Online Bible

1 TIMƆTI 6 - Bisã Bible 2005

¹ Gbɛ̃ kũ ò de zɔ̀ ũnɔ ń dikirinɔ ditɛ gbɛ̃ bɛ̀ɛrɛdenɔ ũ ò mì natɛńnɛ a sĩnda pínki gũn, de òsun Luda tɔ́ kũ yã kũ odì dańnɛo vãni boro yãi.

² Gbɛ̃ kũ ń dikirinɔ de Yesu náanikɛri ũnɔ sún dɔkɛ kũńwo kũ ò de kɔ̃ gbɛ̃nɔ ũ yãiro. Ò zɔ̀ bleńnɛ manamana, zaakũ gbɛ̃ kũ òtɛni ń zĩ àre blenɔ bi Yesu náanikɛrinɔmɛ, ń gbɛ̃ yenyĩdenɔmɛ. Ǹ yã pìnɔ dańnɛ, ǹ lɛ́ daoḿma.

Yena ɔgɔi

³ Tó gbɛ̃ke tɛn yã pãnde dańnɛ, akũsɔ̃ adi zɛ kũ ó Dikiri Yesu Kirisi yãzɛdeo kũ ó zɛ́ yãdannɛnaaoro,

⁴ ĩadãriimɛ, à yãke dɔ̃ro, lɛ́kpakɔ̃ana kori kũ yãgwana lakanasario a kũ̀ gyã ũ. Yã birenɔ dì tó gbɛ̃nɔ nɛ̀sɛgɔ̃ba kpá, ò fìti kɛ, ò kɔ̃ sɔ̃sɔ̃, ò laasun vãni lɛ́ kũ kɔ̃o,

⁵ ògɔ̃ ĩni kũ kɔ̃o. Gbɛ̃ pìnɔ laasun kotina, yãpura ń kɛ̃, òdigɔ̃ da donyĩkɛna bi ɔgɔwɛtɛzɛmɛ.

⁶ Donyĩkɛnaa àre zɔ̃kɔ̃ yãpura, tó gbɛ̃ zɛ̀ kũ pɔ́ kũ à vĩo.

⁷ Zaakũ ódi su kũ pɔ́keo andunia gũn laro, óni tá kũ pɔ́keo sɔ̃ro.

⁸ Tó ó pɔ́ble kũ pɔ́kasanɔo vĩ, abirekũ mɔ̀ lɛ.

⁹ Gbɛ̃ kũ ò ye ò gɔ̃ aruzɛkɛde ũnɔ dì ń zĩda da yɔ̃ogwana tankutɛn. Pɔ́nidɛna mìsari karii dì gɛ̃ńgu à ń kpá kisira kũ kakatɛnaaooi.

¹⁰ Yena ɔgɔi mɛ́ à de yã vãni sĩnda pínki zĩni ũ. Gbɛ̃kenɔ a kɔ̃dɛ kɛ̀ ari ò kɛ̃̀ ó donyĩzɛa ò wãwã zɔ̃kɔ̃ɔ kpà ń zĩdai.

Ǹ ɔsi mana ká

¹¹ Zaakũ Luda gbɛ̃mɛ n ũ, ǹ bàa sí yã pìnɔnɛ, ǹ tó yã mana gɔ̃ donnɛ arɛ kũ yãkɛna a zɛ́aao kũ ludanaanikɛnaao kũ yenyĩo kũ mɛnao kũ busɛkɛnaao.

¹² Ǹ ó donyĩzɛ ɔsi mana ká, ǹ wɛ̃̀ndi kũ àdi lákaro sí, zaakũ abirekũn Luda n sisia gɔrɔ kũ n lɛ́ mana sɛ̀nɛ pari wára.

¹³ Ma nannɛ Luda kũ àdi wɛ̃̀ndi kpá pɔ́ sĩnda pínkiaai kũ Kirisi Yesu kũ à yã mana ò Pɔntiu Pilatinɛɛo,

¹⁴ ǹgɔ̃ yã kũ ò dìtɛnnɛ kũna gbãsĩ sari taari sari ari ó Dikiri Yesu Kirisi sugɔrɔ zĩ.

¹⁵ Gbãnade mɛ̀n do Arubarikade, kínanɔ Kína, dikirinɔ Dikiri mɛ́ ani Kirisi pì bo gupuraa a gɔrɔa.

¹⁶ Àkũ mɛ́ àdi garo ado, àdigɔ̃ kú gupura kũ òdi fɔ̃ ò nairo gũn. Gbɛ̃ke dí wɛ́ sialɛro, oni fɔ̃ sero. Àkũ mɛ́ à gakuri kũ gbãnao vĩ gɔrɔ sĩnda pínki, aami.

¹⁷ Ǹ o andunia tera díkĩna aruzɛkɛdenɔnɛ, òsun ĩa dãro. Òsun gbãna le ɔgɔda náanisariaro, ò gbãna le Luda kũ àdi pɔ́ sĩnda pínki kpáwá zɔ̃kɔ̃ ò pɔnna kɛooa.

¹⁸ Ǹ ońnɛ ò a mana kɛ, ò nna kɛńnɛ, ò ɔ porońnɛ, ògɔ̃ gbɛ̃kɛ vĩ.

¹⁹ Lán abirekũ bà oni zàna mana di ń zĩdanɛ aruzenna pɔ́ ũ, oni wɛ̃̀ndi kũ à de wɛ̃̀ndi ũ yãpura le.

²⁰ Timɔti, ǹ yã kũ Luda nànnɛ n ɔĩ kũ gbãna. Ǹ mì kɛ̃ ludayãdanasari yã pãpã onaaa kũ yãlɛkpɛrɛ'ona kũ òdi pi dɔ̃naao.

²¹ Gbɛ̃kenɔ zɛ̀o, akũ ò pã̀ ó donyĩzɛnɛ. Luda gbɛ̃kɛ kɛárɛ.

« Předchozí

další »

Následuj nás:

Sponzorované odkazy

Reklamy