Online Bible

1 SAMUƐLI 28 - Bisã Bible 2005

Solu kũ nɔgbɛ̃ wedekũnnade gɛ̀sisiriio

¹ Gɔrɔ birenɔa Filisitininɔ ń zĩ̀karinɔ kàkara, ò ye ò gɛ́ ò zĩ̀ ká kũ Isarailanɔ. Akũ Akisi pì Daudanɛ: Asa ń dɔ̃ kũ mɔkɔ̃n kũ n gbɛ̃nɔ áni gɛ́ kũmao zĩ̀ ká kó?

² Akũ Dauda pìnɛ: Tɔ̀, ĩni e sà lákũ makũ n zɔ̀bleri mani kɛ nà. Akũ Akisi pìnɛ: Tó lɛmɛ, mani n kɛ ma dãkpãri ũ ari gɔrɔ sĩnda pínki.

³ À sù à lè Samuɛli gà, Isarailanɔ kàkara ń pínki, ò ɔ́ɔ dɔ̀ a ga yã musu, akũ ò a vĩ̀ a bɛ wɛ̃tɛn Rama. Solu pɛ̀ wedekũnnadenɔa kũ gɛ̀sisirinɔ Isarailanɔ bùsun.

⁴ Kũ Filisitininɔ kɔ̃ kàkara, ò sù ò bùraa kàtɛ Sunɛmu. Akũ Solu Isarailanɔ kàkara ń pínki, ò bùraa kàtɛ Giliboa.

⁵ Kũ Solu Filisitini zĩ̀karinɔ è, vĩna a kũ̀, swɛ̃̀ɛ kɛ̃̀agu manamana.

⁶ À gbɛ̀ka Dikiria, akũ Dikiri dí wea nana gũn ke kũ Urimuo ke annabinɔ gãiro.

⁷ Akũ Solu pì a ìbanɔnɛ: À nɔgbɛ̃ wedekũnnade gɛ̀sisiri ke wɛtɛmɛnɛ, de mà gɛ́ mà yã gbɛkaa. Akũ ò pìnɛ: Nɔgbɛ̃ wedekũnnade gɛ̀sisiri ke kú Ɛndɔ.

⁸ Akũ Solu a zĩda lìtɛ à pɔ́kasa pãndenɔ dà, akũ à gɛ̀ɛ à nɔgbɛ̃ pìi lè gwãani, a gbɛ̃nɔn planɔ tɛ̀i. À pìnɛ: Ǹ tó n tãna su ǹ gɛ̀ kũ mani a tɔ́ onnɛ sísimɛnɛ.

⁹ Akũ nɔgbɛ̃ pìi pìnɛ: Ń dɔ̃ sãnsãn yã kũ Solu kɛ̀. À a bùsu zɛ́ zɔ̃̀ wedekũnnadenɔnɛ kũ gɛ̀sisirinɔo. Bɔ́ yã mɛ́ à tò ntɛn tankutɛ kpákpamɛnɛ de ò ma dɛɛ?

¹⁰ Akũ Solu la dànɛ kũ Dikirio à pì: Ma sì kũ Dikirio oni wari dɔmma yã dí musuro.

¹¹ Akũ nɔgbɛ̃ pìi pì: Gɛ̀ kpaten mà sísinnɛɛ? À pì: Samuɛli gɛ̀ɛmɛ.

¹² Kũ nɔgbɛ̃ pì Samuɛli è, à wiki pũ̀tã à pì Solunɛ: Mɔkɔ̃mmɛ Solu ũu? Bɔ́yãin n ɔ̃ndɔ̃ kɛ̀mɛnɛɛ?

¹³ Akũ kína pìnɛ: Ǹsun tó vĩna n kũro. Bɔ́n n èe? À pìnɛ: Gyãwãnden ma è, àtɛn bo zĩtɛn.

¹⁴ Solu a là à pì: À kɛ̀ deramɛɛ? À pìnɛ: Mare zĩ ke mɛ́ àtɛn su, à arukĩmba dana. Akũ Solu dɔ̃̀ kũ Samuɛlimɛ, akũ à kùtɛ à wùtɛ a gbɛrɛa.

¹⁵ Akũ Samuɛli a là à pì: Bɔ́yãin n wari dɔ̀ma, kũ n ma sisii? À wèa à pì: Ma warikɛna zɔ̃kɔ̃ɔ èmɛ. Filisitininɔ mɛ́ ò sù zĩ̀ ká kũmao, akũ Luda kpɛ lìmɛnɛ. Àdi wema annabi gãi ke nana gũn doro. Abire yãin ma n sisi. Ǹ omɛnɛ lákũ mani kɛ nà.

¹⁶ Samuɛli pìnɛ: Dikiri kpɛ lìnnɛ à gɔ̃̀ n ibɛrɛ ũ, akũ n su ntɛn yã gbɛkama sɔ̃ bi?

¹⁷ Dikiri kɛ̀nnɛ lákũ à dàmɛnɛ ma ònnɛ nà. À n bo kpatan à n gbɛ̃dake Dauda kàn.

¹⁸ Dikiri abirekũ kɛ̀nnɛ gbãra, kũ ńdi a yã maro yãimɛ. Ńdi pɔfɛ̃ pãsĩ kipanɛ Amalɛkinɔaro.

¹⁹ Dikiri ni Isarailanɔ kũ mɔkɔ̃nwo kpá Filisitininɔamɛ. Mɔkɔ̃n kũ n nɛ́gɔ̃gbɛ̃nɔ nigɔ̃ kú kũmao la zia. Dikiri ni Isaraila zĩ̀karinɔ kpá Filisitininɔa.

²⁰ Samuɛli yã pìi tò vĩna Solu kũ̀ manamana, akũ à lɛ̀tɛ a gbɛrɛa sɔ̀rɔrɔ gɔ̃̀nɔ. A gbãna làka, zaakũ adi pɔ́ke ble gɔrɔ birea ke gwãani kũ̀aro.

²¹ Kũ nɔgbɛ̃ pìi sù Solu kĩnaa, à è swɛ̃̀ɛ kɛ̃̀agu manamana, akũ à pìnɛ: Makũ n zɔ̀bleri ma n yã mà, ma a zĩda kari kɛ̀, ma yã kũ n òmɛnɛ kɛ̀.

²² Ǹ n zɔ̀bleri yã ma sà. Ǹ tó mà pɔ́ble ditɛnnɛ ǹ ble, de ǹ gbãna kũ ǹ da zɛ́n.

²³ Akũ Solu gì à pì: Mani pɔ́ blero. Kũ a ìbanɔ nàkaraa lɛɛlɛ kũ nɔgbɛ̃ pìio, akũ à ń yã mà. Akũ à fùtɛ zĩtɛ à vùtɛ gádoa.

²⁴ Nɔgbɛ̃ pìi zù bɔ̀rɔ mɛ̀kpana vĩ bàdɔna a bɛa. À gɛ̀ɛ à dɛ̀ gɔ̃̀nɔ, akũ à flawa sɛ̀ à dɛ̀, à burodi futɛnasari kɛ̀o.

²⁵ À dìtɛ Solunɛ kũ a ìbanɔ. Ò blè, akũ ò fùtɛ ò tà gwãani birea gɔ̃̀nɔ.

« Předchozí

další »

Následuj nás:

Sponzorované odkazy

Reklamy