Zɛ́kɔ̀wáɖádyà 14 - Ɓǎsɔ́ɔ̀ Báɓòɔ̀

Jùɖúsɛ̀ɖɛ̀ìn-hwɔ̀ɖɔ̀ɔ̀ kè ɓóɖó-dù ɓěɔ̀ jè

¹ Gmɔ̀ nɔ̄, Bounɓoɔ̀ ɖǎ wé ɖò dyi dè, ɓɛ́ ɓěɛ̀ mú-nyɛ́-nyɔ̀ ɓěɔ̀ ké ɓě hwu. Ké wa mu hwu-ɖɛ̀ ɓě ɓɛ́ wa zà ɓě xwaiɛɛ geìn ɓó ɓě dyéɖé waí.

² Ɔ mu ɓóɖó-dù séín ɓěɔ̀ dyí poìn, ɓɛ́ wa ké Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ dyà. Ké wa mu hwɔɖɔɔ̀ dyí ɖúùn, ké wa mu hwɔɖɔɔ̀ gbǒ ɓěɔ̀ hwuùn, ké wa mu màa ɓěɔ̀ ganaún kpɔ̃̀ìn. Nyɔ ɓě nì hwɔɖɔɔ̀ múɛɛ fáún-fáún mu to-xwàɖàǔn muùn ɖé ɓóɖó-dù kà kò ɖò kɔ̃. Kɛɛ nyɔ tɔ̀ɔ̀ ɓě sè ɓóɛɛ, wa se wa hwɔɖɔɔ̀ mú zàǎ mu.

³ Sɔ̀ìn ɓóɛ gboɛɛ, nìí, Bounɓoɔ̀ mu muùn, ɓɛ́ ɔ ké ɓóɖó-dù ɓěa gbo vɔ̃ kà ɔ nyuɛ zɔ̃̌ɔ̀ kà nyuɛ kĩ́ín nyɛ.

⁴ Ɓó wéa ɓaɖaa, ɔ mu ɖé Ɔ́ɖè-tòɖò ɓɛ́ ɔ nìà ɓó Jùɖúsɛ̀ɖɛ̀ìn-hwɔ̀ɖɔ̀ɔ̀ dyóɖó-xwáɖáún-wóɖóìn-naín nyɛɛ dya dyi nyànàùn. Ké Ɔ́ɖè-tòɖòɔ̀ mu mú fáùn sɔ̀ìn ɖé dyóɖó-xwáɖáún-wóɖóìn-naín muà ɖé dyóɖó-dyi-kpáìn-naín nyɛ. Ké toɖoɔ̀ mu wáká sɔ̃́ ɓéɖéìn, ké bɔɔ-kpà vɛ̀nɛ̀ ɖò mu ɓó wa pṹa nììn. Toɖoɔ̀ wáká ɖò mu ɖé xwía dyí hwɔùn, ké wáká ɖò mu ɖé zɔ̃̌in dyí hwɔùn.

⁵ Ké ɓě mu bɔɔ-kpà ɓɛ́ ɔ geà toɖoɔ̀ múɛɛ xwíníín sèìn, ɓɛ́ ɓě ké xwáɖáún kpá kà ɓě ɓǎ nììn ɓǎ ɓěɔ̀ nyuɛ zɔ̃̌ɔ̀ kà ti ɓɛ́ ɓóɖó-kpàà túò zɔ̃̌ɔ̀ kà dyi ɖé Kã́á Dyùzíà mɔ̀ ma kà Júɖà-kã̀ǎɔ̀ kɛɛ nììn tiín nyɛ. Ké Bounɓo mɔ̀à ní Gèɖèpɔ́ɔ̀ kɛ kè ɔ ínjà séín ɓěɔ̀ mu dyiìn.

⁶ Ɓó wéa ɓaɖaa, sɔ̃̀ɔ̀ ɖò se dyiɛ́ mu, mɔɔ ké sɔ̃̀ɔ̀-kpò ɖò se wáɖáa mu.

⁷ Ɔ mu wé ɓɛ́ ɔ mu dyúa kánáá pū kɛɛ jǔùn. Nyɔ ɖò se wéɔ̀ kè máaún zaìn gboi dyuòɛ̌ mu, sepóɛɖé ce mu fɔ̀nɔ̀ùn ɓó hwìo. Bounɓoɔ̀ ɖòùn dyuò tiɔ̀ dyí.

⁸ Ɓó wéa ɓaɖaa, nyɔ-fɛ̀ɛ̀-nyí-nì ɖò mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú sɔ̀ùn. Ɔ ɖɔ́ ɖò mu ɖé Tɔ̃́ Dòùnɓìǎɔ̀ gbo dú pòìn, ké ɔ ɖɔ́ tɔ̀ɔ̀ mu ɖé Mɛ́ɖɛ̀tɔ̀wéɖénìà-dyòǒɔ̀ gbo dú pòìn. Níɔ̀ se maá mu. Ɔ mu ziɛń nììn kánáá pū ɓó dyóɖó-bà-tìǐn ɔ kè ɓó ní-ɖaɓa-tìǐn.

⁹ Ɓó wéa ɓaɖaa, Bounɓoɔ̀ mu ɓóɖó-kpà gànáà wuɖuí kɔ̃̀ùn. Bounɓoɔ̀ ɖòùn mu Gèɖèpɔ́ɔ̀ jǔùn, ké ɔ ɖòùn kɔ̃̀ nyɛ́nɛ́ wa mu dyuòùn.

¹⁰ Ɓóɖó gàná ɓɛ́ ɔ síìn ɖé Géɓà-hwɔ̀ɖɔ̀ɔ̀ wĩín ké ɔ nyini ɖé Wíɖímɔ̀-hwɔ̀ɖɔ̀ nìà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ zɔ̃̌in nyɛɛ wĩín nyɛɛ mu bɔɔ-kpà jǔùn. Kɛɛ Jùɖúsɛ̀ɖɛ̀ìn-hwɔ̀ɖɔ̀ɔ̀ mu ɖé toɖoɔ̀ dya nììn ɖé ɔ nììn páɔ̀ mú. Jùɖúsɛ̀ɖɛ̀ìn-hwɔ̀ɖɔ̀ɔ̀ páɔ̀ mu ɖé Bɛ̃́címà-gmɔ̀-wɔ̃̀ɔ̀ gbo sɔ̀ìn, ɓɛ́ ɔ ké ɖé gmɔ-wɔ̃̀ ɓɛ́ wa ɖáìn Kĩ́ín-Kĩ́ín-gmɔ̀-wɔ̃̀ kɛɛ gbo nyini, ké ɔ mu ɖé Gã-Kɔ̃-gmɔ̀-wɔ̃̀ɔ̀ gbo sɔ̀ìn, ɓɛ́ ɔ ké ɖé hwɔɖɔ-dyí-gmɔ̀ìn-gbò ɓɛ́ wa ɖáìn Hànánèò kɛɛ gbo nyini, ké ɔ mu ɖé kã́áɔ̀ géɖéè-mú-píníìn-naín ɓěɔ̀ sèìn.

¹¹ Nyɔǔn-dyù mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú cĩ́ìn ɖé gìɖìǐ mú, ké nyɔ ɖò se hwɔɖɔɔ̀ mú gbɔɔ̌ mu ɖe sɔ̃̀ùn.

¹² Ké wɛ́ vɛ̀nɛ̀ ɓɛ́ Bounɓoɔ̀ mu nyɔ ɓě ɓɛ́ wa mu Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ dyàùn wɛ̃ɛ kɔ̃ tòùn wɛ̃ɛ kɛà kɛ̀. Wa se mɛ́ɛ mu, ké wa mu zɔ̃̌ùn. Waà dyéɖé-ɓò ɓěɔ̀ mu wa dúi ɖeìn, ké waà miɔ mu wa wĩín dyi zɔ̃̌ùn.

¹³ Ɓó wéa ɓaɖaa, Bounɓoɔ̀ muɛ nyuùn ɓɛ́ fã̀à ké nyɔ ɓě muà Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃ dyàùn wɛ̃ɛ nyu mìɔ, ké fã̀àɔ̀ muɛ nyuùn ɓɛ́ wa ké gbo vɔ̃ìn vɔ̃̀ìn.

¹⁴ Ké Júɖà-nyɔ̀ ɓěɔ̀ mu Jùɖúsɛ̀ɖɛ̀ìn-hwɔ̀ɖɔ̀ɔ̀ jè vɔ̃ùn. Ké wa mu ɓóɖó-dù séín ɓě nìà ɓó wa ɖeiɛɛ kɔ́mɔ́-ɖɛ̀ ɓěɔ̀ dyí poìn. Ɔ mu góò kè séɓàɖà ɔ kè mú-po-ɖɔ̀ kúɖúú jǔùn.

¹⁵ Ké wɛ́ nyìnììn dyíin dyúáɖò muà Jùɖúsɛ̀ɖɛ̀ìn-hwɔ̀ɖɔ̀ɔ̀ gbo-vɔ̃-nyɔ̀ ɓěɔ̀ kpɔ̃ùn wɛ̃ɛ mu waà sǒ ɓěɔ̀ kè sǒ-nì-gbu-kɔ̃ún ɓěɔ̀ kè jǎkasì-dù kò-kò ɓěɔ̀ ɔ kè nimii tɔ̀ɔ̀ séín ɓě ɓɛ́ wa mu ɖé waà jàɖàìn-hwɔ̀ɖɔ̀ ɓěɔ̀ mú ɓéɖéìn nyɛɛ kpɔ̃ùn ɖekè.

¹⁶ Ɔ ɖǎ ná nìǐn, nìí, ɓóɖó-dù kà kò ɖò ɓěɛ̀ nyɔ séín ɓě ɓɛ́ wa muà Jùɖúsɛ̀ɖɛ̀ìn-hwɔ̀ɖɔ̀ɔ̀ gbo vɔ̃ùn, ké wa mu ɖɛ gbàɔ̀ xwaún póùn wɛ̃ɛ, wa mu Bounɓo mɔ̀ kã́á mɔ̀ nyɔ nìà ɖɛ séín kɔ̃in nyɛɛ ɓièɛ̌ muùn zɔ̃ séín xwíníín ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa mu Ɓeè-Dyù-hwɔ̀ɔ̀ paùn ɖekè.

¹⁷ Ké ɓóɖó-dùɔ̀ nyɔ mɔ̀ nyɔ ɓɛ́ ɔ se ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú muɛ́ mu, ɓɛ́ ɔ ké Bounɓo mɔ̀ kã́á mɔ̀ nyɔ nìà ɖɛ séín kɔ̃in nyɛɛ ɓièɛɛ, ní ɖò se ɖé ɓóɖóɔ̀ kɔ̃ ɖaɓaá mu.

¹⁸ Ɔ jǔ ké Íjè-nyɔ̀ ɓěɔ̀ se mu, ɓɛ́ wa ké Bounɓoɔ̀ ɓiè ɓó Ɓeè-Dyù-hwɔ̀ɔ̀ tiín ní, nìí, wɛ́ ɓɛ́ Bounɓoɔ̀ mu nyɔ ɓě ɓɛ́ wa nɔ́ɔ̀ ɔ ɓiè jè gboɛɛ kɔ̃ tòùn wɛ̃ɛ, ɔ muɛ wa mɔ̀ùn kɔ̃ tòùn ɖekè.

¹⁹ Kǎà gǎ mu Íjè-ɓòɖòɔ̀ kè ɓóɖó-dù tɔ̀ɔ̀ séín ɓě ɓɛ́ wa se Ɓeè-Dyù-hwɔ̀ɔ̀ pa kɛɛ kɔ̃ dyiìn nyɛɛ jè nyu nìɛ̀.

²⁰ Ɓó wéa ɓaɖaa, ɖɛ wa mu kpee ɓě ɓɛ́ wa ɓá sǒ ɓěɔ̀ dyíɛɛ kɔ̃ céèìn nyɛɛ mɔ̀, “Ɖɛ nìà kɛ kpá wáká ɓó Bounɓoɔ̀ bìì.” Ké jìà ɓě nì ɖé Bounɓoɔ̀ gbǒɔ̀ múɛɛ mu mú hwɛ̀ìn kà gbòɖòò ɓě nìà ɓó sáa-kɔ̃-zàìn-gbààɔ̀ dyúa kɛɛ nìà kɛ,

²¹ hwɛ̀ po níiń, jìà séín ɓě ɓɛ́ wa nì ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Júɖà-ɓòɖòɔ̀ kɔ̃ɛɛ mu wáká kpáùn ɓó Bounɓo mɔ̀ nyɔ nìà ɖɛ séín kɔ̃in nyɛɛ bìì, nìí ɓɛ́ nyɔ kã̀ìn séín ɓě ɓɛ́ wa dyi sáa zàùn wɛ̃ɛ ké jìà ɓěɔ̀ mú sáa-zàìn-ɖɛ̀ɔ̀ suaɖɛ̀ɔ̀ pĩ̀ìn. Ké ɓó wéa ɓaɖaa, ɖɛ-peɖe-nyɔ̀ ɖò se ɖé Bounɓoɔ̀ gbǒɔ̀ mú nìɛ̌ mu ɖe.