Zɛ́kɔ̀wáɖádyà 11 - Ɓǎsɔ́ɔ̀ Báɓòɔ̀

Wuɖuí-kɔ̃̀-kpè ɓěɔ̀ ɓíɖíi-dyi-kpá-kpá

¹ Ɖɛ́ɓèɖɔ́ùn-ɓòɖò wè, kaà nì ɓóɖó gànáɔ̀ dyí, ɓɛ́ nyɛ ké nì síɖà-cù-gɔ̃̀ ɓěɔ̀ fɔ̃.

² Pã́ìn-cù ɓě, ɓě vĩ̌, sepóɛɖé síɖà-cù ɓěɔ̀ ɖǎ ɓuɖu. Cu kpa ɖɛ ɓěɔ̀ ɖǎ mú gbɔɔ̀. Óò-cù ɓě, ɓě nìà ɖé Básàùn-ɓòɖòɔ̀ kɔ̃ɛɛ, ɓě vĩ̌, sepóɛɖé wa ɖǎ xwáɖá-kpòò kuún-kuúnɔ̀ ɖaɓa.

³ Ɓě tò ɓáɖáá-dyí-gmɔ̀-nyɔ̀ ɓěɔ̀ kpé-po-wùɖùɔ̀ ɖùǔ gbo, sepóɛɖé waà dĩ́ín-dĩ̀ìnɔ̀ ɖǎ mu. Ɓě tò ganìǎ ɓěɔ̀ kuɖu-wùɖùɔ̀ ɖùǔ gbo, sepóɛɖé Jɔ́nì-nìɔ̀ xwáɖá-kpòòɔ̀ ɖǎ dyi wáɖá.

Ɓáɖáá-dyí-gmɔ̀-nyɔ̀ sɔ̃́ ɓěɔ̀ jè

⁴ Ké Bounɓo mɔ̀à ní Gèɖèpɔ́ɔ̀ kɛɛ cɛ̃ɛ ma ḿ gbo, ké ɔ ɖá, “Mu, ɓɛ́ m̀ ké ɓáɖáá ɓě ɓɛ́ wa ɖǎ wáká kpá ɓó ɖáɓá jèɛɛ dyí-gmɔ̀-nyɔ̀ jǔ.

⁵ Nyɔ ɓě ɓɛ́ wa dɔ̃ wa kɛɛ ɖáɓá wa, ké wa seɛ gǎ ɖò dyí dyé. Ké nyɔ ɓě ɓɛ́ wa peɖe wa kɛɛ ɖá, ‘À po Bounɓoɔ̀ zùo. À ɖǎ bã.’ Ké ɓáɖáá ɓěɔ̀ mìɔùn nììn dyí-gmɔ̀-nyɔ̀ ɓěɔ̀ se wa wìǐn dyé dyɛ mɔ̀ùn.

⁶ Kà dyúáɖòɔ̀ kǎà ɔ nyu nìɛ̀ ɓá ní nyɔ ɓěɛ̀ jè dyí. Ḿ se nyɔ ɓě nìà ɓóɖóɛ̀ kɔ̃ cĩ́ɛń nyɛɛ wìǐn dyéɛ mu ɖe. Gmɔ̀ nɔ̄, ní mu nyɔ ɖò-ɖò séín ɔ mǔè ɖò kè ɔ kã́áɔ̀ xwáɖáún zàìn, ké wa mu wa mìɔùn nììn ɓóɖóɔ̀ mú gbɔɔ̀ùn, ké ḿ se nyɔ ɖò póɛ̌n mu.”

⁷ Ɔ jèɛɛ, ḿ mɔ̀ ma ɓáɖáá ɓě ɓɛ́ wa ɖǎà wáká kpá ɓó ɖáɓá jèɛɛ dyí-gmɔ̀-nyɔ̀ ɓó waà kɔ̃̀-nyɔ̀ ɓěɔ̀ bìì. Ké ḿ ɖú ma kùì-kpà sɔ̃́ dyí, ké ḿ jǔìn ma wa nyɛ́nɛ́. Ɖòɛ̀ nyɛ́nɛ́ mɔ̀ Jĩ́á-Jè, ké ɖòɛ̀ nyɛ́nɛ́ mɔ̀ Gbo-Kpɔ̃ìn-Kpɔ̃ìn. Ké ḿ gmɔ̀ ma ɓáɖáá ɓěɔ̀ dyí.

⁸ Dɛ̀nɛ̀ ɖò ɖá ɔ kéá jɛ̀ɖɛ̀ɛ, ḿ se ma ɓáɖáá-dyí-gmɔ̀-nyɔ̀ tã ɓě ɓɛ́ ḿ kè wa nì ma ɓáɖáá ɓěɔ̀ dyí gmɔ̀ǔn wɛ̃ɛ kpeɖe hwìɖǐi kùɛ̀n ɓɛ́ìn ɖe, ké wa nyɛ́ ma ḿ mú. Ɔ jèɛɛ, ḿ zà ma wa kũ̀à kɔ̃ún.

⁹ Sɔ̀ìn ɓóɛ gboɛɛ, ḿ cɛ̃ɛ ma ɓáɖáá ɓěɔ̀ gbo, ké ḿ ɖá, “Ḿ se ɓěɛ̀ dyí-gmɔ̀-nyɔ̀ jǔɛ mu ɖe. Ɖɛ ɓéɖé ɔ ké mɛ́ɛ mɛ mɛ́, ké ɖɛ ɓéɖé ɔ ké mú gbɔɔ̀ kɛɛ mɛ gbɔɔ̀ mú. Ké nyɔ ɓě sè ɓóɛɛ mɛ taìn tàìn.”

¹⁰ Ké ḿ ɖú ma ní kùì-kpà kɔ̃̀ nyɛ́nɛ́ mɔ̀à Jĩ́á-Jèɛɛ dyí, ké ḿ jaɖaa kpó, ɓɛ́ ɔ ké dèè-wùɖù nì ma kà ɓó ḿ kè nyɔ séín ɓěɔ̀ pṹa kɛɛ ɓó dyi gbaà.

¹¹ Ké dèè-wùɖù nì ma ɓó ḿ kè nyɔ ɓěɔ̀ pṹa kɛɛ gbaà ma ɓó dyi ɓó wéa ɓaɖa. Ké ɓáɖáá ɓěɔ̀ kɔ̃̀-nyɔ̀ ɓěɔ̀ dè ma ní nyuu-ɖɛ̀ ɓěɔ̀ dyéɖé gbo, ké wa wɔ̃́ɔ ma múin kà Bounɓoɔ̀ mɔ̀ nyɔ nì ma kà ḿ mú wùɖùɛ̌n nyɛ̀.

¹² Hwɛ̀ ké ḿ cɛ̃ɛ ma wa gbo, ké ḿ ɖá, “Ɓěɛ̀ hwòɖǒ dyi wɔ̃́ ní, ɓě pɛ́ɛ̀ ḿ, kɛɛ ɓěɛ̀ hwòɖǒ se wɔ̃́ ní, ɓě ɓɔ́ɔ náa nyuɛ.” Ké wa pɛ́ɛ̀ìn ma ḿ séɓàɖà-cɛ̀kò kpáɖá-nyɔ ɓaɖa-bùè ɖòùn nyɛ̀nɛ̀ɛ̀.

¹³ Ké Bounɓoɔ̀ cɛ̃ɛ ma ḿ gbo, ké ɔ ɖá, “Poɛ ɖéɛ ní gbǒɔ̀ wíɖí-dyi-dèìn-naínɔ̀.” Ɔ jèɛɛ, ḿ ɖú ma séɓàɖà-cɛ̀kò kpáɖá-nyɔ ɓaɖa-bùèɔ̀ dyí, ké ḿ poɛ ɖéɛ Bounɓoɔ̀ gbǒɔ̀ wíɖí-dyi-dèìn-naínɔ̀. Ɖɛ nìà kɛ mɔ̀ wíɖí jĩ̀ kà ɓɛ́ wa ɖá ḿ kpa kɛ.

¹⁴ Hwɛ̀ ké ḿ ɖú ma ní kùì-kpàɔ̀ sɔ̃́ nììn kɔ̃̀ nyɛ́nɛ́ mɔ̀à Gbo-Kpɔ̃ìn-Kpɔ̃ìn nyɛɛ dyí, ké ḿ jaɖaa kpó. Ɖɛ nìà kɛ gbaà ma gbo-kpɔ̃ìn-kpɔ̃ìn nì ma ɓó Júɖà-ɓòɖòɔ̀ kè Éézùɖùɛ̀-ɓòɖòɔ̀ pṹa kɛɛ dyi.

¹⁵ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma ḿ gbo ɖe, ké ɔ ɖá, “Mu, ɓɛ́ m̀ ké ɓáɖáá-dyí-gmɔ̀-nyɔ̀ se kpáná ɖò mú nìɛɛ jǔ.

¹⁶ Gmɔ̀ nɔ̄, ḿ nì ɓáɖáá-dyí-gmɔ̀-nyɔ̀ ɖò dyí sɔ̀ǐn ɖé ɓóɖóɔ̀ kɔ̃, ké ɔ mɔ̀ nyɔ se ɖé ɓáɖáá nì mú gbɔɔ̀ǔn wɛ̃ɛ jè gbo kɔ̃̀ɔ̌ mu, mɔɔ ké ɔ se ɓáɖáá sè xwáɖáún wɛ̃ɛ dyi mɔ́ɔ mu, mɔɔ ké ɔ se ɓáɖáá nì gbùàǔn nàǐn nyɛɛ hwǒòɛ̌ mu, mɔɔ ké ɔ se ɓáɖáá ɓě ɓɛ́ wa wóɖó múɛɛ ɖii-ɖɛ̀ nyíɛ mu. Kɛɛ ɔ mu ɓáɖáá ɓúá-ɓúá ɓěɔ̀ ɖáɓáùn, ɓɛ́ ɔ ké wa tà. Ɔ mu wa bǎ ɓěɔ̀ ɓoún zàùn.

¹⁷ Gboò-wùɖù nì ɓáɖáá-dyí-gmɔ̀-nyɔ̀ se kpáná ɖò mú nìɔ̀ kɔ̃, sepóɛɖé ɔ wã ɓáɖáá ɓěɔ̀ kɔ̃. Gàsíà mɛ kpɔ̃ ɔ sɔ̃ɔ̀ kè ɔ ɖiaún-dyèɖèɔ̀. Ɔ sɔ̃ɔ̀ mɛ mɛ́, ɓɛ́ ɔ ɖiaún-dyèɖèɔ̀ ké múin kpè gàná cá.”