Online Bible

1 TIMƆTI 5 - Bisã Bible 2005

Gyaanɔnɔ kũ don'arɛdenɔ yã

¹ Ǹsun kpãkɛ̃ mare zɔ̃kɔ̃ɔiro. Ǹ lɛ́ daa lán n de bà. Ǹ lɛ́ da kɛfɛnnanɔa lán n vĩ̀ni kũ n dakũnanɔ bà.

² Ǹ lɛ́ da nɔgbɛ̃ zɔ̃kɔ̃ɔa lán n da bà, ǹ lɛ́ da nɔ gbãnaa lán n dãre bà kũ nɛ̀sɛpurao.

³ Ǹ kpá gyaanɔ kũ ò gbɛ̃ke vĩronɔi.

⁴ Tó gyaanɔ nɛ́nɔ vĩ ke daikorenɔ, ò ń danɛnɔ gwanaa dada gĩa ń donyĩkɛnaa gũn, ò fĩna bo ń denɔnɛ kũ ń danɔ, zaakũ abirekũ dì ká Ludagu.

⁵ Gyaanɔ kũ à gbɛ̃ke vĩro wɛ́ dɔ Ludai, àgɔ̃ adua kɛ àgɔ̃ kpányĩ gbɛkaa gwãani kũ fãnantɛ̃o.

⁶ Gyaanɔ kũ a zĩda pɔyeinaa dì donɛ arɛ bi gɛ̀ɛmɛ, bee tó à bɛ̃nɛ.

⁷ Ǹ yã pìnɔ dańnɛ de gbɛ̃ke sún ń taari ero.

⁸ Tó gbɛ̃ tɛni a danɛnɔ gwaro, atɛ̃nsa a ɔndenɔ, à bò Luda yã kpɛmɛ, Yesusaride deala.

⁹ Nɔgbɛ̃ kũ à de ò da gyaanɔnɔ tɛ́n di: Nɔgbɛ̃ kũ à kà wɛ̃̀ baaakɔ̃, akũsɔ̃ à zã kɛ̀ gɛ̃̀n do,

¹⁰ ò a dɔ̃ yãmanakɛri ũ, nɛ́gwari mana ũ, nibɔkũri Luda gbɛ̃nɔ gbá pìpiri ũ, takaside kpanyĩri ũ, nɔgbɛ̃ kũ à mɛ̀ɛ kpà yãmanakɛna pínkia ũ.

¹¹ Ǹsun gyaanɔ nɔ gbãnanɔ danlo, zaakũ tó ń gɔ̃ nidɛnaa fùtɛ, ń nana Kirisia ni busamɛ, onigɔ̃ ye ò zã kɛ,

¹² ò ń zĩda da yãn, kũ ò lɛ́ kũ ò sɛ̀nɛ yã gbòro yãi.

¹³ Abire gbɛra òdi ma'ã dada, òdigɔ̃ gɛ̃gɛ̃ ɔn kũ ɔnnwo. Adi kɛ ma'ãdenɔmɛ ń ũ adoro, òdi gɔ̃ gbɛ̃piri gudɛrinɔ ũmɛ dɔ, òdi yã kũ à de ò oro o.

¹⁴ Abire yãi má ye gyaanɔ nɔ gbãnanɔ zã kɛ, ò nɛ́ i ò laakari dɔ bɛa, de òsun ó ibɛrɛnɔ gba zɛ́ ò ó tɔ́ vãni síro yãi.

¹⁵ Ń gbɛ̃kenɔ bò ò tɛ̀ Setanyĩ kɔ̀.

¹⁶ Tó Yesude nɔgbɛ̃ ke gyaanɔnɔ vĩ a bɛa, àgɔ̃ kpáńyĩ. Àsun tó ò gɔ̃ sɔsinɛ aso ũro, de ò le ò kpá gyaanɔ kũ ò gbɛ̃ke vĩronɔi yãi.

¹⁷ Gbɛ̃ zɔ̃kɔ̃ kũ àdi dońnɛ arɛ a zɛ́aa kà ò fĩna bonɛ lɛu pla, atɛ̃nsa gbɛ̃ kũ à waazikɛna kũ yãdannɛnaao kokari vĩ.

¹⁸ Luda yã pì: Àsun lɛ́sɔ da zù kũ àtɛn pɔ́ gbɛ̃nɛro. À pì dɔ: Zĩkɛrii kà à a làada le.

¹⁹ Ǹsun gbɛ̃ kũ à sù kũ gbɛ̃ zɔ̃kɔ̃ káarao yã síro, séto sèedadenɔ kà gbɛ̃nɔn pla ke aakɔ̃ baasiro.

²⁰ Ǹ kpãkɛ̃ gbɛ̃ kũ ò durunna kɛ̀nɔi gbɛ̃ sĩnda pínki wára, de vĩna le à gbɛ̃ kparanɔ kũ.

²¹ Ma nannɛ Luda kũ Kirisi Yesuooi kũ malaika kũ à ń sɛ́nɔ, ǹgɔ̃ yã pìnɔ kũna, ǹsun gbɛ̃ke tɛ̃̀ boro. Ǹsun yãke kɛ gbɛ̃kenɛ úblembɛ yãiro.

²² Ǹsun wã ǹ ɔ na gbɛ̃a ǹ a da Luda zĩnlo. Ǹsun tó n ɔ gɔ̃ kú gbɛ̃ke durunna gũnlo. Ǹgɔ̃ n zĩda kũna gbãsĩ sari.

²³ Ǹsun í pã mi atɛ̃nɛro. Ǹgɔ̃ sèwɛ̃ gá fíti n nɛ̀sɛ yãi kũ n gyãkɛna gɛ̃̀n baaakɔ̃o.

²⁴ Gbɛ̃kenɔ durunna dì bo gupuraa ari ògɔ̃ gɛ́ a yã gɔ̃gɔ̃ kũńwo, gbɛ̃kenɔ sɔ̃ ń pɔ́ dì bo likalikaro.

²⁵ Lɛmɛ dɔ yãmanakɛnaa dì bo gupuraa, bee a kũ odi ero ni le à gɔ̃ utɛnaro.

« Předchozí

další »

Následuj nás:

Sponzorované odkazy

Reklamy