1 SAMUƐLI 5 - Bisã Bible 2005

Luda àkpati kunna Filisitininɔ kĩnaa

¹ Kũ Filisitininɔ Luda àkpatii sì, ò bòo Ɛbɛnɛza ò tào Asadɔdi.

² Akũ ò gɛ̃̀o ń tãna Dagɔ̃ kpɛ́n ò dìtɛ a sarɛ.

³ Kũ gu dɔ̀, Asadɔdidenɔ fùtɛ kɔnkɔkɔnkɔ, akũ ò è Dagɔ̃ lɛ̀tɛ zĩtɛ a gbɛrɛa Dikiri àkpati arɛ. Akũ ò Dagɔ̃ sɛ̀ ò vùtɛ a gbɛ̀n.

⁴ Kũ gu dɔ̀ dɔ, ò fùtɛ kɔnkɔkɔnkɔ, akũ ò è Dagɔ̃ lɛ̀tɛ zĩtɛ a gbɛrɛa dɔ Dikiri àkpati arɛ. A mì kũ a ɔnɔ wòwokɔ̃a katɛna kpɛ́lɛlɛ gbĩ̀ia. A gbãn mɛ́ à gɔ̃̀ ditɛna ado.

⁵ Abire yãi Dagɔ̃ gbàgbarinɔ kũ gbɛ̃ kũ òtɛn gɛ̃ a kpɛ́n Asadɔdinɔ dì gɛ̀sɛ pɛ́tɛ a kpɛ́ kpɛ́lɛlɛ gbĩ̀iaro ari kũ a gbãrao.

⁶ Dikiri ɔ tɔ̃̀ Asadɔdidenɔa à ń ásaru kɛ̀ à gbɛ̀nna kàńgu, Asadɔdi kũ a lakutunɔ pínki.

⁷ Kũ Asadɔdidenɔ è lɛ, ò pì: Isarailanɔ tãna àkpati ni le àgɔ̃ kú kũoo la doro, zaakũ àtɛn ɔ tɔ̃wá kũ ó tãna Dagɔ̃o pãsĩpãsĩ.

⁸ Akũ ò gbɛ̃nɔ zĩ̀ ò ń kínanɔ kàkara ń pínki, akũ ò ń lá ò pì: Deran óni kɛ nà kũ Isarailanɔ tãna àkpatiioo? Akũ ò pì: Ò gɛ́o Gata. Akũ ò gɛ̀ɛo.

⁹ Kũ ò kào gwe, Dikiri ɔ tɔ̃̀ wɛ̃tɛ gwe denɔa dɔ, akũ wɛ̃tɛ pìi wã̀. Dikiri gagagyã kàńgu, gbɛ̀nna dàńla ń pínki nɛ́ fíti gbɛ̃ zɔ̃kɔ̃.

¹⁰ Akũ ò gɛ̀ɛ kũ Luda àkpatii pìio Ɛkɛrɔnu. Kũ òtɛn gɛ̃o, wɛ̃tɛpidenɔ wiki lɛ̀ ò pì: Ò gɛ̃̀wái kũ Isarailanɔ tãna àkpatiio, de ò ó dɛdɛ ó buriamɛ.

¹¹ Akũ ò gbɛ̃nɔ zĩ̀ ò ń kínanɔ kàkara ń pínki ò pìńnɛ: À Isarailanɔ tãna àkpati sɛ́ à táo a gbɛ̀n, de àsun ó dɛdɛ ó buriaro. Zaakũ gaga tò wɛ̃tɛ pìi wã̀, Luda ɔ tɔ̃̀ḿma gwe manamana.

¹² Gbɛ̀nna kà gbɛ̃ kũ odi garonɔgu, akũ wɛ̃tɛpidenɔ wiki kà ludambɛ.