Zɛ́fènádyà 3 - Ɓǎsɔ́ɔ̀ Báɓòɔ̀

Jùɖúsɛ̀ɖɛ̀ìn-hwɔ̀ɖɔ̀ɔ̀ nàmàǔn kè ɔ po-po ɖe

¹ Gǎ mu Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓěɔ̀ kɔ̃ dyiìn. Wa vɔ̃ Gèɖèpɔ́ɔ̀ gbo, ké wa nyìnììn hwòɖǒ kɔ̃in, ké waà nàìn-nyɔ̀ ɓěɔ̀ mɔ̀ nyɔ-ɓíɖíi-dyi-nɛ́ìn-nyɔ̀.

² Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓěɔ̀ ní nyu nyɔ ɖòɛ̀ wuɖu, ké wa ní kpɔ̃ nyɔ ɖòɛ̀ ná-wùɖù dyi. Wa se Bounɓoɔ̀ hwìɖǐǐ taɓa, ké wa ní xwɛ̃́ìn waà Gèɖèpɔ́ɔ̀ bũ̌in.

³ Hwɔɖɔɔ̀ gɔ̌mànà-nyɔ̀ ɓěɔ̀ nì kà ganìǎ nì kuɖuɛń ɓě nìà kɛ. Ɔ tɔ̀ɔ̀-ɓìɔ̀ ɓěɔ̀ nì kà kpɔ̃ɔ-nìmìì ɓě ɓɛ́ mɔ́ nì nyuɛń mìɔ kɛɛ nìà kɛ. Wa zi ɖii-ɖɛ̀ jè kàmàǔn mìɔ, ké wa dyi ɖɛ ɖò kpɔ̃ ní, wa ní táà ɖɛ wa kpɔ̃à kɛɛ kpá ɖò dyi, ké ɔ ní goò dyɛ mɔ̀ùn.

⁴ Hwɔɖɔɔ̀ kpáá-ɖɛ̀-cɛ̃-nyɔ̀ ɓěɔ̀ ɓúáìn wa mìɔùn dyí, ké wa se hwòɖǒ-kɔ̃-dè-nyɔ̀. Hwɔɖɔɔ̀ sáa-zà-nyɔ̀ ɓěɔ̀ zàìn Gèɖèpɔ́ɔ̀ ɖɛ hwɛ̀ǐn-hwɛ̀ǐn ɓěɔ̀ zùǔn, ké wa zàìn Gèɖèpɔ́ɔ̀ gmaɔ̀ dyí ɓó wa mìɔùn nììn kpáná dyé jè.

⁵ Kɛɛ Bounɓoɔ̀ nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ke. Ɔ nyu ɖɛ sɛ́ɖɛ́ìn dyíɛ, ké ɔ séè ɖɛ gbà nyu ɖò. Ɔ nì ɓó ɔ nyɔ ɓěɔ̀ gbo ɓó wé kè wé xwíníín, ké ɔ nyu ɖɛ mɔ̀ jǎà kɛɛ wa bìì. Kɛɛ wɛ̃́ɛ́ kɛɛ, hwɔɖɔɔ̀ hwòɖǒ-kɔ̃in-nyìnììn-nyɔ̀ ɓěɔ̀ nì ɖɛ gbà nyuɛń, ké dɛ̃ ní nyu wa.

⁶ Bounɓoɔ̀ cɛ̃ɛ, ké ɔ ɖá, “Ḿ ɖǎ ɓóɖó-dù tɔ̀ɔ̀ ɓě ɓó dyi sámá, ké ḿ ɖǎ waà hwɔɖɔ ɓěɔ̀ wáɖá, ké waà gmɔ-wɔ̃̀ ɓěɔ̀ kè waà hwɔɖɔ-dyí-gmɔ̀ìn-gbò ɓěɔ̀ ɖǎ wáɖá. Hwɔɖɔ ɓěɔ̀ kpá fóɖóún, ké nyɔ ɖò se wa ɖò mú sè fɔɔ cá.

⁷ Sɔ̀ìn ɓóɛ gboɛɛ, ḿ poìn ma hwìɖǐi kà ní nyɔ ɓěɔ̀ muɔ́ má ḿ kpéín dyéìn, ɓɛ́ wa kéɔ́ má ní ná-wùɖù dyi kpɔ̃ɛ. Ɔ dyiɔ́ ná nìǐn, nìí, ḿ seɔ́ wa gǎ kɔ̃ tòɛ̌ mu, ɓɛ́ ḿ kéɔ́ waà hwɔɖɔɔ̀ mú gbɔɔ̀. Kɛɛ waà hwòɖǒ mɔ́ ma ɖɛ gbà nyuɛ dyi ɖe mìɔ.”

⁸ Ké Bounɓoɔ̀ kpa wuɖu dyúa ɖe, ké ɔ ɖá, “Ɓě fòìn wé kɔ̃̀ ɓaɖa ní mu dyí sɔ̀ùn, ɓɛ́ ḿ ké ɓóɖó-dù ɓěɔ̀ zaa dúún wáɖáa. Ḿ ɖǎa dyí sɔ́, ɓɛ́ ḿ ké ɓóɖó-dù séín ɓěɔ̀ dyí poìn, ɓɛ́ ḿ ké ní dyoɖo ku wɔ̃ɔ̀ wa kɔ̃ púè. Ké ní dyoɖo nɛɛ̀-nɛɛ̀ɔ̀ mu ɓóɖó-kpà gànáɔ̀ mú gbɔɔ̀ùn.

⁹ “Sɔ̀ìn ɓóɛ gboɛɛ ní, ní mu nyɔ ɓěɔ̀ wuɖu ɓěɔ̀ gbo zĩàìn, ɓɛ́ ḿ ké wa wuɖu sɛ́ɖɛ́ìn dyí nyí, ɓɛ́ wa séín ké mɔ̄ Bounɓoɔ̀ ɓiè ɖé hwòɖǒ dyúáɖò mú, ɓɛ́ wa ké ní kũ̀à nyu.

¹⁰ Ké sɔ̀ìn ɖé Kúsì-ɓòɖòɔ̀ ní ɓěɔ̀ ɖeín vɛ̃in nyɛɛ, ní ɓiè-nyɔ̀ ɓě mɔ̀à ní nyɔ ɓě gbɛ̀ìn ma kà dyiɛɛ mu ɖé ní nyíí-ɖɛ̀ ɓě zàùn, ɓɛ́ wa kéɛ ḿ gbo dyà.

¹¹ Ɓó tia ɓaɖaa, ɓě mɔ̀à ní nyɔ ɓěɔ̀ kɛɛ, dɛ̃ se ɓě nyuɛ́ mu ɖe ɓó ní wuɖu ɓɛ́ ɓě jaɖa ma mú kĩ́ín nyɛɛ jè. Sepóɛɖé ní mu nyɔ ɓě ɓúáìn kà wa mìɔùn dyíɛɛ ɓó hwìǐ zàùn, ké ɓě se ɓě mìɔùn dyí ɓúáǐn mu ɖe ɖé ní toɖo hwɛ̀ǐn-hwɛ̀ǐnɔ̀ dya.

¹² Ní mu gǎ-dyé-nyɔ̀ ɓě ɓɛ́ wa dyàà wa mìɔùn ɓíɖíiɛɛ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú sèìn. Wa mɔ̀ nyɔ ɓě pèɖèàìn to ɖé ḿ gboɛ.

¹³ Ké nyɔ xwéɖé wè muà Éézùɖùɛ̀-ɓòɖòɔ̀ kɔ̃ sèìn nyɛɛ se ɖɛ gbà ɖò nyuɛ́ mu. Wa se se ɖò tɔ́mɔ́ɔ mu, mɔɔ ké nyɔ-cá-wùɖù ɖò se wa wĩín sɔ̀ɔ̌ mu. Wa mu ɖɛ ɖiìn, ɓɛ́ wa ké dyi pɛ̃́, ké nyɔ ɖò se wa fã̀àǔn poɛ́ mu.”

Múà-wɛ̀ɖɛ̀

¹⁴ Éézùɖùɛ̀-nyɔ̀ ɓě, ɓě ɓeɖe, ɓɛ́ ɓě ké múà-kùɖǔ-kuɖu nyu. Ɓě mɔ̀ nyɔ ɓě nìà Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ mɛ kpá múàǔn hwòɖǒɛ̀-ɖé-hwɛ̀-kà.

¹⁵ Bounɓoɔ̀ ɖǎ ɓěɛ̀ gǎ-dyé-dyéɔ̀ ɓɔ́í po, ké ɔ ɖǎ ɓěɛ̀ mú-nyɛ́-nyɔ̀ ɓěɔ̀ ɓě ɖei kúmú. Bounɓo mɔ̀à Éézùɖùɛ̀-ɓòɖòɔ̀ kã́áɔ̀ kɛɛ nìǒ ɓě gbo, ké ɓě se ɖɛ gbà ɖòɛ̀ fã̀à peɖeɛ́ mu ɖe.

¹⁶ Wé ɖò nì dyiɛń, ké wa muɛ Jùɖúsɛ̀ɖɛ̀ìn-hwɔ̀ɖɔ̀ɔ̀ nyɔ ɓěɔ̀ gbo cɛ̃ìn, ɓɛ́ wa ké níiń, “Zádyɔún-nyɔ̀ ɓě, ɓě ɓɔ́ fã̀à peɖeɛ. Hwòɖǒ mɛ ɓɔ́ ɓě xwíníín dyi ɓaɖaa.

¹⁷ Bounɓo mɔ̀à ɓěɛ̀ Gèɖèpɔ́ɔ̀ kɛɛ nìǒ ɓě gbo, ké ɔ mɔ̀ gàa-zà-nyɔ̀ ɓɛ́ ɔ nyuɛ ké ɓě dyi to ɖuɛ. Bounɓoɔ̀ hwòɖǒ mu ɓě múin dèìn, ké dyììn ɖé ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ múɛɛ, ɔ mu ɓě fɛ̀ɛ̀ ɖie nyíìn. Bounɓoɔ̀ mu ɓě jè múàǔn kpáùn, ɓɛ́ ɔ ké ɓeɖe, kà nyɔ nyuà múàǔn kpáa ɓó hwɔ kɔ̃ kɛ.”

¹⁸ Bounɓoɔ̀ ɖá, “Ḿ ɖǎ ɓěɛ̀ gǎ-dyé-dyé ɓěɔ̀ ɓɔ́í po, ké ḿ ɖǎ ɓě dɛ̃-ɖɛ̀ ɓěɔ̀ bũ̌in zà.

¹⁹ Ɓě gmɔ̀ nɔ̄, wé ɖò nì dyiɛń, ké ní mu nyɔ ɓě mɔ̀à ɓě gǎ-dyéìn-nyɔ̀ ɓěɔ̀ kɛɛ gǎ kɔ̃ tòùn. Ní mu dyí-kɔ́-nyɔ̀ ɓěɔ̀ póìn, ké ní mu nyɔ ɓě gbɛ̀ìn kà dyiɛɛ wa ɓíɖí ɖe dyàùn. Ké ní mu waà dɛ̃-ɖɛ̀ɔ̀ gbo zĩàìn, ɓɛ́ ɔ ké waà dya-dè-dè jǔ, ké ɓóɖó-kpàà nyɔ séín mu wa ɓàìn.

²⁰ Wé ɖò nì dyiɛń, ké ní mu ɓěɛ̀ nyɔ ɓě gbɛ̀ìn kà dyiɛɛ wa ɓíɖí ɖe dyàùn, ké ní muɛ nyuùn ɓɛ́ ɓěɛ̀ nyɛ́nɛ́ ké mu ɖé ɓóɖó-kpàɔ̀ dà séín, ɓɛ́ ɓě ké mú zaìn ɖe. Mɔ̄ Bounɓoɔ̀ mɔ̀ nyɔ cɛ̃à kɛ̀.”