Online Bible

1 SAMUƐLI 26 - Bisã Bible 2005

Dauda gina Solu dɛnaai gɛ̃̀n plade

¹ Zifidenɔ gɛ̀ɛ ò Solu lè Gibɛa ò pìnɛ: Dauda utɛna Akila sĩ̀sĩgɛrɛɛi kũ arɛdɔna Yɛsimɔa.

² Akũ Solu gɛ̀ɛ Zifi sɛ̃̀ntɛ kũ Isaraila zĩ̀karinɔ gbɛ̃nɔn wàa gɛ̃ro, òtɛn Dauda wɛtɛ ò a dɛ sɛ̃̀ɛ pìn.

³ Solu bùraa kàtɛ zɛ́ sarɛ Akila sĩ̀sĩgɛrɛ kũ à arɛdɔna Yɛsimɔa, akũ Dauda kú sɛ̃̀n. Kũ à mà Solu tɛn pɛ́tɛai,

⁴ akũ à gu'asirigwarinɔ zĩ̀, akũ à dɔ̃̀ sà kũ Solu kà.

⁵ Akũ Dauda fùtɛ à gɛ̀ɛ gu kũ Solu bùraa kàtɛn. À Solu kũ a zĩ̀karinɔ gbɛ̃ zɔ̃kɔ̃ Nɛrɛ nɛ́ Abanao wutɛki è. Solu wutɛna bùraan, a gbɛ̃nɔ kàtɛ ò likai.

⁶ Akũ Dauda Iti buri Aimɛlɛki kũ Zeruya nɛ́ Abisaio là à pì: Dí mɛ́ ani gɛ́ kũmao bùraa pìn Solu kĩnaa? Akũ Abisai pìnɛ: Makũ mɛ́ mani gɛ́ kũnwo.

⁷ Kũ Dauda kũ Abisaio lɔɔtɛ̀ gbɛ̃ pìnɔi gwãani, akũ ò Solu è wutɛna, àtɛn i o bùran, a sári pɛtɛna a mìii. Abana kũ a gbɛ̃nɔn wutɛna ò likai ń pínki.

⁸ Akũ Abisai pì Daudanɛ: Luda n ibɛrɛ nànnɛ n ɔĩ gbãra. Ǹ tó mà a zɔ̃ kũ sário mà a nakɔ̃a kũ zĩtɛo. Mani a zɔ̃ gɛ̃̀n domɛ, adi kɛ gɛ̃̀n planlo.

⁹ Akũ Dauda pìnɛ: Ǹsun a dɛro. Dí mɛ́ ani fɔ̃ à ɔ na kína kũ Dikiri kàa à bo pãa?

¹⁰ Akũ Dauda ɛ̀ra à pì: Dikiri kun! Dikiri mɛ́ ani gò tɔ̃a à ga, tó a gɔrɔ pàpa kesɔ̃ à gà zĩ̀lan.

¹¹ Kai! Dikiri sún tó mà ɔ na kína kũ à kàaro. Ò gɛ́ ò sári kũ à kú a mìii sɛ́ kũ a í loo ò táo.

¹² Dauda sári kũ í lo kũ à kú Solu mìiioo sɛ̀, akũ ò tào. Ń gbɛ̃ke dí ń ero, ò ń yã dɔ̃ro, òtɛn i o ń pínki. Ń gbɛ̃ke dí vuro, zaakũ Dikiri mɛ́ à tò i zɔ̃kɔ̃ɔ dàńla.

¹³ Kũ Dauda bikũ̀ guvutɛ bara dire kpa, akũ à zɛ̀ sĩ̀sĩi musu zã̀zã, gu yàasa dana ń dagura.

¹⁴ Akũ à lɛ́ zù Abanai kũ a gbɛ̃nɔ à pì: Abana yooo! Ń yĩtɛnan yá? Abana wèa à pì: Dí mɛ́ àtɛn lɛ́ zu kínaii?

¹⁵ Dauda pìnɛ: Gɔ̃sa gbãnamɛ n ũroo? Gbɛ̃ke kà lán n bà Isarailanɔ bùsunn yá? Gbɛ̃ke sù n dikiri kína dɛ. Bɔ́ yã mɛ́ à tò ńdi a dãkpãroo?

¹⁶ Ńdi yã kɛ a zɛ́aro. Ma sì kũ Dikirio a ka ganamɛ, zaakũ ádi á dikiri kína kũ Dikiri kà dãkpãro. Ǹ gwa! Kína sári kũ a í lo kũ à kú a mìiio kú mámɛɛ?

¹⁷ Solu Dauda kòtoo dɔ̃̀, akũ à pì: Dauda ma nɛ́, n kòtoon gwe yá? À wèa à pì: Ma dikiri kína, ma kòtoomɛ.

¹⁸ Dauda ɛ̀ra à pì: Bɔ́ yã mɛ́ à tò ma dikiri tɛn pɛ́tɛ makũ a zɔ̀bleriiii? Bɔ́n ma kɛ̀ɛ? Bɔ́ taarin ma kɛ̀ɛ?

¹⁹ Ma dikiri kína, ǹ sã kpá makũ n zɔ̀bleri yãi sà. Tó Dikiri mɛ́ à n suu kɛ̀ma, à ma sa'ona gbĩ ma. Tó bisãsirinɔmɛ sɔ̃, Dikiri láari kɛḿma, zaakũ ò pɛ̀ma ò ma bo Dikiri gbɛ̃nɔ tɛ́, ò pì mà gɛ́ do tãnanɔimɛ.

²⁰ Ǹsun tó ò ma dɛ zã̀ kũ Dikirioro. Isarailanɔ kína bò, àtɛn kɔ̀kɔ fítinna wɛtɛ à dɛ, lákũ òdigɔ̃ pɛ́ dɔ̃a sĩ̀sĩnɔ musu nà.

²¹ Akũ Solu pì: Ma durunna kɛ̀. Ma nɛ́ Dauda, ǹ ɛra ǹ su. Mani wari dɔmma doro, zaakũ n ma wɛ̃̀ndii bɛ̀ɛrɛ dɔ̃ gbãra. Yãpuramɛ, ma yɔ̃nkɔyã kɛ̀, ma zã yãa manamana.

²² Akũ Dauda pìnɛ: N sárin dí. Ǹ tó n ìbanɔ doke bikũ à mɔ́ à sí.

²³ Dikiri dì fĩna bo baadinɛ a manakɛna kũ a náanio musu. Dikiri n namɛnɛ ma ɔĩ gbãra, ama mádi we mà ɔ nàmmaro kũ Dikiri mɛ́ à n ka kín yãi.

²⁴ Lákũ ma n wɛ̃̀ndii bɛ̀ɛrɛɛ dɔ̃̀ gbãra nà, Dikiri ma wɛ̃̀ndii bɛ̀ɛrɛ dɔ̃ lɛ, à ma sí yã vãni sĩnda pínkia.

²⁵ Akũ Solu pìnɛ: Luda arubarika dangu ma nɛ́ Dauda. Ĩni yã zɔ̃kɔ̃ kɛ, n mì nigɔ̃ dana íla. Kũ Dauda tà, akũ Solu tà bɛ.

« Předchozí

další »

Následuj nás:

Sponzorované odkazy

Reklamy