1 SAMUƐLI 31 - Bisã Bible 2005

Solu gana kũ a nɛ́gɔ̃gbɛ̃nɔ

¹ Filisitininɔ zĩ̀i kà kũ Isarailanɔ, akũ Isarailanɔ bàa lɛ̀ńnɛ ari ń daside gàga Giliboa sĩ̀sĩgɛrɛɛi.

² Filisitininɔ pɛ̀tɛ Solu kũ a nɛ́gɔ̃gbɛ̃nɔi, akũ ò a nɛ́ pìnɔ Yonatã kũ Abinadabuo kũ Malakisuaoo dɛ̀dɛ.

³ Zĩ̀ kũ òtɛn ká Solu sarɛ pãsĩ kũ̀, akũ kàzurinɔ a pà, à kĩ̀nna manamana.

⁴ Akũ à pì a zĩ̀kapɔnɔsɛriinɛ: Ǹ n fɛ̃nɛda woto ǹ ma zɔ̃ ǹ ma dɛo. Tó lɛnlo, gyɔfɔrɔde dínɔ ni ma zɔ̃ ò fàai bo kũmao. Akũ vĩna a zĩ̀kapɔnɔsɛrii kũ̀, adi weiro, akũ Solu a fɛ̃nɛda sɛ̀, à a zĩda ò'oala.

⁵ Kũ a zĩ̀kapɔnɔsɛrii è à gà, akũ à a zĩda ò'o a fɛ̃nɛdaa se à gà.

⁶ Lɛn Solu kũ a nɛ́gɔ̃gbɛ̃ gbɛ̃nɔn aakɔ̃ kũ a zĩ̀kapɔnɔsɛriio kũ a gbɛ̃nɔ gàga lɛɛlɛ lɛ zĩ dokɔ̃nɔ pìa ń pínki.

⁷ Kũ Isaraila kũ ò kú guvutɛn gwenɔ kũ ń gbɛ̃ kũ ò kú Yoda bara direnɔ è ń zĩ̀karinɔ bàa lɛ̀, akũsɔ̃ Solu kũ a nɛ́nɔ gàga, ò bàa lɛ̀ ò ń wɛ̃tɛnɔ tò gwe, akũ Filisitininɔ sù ò vùtɛn.

⁸ Kũ gu dɔ̀, akũ Filisitininɔ sù òtɛn pɔ́nɔ bɔtɛ gbɛ̃ kũ ò gàganɔa, akũ ò Solu kũ a nɛ́ mɛ̀n aakɔ̃ pìnɔ gɛ̀nɔ è katɛna Giliboa sĩ̀sĩgɛrɛɛi.

⁹ Akũ ò Solu mìi zɔ̃̀ ò a gɔ̃kɛbɔnɔ bɔ̀tɛa, akũ ò gbɛ̃nɔ zĩ̀ ò a baaruu kpàkpa Filisitininɔ bùsu gu sĩnda pínkia kũ ń tãnakpɛnɔ.

¹⁰ Ò a gɔ̃kɛbɔnɔ kàtɛ tãna kũ òdi pi Asatorɛ kpɛ́n, akũ ò a gɛ̀ɛ lòko Bɛtɛsã bĩnia.

¹¹ Kũ Yabɛsi Giliadadenɔ yã kũ Filisitininɔ kɛ̀ Solunɛ pìi mà,

¹² akũ ń gɔ̃sa gbãnanɔ fùtɛ ń pínki ò tá gwãani ò zĩ birea, ò Solu kũ a nɛ́nɔ gɛ̀nɔ kìpa Bɛtɛsã bĩnia, akũ ò tào Yabɛsi ò tɛ́ sɔ̃̀ḿma gwe.

¹³ Ò ń wánɔ sɛ̀tɛ ò vĩ̀ sãma lí gbáru Yabɛsi gwe, akũ ò lɛ́ yĩ̀ gɔrɔ suppla.