Zɛ́kɔ̀wáɖádyà 13 - Ɓǎsɔ́ɔ̀ Báɓòɔ̀

¹ Bounɓoɔ̀ cɛ̃ɛ ɖe, ké ɔ ɖá, “Ní-dù ɖò mu wɔ̃ kaàùn ɓó wéa ɓaɖa, ɓó Dèɓéɛ̀ gbǒ-xwíníínɔ̀ kè Jùɖúsɛ̀ɖɛ̀ìn-nyɔ̀ tɔ̀ɔ̀ ɓěɔ̀ bìì, ɓɛ́ ɔ ké wa mú hwɔ sɔ̀ìn ɖé waà nàmàǔn ɓěɔ̀ kè waà se-mú-hwɛ̀-ɖɛ̀ ɓěɔ̀ mú.

² Ké ɓó wéa ɓaɖaa, ní mu kũùn-kpò ɓěɛ̀ nyɛ́nɛ́ ɖé ɓóɖóɔ̀ kɔ̃ dyi sámáùn, ké wa jè se nyɔ ɖò hwìɖǐi dyiɛ́ mu ɖe sɔ̃̀ùn. Ké ní mu nyɔ ɓě ɓɛ́ wa ɖáìn wa mìɔùn kpáá-ɖɛ̀-cɛ̃-nyɔ̀ɛ kè zùù gbà ɓě ɖé ɓóɖóɔ̀ kɔ̃ dyi zàùn.

³ Ɔ jǔ ké nyɔ ɖò dyi ɔ mìɔùn kpáá-ɖɛ̀-cɛ̃-nyɔ̀ ɖáìn ní, nìí, ɔ ɖe kè ɔ ɓǎ ɓɛ́ wa wóɖóìn ɔ kɛɛ mɛ cɛ̃ɛ ɔ gbo, ɓɛ́ wa ké níiń, ‘M̀ ɓéɖé m̀ ké mɛ́, sepóɛɖé m̀ nì se tɔ́mɔ́uń ɖé Bounɓoɔ̀ nyɛ́nɛ́ mú.’ Ti ɔ mu kpáá-ɖɛ̀ ɖò cɛ̃ìn nyɛɛ, nìí, ɔ ɖeɔ̀ kè ɔ ɓǎɔ̀ mɛ sṹ ɔ gàsíà mú, ɓɛ́ ɔ ké mɛ́.

⁴ Ɓó wéa ɓaɖaa, dɛ̃ mu kpáá-ɖɛ̀-cɛ̃-nyɔ̀ ɓěɔ̀ ɖò-ɖò nyuùn ɓá dyí-tɛ̀mɛ̀ìn-ɖɛ̀ ɔ dyéɛɛ jè dyí. Ké ɔ se nimii-kùɖùù mɔ̀ kpáá-ɖɛ̀-cɛ̃-nyɔ̀ɛ̀ mú-po-ɖɔ̀ɛɛ mú poɛ́ mu, ɓɛ́ ɔ ké nyɔǔn cá.

⁵ Kɛɛ ɔ muɛ cɛ̃ìn, ɓɛ́ ɔ ké níiń, ‘Ḿ se kpáá-ɖɛ̀-cɛ̃-nyɔ̀ ɖò. Ḿ mɔ̀ ɖɛ-ɓá-nyɔ̀, sepóɛɖé ɖɛ-ɓá-ɓá mɔ̀ ní kũ̀à sɔ̀ìn ɖé ní dyú-tìǐn.’

⁶ Ɔ jǔ ké nyɔ ɖò dyi ɔ dyi diè, ké ɔ dyi níiń, ‘Ɖɛ́ kɔ̃̀ jě ɓě nìà m̀ bũ̌ kɛ́?’ nìí, ɔ muɛ cɛ̃ìn, ɓɛ́ ɔ ké níiń, ‘Nyɔ ɖò puà ma ḿ ti ɓɛ́ ḿ nì ma ɖé ḿ ɓǎto ɓěɔ̀ ɓíɖí-taún wɛ̃.’ ”

Gèɖèpɔ́ɔ̀ ɓáɖáá-dyí-gmɔ̀-nyɔ̀ɔ̀ ɖáɓá-wùɖù ɓɛ́ wa tò kɛ

⁷ Ké Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Gàsíà wè, sɔ̀ dyí, ɓɛ́ m̀ ké ní ɓáɖáá-dyí-gmɔ̀-nyɔ̀ mɔ̀ nyɔ ɓɛ́ ɔ xwɛ̃́ìn ḿ bũ̌in nyɛɛ gbo vɔ̃. Ɖáɓá ɓáɖáá-dyí-gmɔ̀-nyɔ̀ɔ̀, ɓɛ́ ɓáɖáá ɓěɔ̀ ké dyi gbɛ̀ìn. Ɔ ɖǎ ná nìǐn, nìí, ní mu ɓáɖáá-dyù ɓěɔ̀ sɔ̃ kɔ̃ pɛ̃́ìn.

⁸ Ní mu nyɔ séín ɓě ɓɛ́ wa nì ɖé ɓóɖóɔ̀ kɔ̃ɛɛ wáká tã mú geìn, ké ní mu wáká sɔ̃́ ɖáɓáùn, ɓɛ́ wáká dyúáɖò ké ɓó sè.

⁹ Ké ní mu nyɔ ɓěɔ̀ wáká tã nììn sèà ɓíɖíiɛɛ dyéɖé poùn, ɓɛ́ ḿ ké wa zɛ̀nɛ̌ mú zà kà nyɔ poà séɓàɖà kè góò dyéɖé ní, nyɔ dyià wa zɛ̀nɛ̌ mú zà kɛ. Wa mu ḿ ɖáùn, ké ní mu wa gɔ̃̌ jǔùn. Ní muɛ cɛ̃ìn, ɓɛ́ ḿ ké níiń, ‘Wa mɔ̀ ní nyɔ ɓě.’ Ké wa mɔ̀ùn muɛ cɛ̃ìn, ɓɛ́ wa ké níiń, ‘Bounɓoɔ̀ mɔ̀ à Gèɖèpɔ́ɔ̀.’ ”