Online Bible

1 SAMUƐLI 30 - Bisã Bible 2005

Dauda Amalɛkinɔ kakatɛnaa

¹ Dauda kũ a gbɛ̃nɔ kà Zikilaga a gɔrɔ aakɔ̃de zĩ. À sù à lè Amalɛkinɔ sù ò lɛ̀tɛ Nɛgɛvi bùsuua kũ Zikilagao ń kpɛ. Ò lɛ̀tɛ Zikilagaa ò tɛ́ sɔ̃̀a.

² Ò nɔgbɛ̃ kũ ò kú gwenɔ kũ̀kũ, nɛ́nɔgbɛ̃nɔ kũ nɔgbɛ̃ zɔ̃kɔ̃nɔ ń pínki. Odi ń gbɛ̃ke dɛro, ò ń sɛ́tɛ ò tà kũńwo.

³ Kũ Dauda kũ a gbɛ̃nɔ kà ń bɛ wɛ̃tɛn, ò è ò tɛ́ sɔ̃̀a ò ń nɔgbɛ̃nɔ kũ ń nɛ́gɔ̃gbɛ̃nɔ kũ ń nɛ́nɔgbɛ̃nɔ kũ̀kũ ò tà kũńwo.

⁴ Akũ Dauda kũ gbɛ̃ kũ ò kú kãaonɔ wiki lɛ̀ ò ɔ́ɔ dɔ̀ ari ń gbãna làka, ari odi fɔ̃ ò ɔ́ɔ dɔ̀ doro.

⁵ Ò Dauda nɔnɔ kũ̀kũ ò tà kũńwo ń pla Ainɔama kũ Abigailio.

⁶ Dauda wɛ́tãmma è manamana, zaakũ òtɛn pi ò a pápa kũ gbɛ̀ɛo ò dɛ. Ń gbɛ̃ sĩnda pínki nɛ̀sɛɛ yàka ń nɛ́gɔ̃gbɛ̃nɔ kũ ń nɛ́nɔgbɛ̃nɔ yã musu. Ama Dauda gbãna è Dikiri a Ludaa,

⁷ akũ à pì sa'ori Abiatanɛ: Ǹ mɔ́ kũ n uta lokommao. Kũ à gɛ̀ɛonɛ,

⁸ akũ Dauda yã gbɛ̀kao Dikiria, à a là à pì: Mà pɛ́tɛ gbãnamɔnnɛrii pìnɔi mani ń le yá? À pìnɛ: Ǹ pɛ́tɛńyĩ, ĩni ń le ǹ n gbɛ̃nɔ mì sí.

⁹ Akũ Dauda dà zɛ́n kũ gbɛ̃nɔn wàa aakɔ̃nɔ. Kũ ò kà Beso swai, gbɛ̃kenɔ gɔ̃̀ gwe.

¹⁰ Gbɛ̃nɔn wàa donɔ gbãna làka, odi fɔ̃ ò bikũ̀ swa pìiaro, akũ Dauda bikũ̀, à tɛ́ ń gbɛ̀ɛi kũ gbɛ̃nɔn wàa planɔ.

¹¹ Ò Misila gbɛ̃ke è sɛ̃̀ntɛ, akũ ò gɛ̀ɛ kãao Dauda kĩnaa. Ò pɔ́ble kpàa à blè, ò í kpàa à mì.

¹² Akũ ò kaka nɛ́ kori kpàa kũ geepi kàraao mɛ̀n pla à sò. Akũ a mɛ̀ɛ sù, zaakũ à kɛ̀ fãnantɛ̃ aakɔ̃ gwãani aakɔ̃ pɔ́blesari ímisari.

¹³ Akũ Dauda a là à pì: Dí gbɛ̃mɛ n ũu? N bo mámɛɛ? Akũ Misila gbɛ̃ pìi pì: Amalɛki zɔ̀ɔn ma ũ. A gɔrɔ aakɔ̃den dí, ma dikiri pã kpàmai kũ matɛn gyã kɛ yãi.

¹⁴ O lɛtɛ Nɛgɛvi bùsuuamɛ, gu kũ Kɛrɛtinɔn kun kũ Yudanɔ kũ Kalɛbu burinɔ, akũ ò tɛ́ sɔ̃̀ Zikilagaa.

¹⁵ Akũ Dauda a là à pì: Ĩni fɔ̃ ǹ gɛ́ kũmao gbɛ̃ pìnɔ kĩnaa yá? À wèa à pì: Tó n sìmɛnɛ kũ Ludao kũ ĩni ma dɛro, tó ĩni ma kpá ma dikiriiaro, mani gɛ́ kũnwo ń kĩnaa.

¹⁶ Akũ à gɛ̀ɛ kãao. Kũ ò kà, ò ń lé, ò fãkɔ̃ana gu sĩnda pínkia, òtɛn pɔ́ ble òtɛn í mi, òtɛn pɔnna kɛ pɔ́ zɔ̃kɔ̃ kũ ò sɛ̀tɛ Filisitini bùsunnɔ kũ Yudanɔ bùsuuo yãi.

¹⁷ Akũ Dauda sì ń tɛ́ à ń dɛdɛ naana zaa ɔkɔsi ari gu gɛ̀ɛ à dɔ̀o ɔkɔsi. Ń gbɛ̃ke dí boki lero, séde kɛfɛnna gbɛ̃nɔn wàa pla kũ ò dì lakumia ò bàa lɛ̀nɔ baasiro.

¹⁸ Dauda gbɛ̃ kũ Amalɛkinɔ ń kũkũnɔ mìi sì ń pínki kũ a nɔnɔ ń pla.

¹⁹ Ń gbɛ̃ke dí sãsãro, nɛ́ fíti gbɛ̃ zɔ̃kɔ̃, nɛ́gɔ̃gbɛ̃nɔ kũ nɛ́nɔgbɛ̃nɔ ń pínki. Bee pɔ́ kũ ò sɛ̀tɛnɔ, Dauda ɛ̀ra à pɔ́ pìnɔ sì pínki.

²⁰ À sãnɔ kũ zùnɔ nàkɔ̃a, akũ a gbɛ̃nɔ pɔ́kãde pìnɔ kpán'arɛ kɛ̀ ò pì: Dauda pɔ́nɔn dí.

²¹ Akũ Dauda kà gbɛ̃nɔn wàa do kũ ń gbãna làka odi fɔ̃ ò gɛ̀ɛ kãaoro ò gɔ̃̀ Beso swainɔ kĩnaa. Ò bɔ̀tɛ ò dàalɛ kũ gbɛ̃ kũ ò kú kãaonɔ. Kũ Dauda nàńyĩ, à fɔ kpàḿma,

²² akũ gbɛ̃ pãsĩ gaavude kũ ò tɛ́ Daudainɔ pì: Lákũ odi gɛ́ kũooro nà, óni pɔ́ kũ o sìnɔ ke kpáḿmaro, tó adi kɛ ń baadi nanɔ kũ a nɛ́nɔ baasiro. Ò ń sɛ́ ò tá kũńwo.

²³ Akũ Dauda pì: Oi! Ma gbɛ̃nɔ, àsun kɛ lɛ kũ pɔ́ kũ Dikiri kpàwánɔro, zaakũ à ó dãkpã à gbãnamɔnnɛri kũ ò lɛ̀tɛwánɔ nàwɛrɛ ó ɔĩ.

²⁴ Gbɛ̃ke ni yã kũ a ò díkĩna síro fá. Gbɛ̃ kũ ò gɔ̃̀ òtɛn pɔ́nɔ dãkpãnɔ baka nigɔ̃ dokɔ̃nɔ kũ gbɛ̃ kũ ò gɛ̀ɛ zĩ̀lannɔmɛ. Óni kpaatɛtɛkɔ̃nɛ lɛɛlɛlɛɛlɛ.

²⁵ Kũ Dauda yã pìi dìtɛ, akũ à gɔ̃̀ doka ũ Isarailanɔnɛ zaa zĩ birea ari kũ a gbãrao.

²⁶ Kũ Dauda kà Zikilaga, à pɔ́ kũ à sì kenɔ kpã̀zã Yudanɔ bùsu gbɛ̃ zɔ̃kɔ̃ kũ ò de a gbɛ̃nna ũnɔnɛ à pì: Gba kũ a è pɔ́ kũ o sì Dikiri ibɛrɛnɔaa gũnnɔn gwe.

²⁷ À kpã̀zãńnɛ Bɛtɛli kũ Ramɔ Nɛgɛvio kũ Yatio

²⁸ kũ Aroao kũ Sifimɔo kũ Ɛsɛtɛmɔao

²⁹ kũ Rakalao kũ Yeramɛɛli buri wɛ̃tɛnɔ kũ Keni wɛ̃tɛnɔ

³⁰ kũ Ɔɔmao kũ Borasão kũ Atakao

³¹ kũ Ɛblɔnuo kũ gu kũ Dauda kurèn kũ a gbɛ̃nɔ pínki.

« Předchozí

další »

Následuj nás:

Sponzorované odkazy

Reklamy