1 SAMUƐLI 6 - Bisã Bible 2005

Ɛrana kũ àkpatiio Isarailanɔ bùsun

¹ Dikiri àkpati kú Filisitininɔ bùsun ari mɔ suppla,

² akũ ò sa'orinɔ kũ màsokɛrinɔ kàkara ò ń lá ò pì: Deran óni kɛ nà kũ Dikiri àkpatiioo? À owɛrɛ lákũ óni kɛ nà ò táo a gbɛ̀n.

³ Akũ ò wèḿma ò pì: Tó átɛn tá kũ Isarailanɔ tãna àkpatiio, àsun táo koriro. À a gba pɔ́ á taari yãi, áni aafia le, áni yã kũ à tò adi ɔ goáwaro dɔ̃.

⁴ Akũ ò ń lá ò pì: Bɔ́n óni a gba ò táo ó taari yãii? Ò wèḿma ò pì: À wura pi lán gbɛ̀nna bà mɛ̀n sɔɔro kũ ɛ̃nɛnɔ dɔ mɛ̀n sɔɔro á kínanɔ dasi lɛ́n, zaakũ gyã dokɔ̃nɔ pì á lé kũ á kínanɔ á pínki.

⁵ À á gbɛ̀nnanɔ taka pi kũ ɛ̃nɛ kũ òtɛni ó bùsu yaka takanɔ, à Isarailanɔ tãna kpe tao. Ke ani ɔ gowá kũ ó tãnanɔ kũ ó bùsuuo gwɛɛ?

⁶ Bɔ́yãi á ye à sãgbãna kɛ lákũ Misilanɔ kũ Firi'aunao kɛ̀ nàa? Kũ à ń wɛ́ tã̀ ari ò Isarailanɔ gbàrɛ ò tà, a yã dí dɔáguroo?

⁷ Tera sà à gɛ́ à zùgo dufu kɛ, à su kũ zù nɛ́rande mɛ̀n pla kũ òdi gbãngo dańnɛ yãronɔ. À gó pì dɔḿma, à ń nɛ́ kũ ò tɛ́ńyĩnɔ kɛ̃ḿma à tá kũńwo ń karaa gũn.

⁸ À Dikiri àkpati sɛ́ à da gó pìi gũn, à wura pɔ́ kũ átɛn kpãzã á taari yãinɔ ká batan à ditɛ àkpatii pìi sarɛ, à zùnɔ ká zɛ́n ò gɛ́o

⁹ àgɔ̃ gwa. Tó àkpatii pì a bùsu zɛ́ sɛ̀ àtɛn gɛ́ Bɛsɛmɛsi kpa, àkũ mɛ́ à kisira zɔ̃kɔ̃ɔ pìi zĩ̀wá. Tó adi sɛ́tɛ gwe sɔ̃ro, ónigɔ̃ dɔ̃ kũ àkũ mɛ́ à ɔ tɔ̃̀wáro, yã mɛ́ à sù lɛ.

¹⁰ Akũ ò kɛ̀ lɛ, ò gó dɔ̀ zù nɛ́rande mɛ̀n planɔa ò ń nɛ́nɔ kà kara gũn,

¹¹ akũ ò Dikiri àkpatii dà gó pìi gũn kũ bata kũ wura ɛ̃nɛnɔ kũ gbɛ̀nna takanɔn kú a gũnwo.

¹² Akũ zùu pìnɔ zɛ́ sɛ̀ súsu ò arɛ dɔ Bɛsɛmɛsi zɛ́a, òtɛn gɛ́ òtɛn ɔ́ɔ dɔ, odi litɛ ɔplai ke ɔzɛiro. Filisitini kínanɔ tɛ́ ń kpɛ ari Bɛsɛmɛsi bùsu lɛ́n.

¹³ Bɛsɛmɛsidenɔ tɛn pɔ́wɛ kɛkɛ guvutɛn. Kũ ò wɛ́ sɛ̀ musu, ò àkpatii pìi è, akũ ń pɔ kɛ̀ nna kũ a enaao.

^14-15 Kũ gó pìi kà Bɛsɛmɛsi gbɛ̃ Yɔsua búgbɛɛa, akũ à zɛ̀ gbɛ̀ gbɛ̃̀ntɛ̃ɛ sarɛ gwe. Akũ Levinɔ Dikiri àkpatii pìi bò kũ bata kũ wura pɔ́nɔn kú a gũnwo, ò kàtɛ gbɛ̀ gbɛ̃̀ntɛ̃ɛ pìia. Akũ Bɛsɛmɛsidenɔ gó pì lí zɔ̃̀zɔ̃kɔ̃rɛ yàka ũ, ò sa'opɔ kũ òdi ká tɛ́n à tɛ́ kũ ò Dikiria kũ zùu pìnɔ. Zĩ pìia ò sa'opɔ kũ òdi ká tɛ́n à tɛ́ kũnɔ ò Dikiria kũ sa'opɔ pãndenɔ.

¹⁶ Filisitini kína gbɛ̃nɔn sɔɔronɔ yã pìi è, akũ ò ɛ̀ra ò tà Ɛkɛrɔnu zĩ pìia.

¹⁷ Wura gbɛ̀nna kũ Filisitininɔ kpã̀zã Dikirinɛ ń taari yãinɔn dí: Asadɔdi pɔ́ do, Gaza pɔ́ do, Asakɛlɔni pɔ́ do, Gata pɔ́ do, Ɛkɛrɔnu pɔ́ do.

¹⁸ Wura ɛ̃nɛnɔ kun dɔ Filisitini wɛ́ra pìnɔ dasi lɛ́n, ń kína gbɛ̃nɔn sɔɔronɔ pɔ́ ũ. Ń wɛ́ra bĩnide pìnɔ baadi kũ a lakutunɔ. Gbɛ̀ gbɛ̃̀ntɛ̃ kũ ò Dikiri àkpatii dìtɛa Bɛsɛmɛsi gbɛ̃ Yɔsua búgbɛɛaa pìimɛ sèeda ũ ari kũ a gbãrao.

¹⁹ Akũ Dikiri Bɛsɛmɛside kenɔ dɛ̀dɛ, kũ ò a àkpatii gũn gwà yãi. À ń dɛdɛ gbɛ̃nɔn baaakɔ̃ akurimɛ, akũ ò wɛ̃nda ɔ́ɔ dɔ̀, kũ Dikiri kakatɛ zɔ̃kɔ̃ɔ kpàńyĩ yãi.

²⁰ Akũ Bɛsɛmɛsidenɔ pì: Dí mɛ́ ani fɔ̃ à zɛ Dikiri Luda kũ à kú adona pì arɛɛ? Óni àkpatii pì kpãzã dínɔ kĩnaa sàa?

²¹ Akũ ò gbɛ̃nɔ zĩ̀ Kiriayarimudenɔa ò pì: Filisitininɔ sù kũ Dikiri àkpatiio. À mɔ́ à sɛ́ à táo á kĩnaa.