sĩnda pínki, ama òdi fu yãpura kũnaa.

⁸ Lákũ Yanɛ kũ Yambɛrɛsio bò Musa kpɛ nà, lɛn gbɛ̃ pìnɔ dì bo yãpura kpɛ lɛ. Ń laasun lɛ́kpɛrɛmɛ, ó donyĩzɛ gũn pɔ́ ginyĩnanɔmɛ.

⁹ Ò gɛna arɛ vĩ doro, zaakũ gbɛ̃ sĩnda pínki ń yɔ̃nkɔkɛ dɔ̃, lákũ ò Yanɛ kũ Yambɛrɛsio pɔ́ dɔ̃̀ nà.

Luda yã àree

¹⁰ Mɔkɔ̃n sɔ̃, ń tɛ́mai. Ń ma kunna dɔ̃ kũ ma yãdannɛnaao kũ yã kũ matɛn pɛ́aao kũ ma ludanaanikɛnaao kũ ma mɛnakɛo kũ ma yenyĩo kũ ma zɛna gbãnao

¹¹ kũ wɛ́ kũ ò tã̀mao kũ wari kũ ma kɛ̀ɛo. Ń yã kũ à ma le Antiɔku kũ Ikɔniuo kũ Lisitirao dɔ̃ kũ wɛ́tãmmana zɔ̃kɔ̃ kũ ma fɔ̃̀ɔo. Ama Dikiri ma bo a sĩnda pínki gũn.

¹² Gbɛ̃ kũ ò ye ògɔ̃ kun ludayãmarinɔ ũ Kirisi Yesu gũnnɔ ni wɛ́tãmmana le.

¹³ Gbɛ̃ vãninɔ kũ manafikidenɔ vãnikɛna nigɔ̃ karamɛ. Oni gbɛ̃nɔ sãtɛ, mɔ́kɔ̃nɔ se onigɔ̃ sãtɛna.

¹⁴ Mɔkɔ̃n sɔ̃, ǹ zɛ kũ yã kũ n dàda n sì yãpura ũo. Ń gbɛ̃ kũ ò dàdannɛnɔ dɔ̃,

¹⁵ zaakũ ń Luda yã dɔ̃ zaa n nɛ́fitikɛgɔrɔa. Ani fɔ̃ à n gba ɔ̃ndɔ̃ à n ká Kirisi Yesu náanikɛna kũ àdi ń sura baa.

¹⁶ Yã kũ à kú Luda yãn bò Luda kĩnaa pínkimɛ. À àre vĩ, zaakũ àdi yãpura dańnɛ, àdi ń ɛ́kɛ káńnɛ ń ɔĩ, àdi ń gba laakarii, àdi lɛ́ daḿma yãkɛna a zɛ́aa gũn,

¹⁷ de Luda gbɛ̃ sorukɛna ma yãmanakɛna sĩnda pínki zɛ́ gũn.