1 SAMUƐLI 27 - Bisã Bible 2005

Dauda kunna Filisitininɔ bùsun

¹ Dauda laasun lɛ̀ à pì: Solu ni ma dɛ zĩkea. Tó mádi bàa lɛ́ ma ta Filisitininɔ bùsunlo, ani bo kũmao nnaro. Tó ma bàa lɛ̀, Solu ni ma wɛtɛna tó, mani bo a ɔĩ.

² Akũ Dauda fùtɛ à gɛ̀ɛ Gata kína Akisi, Maɔku nɛ́ kĩnaa. Gbɛ̃nɔn wàa aakɔ̃nɔ gɛ̀ɛ kãao.

³ Akũ Dauda kũ a gbɛ̃nɔ vùtɛ Gata kũ Akisio, baadi kũ a bedenɔ. Dauda kú gwe kũ a nɔnɔ gbɛ̃nɔn pla, Yɛzɛrili gbɛ̃ Ainɔama kũ Kamɛli gbɛ̃ Abigaili kũ à de Nabala nɔ ũ yão.

⁴ Kũ ò ò Solunɛ Dauda bàa lɛ̀ à tà Gata, adi pɛ́tɛi doro.

⁵ Dauda pì Akisinɛ: Tó ma n pɔnna è, ǹ ma gba zɛ́ mà vutɛ gukea n lakutunɔ doke gũn. Makũ n zɔ̀bleri má ye màgɔ̃ kú kũnwo n wɛ́ranlo.

⁶ Zĩ birean Akisi Zikilaga kpàa, akũ à gɔ̃̀ Yudanɔ kínanɔ pɔ́ ũ ari kũ a gbãrao.

⁷ Dauda kunna Filisitininɔ bùsun kà wɛ̃̀ do kũ mɔ siikɔ̃o.

⁸ Akũ Dauda kũ a gbɛ̃nɔ gɛ̀ɛ ò lɛ̀tɛ Gesurunɔa kũ Gizinɔ kũ Amalɛkinɔ. Gbɛ̃ pìnɔn kú bùsuu pìn zaa zĩmɛ bona zaa Suru ari à gɛ̀ɛ pɛ́ Misilaa.

⁹ Tó Dauda zĩ̀i blè bùsuu pì lakutunɔa, àdi gɔ̃gbɛ̃ ke nɔgbɛ̃ ke tó bɛ̃nɛro, sãnɔ kũ zùnɔ kũ zaakinɔ kũ lakuminɔ kũ pɔ́kasanɔ àdi nakɔ̃a. Tó à tà, àdi gɛ́ Akisi kĩnaa.

¹⁰ Tó Akisi a là gu kũ à lɛ̀tɛn gbɛ̃nɔa gbãra, Dauda dì pinɛ a gɛ Nɛgɛvi bùsun, Yudanɔ ke Yeramɛɛli burinɔ ke Keninɔ kĩnaamɛ.

¹¹ Dauda dì gɔ̃gbɛ̃ ke nɔgbɛ̃ ke tó bɛ̃nɛ ò su kãao Gataro, zaakũ àtɛn pi: Gbɛ̃ke ni ó kɔrɔmɔtɔɔ kɛ à pi dera ma kɛ̀ nàn dí. Lɛn àdigɔ̃ kɛ lɛ gɔrɔ kũ à kú Filisitininɔ bùsun.

¹² Akisi Dauda náani kɛ̀ à pì a zĩdanɛ: Isarailanɔn ye a kãiro. Anigɔ̃ de ma zɔ̀bleri ũmɛ gɔrɔ sĩnda pínki.