Wuɖufí 4 - Ɓǎsɔ́ɔ̀ Báɓòɔ̀

Bóà kpɔ̃ Wuɖufí dyi

¹ Ɓó tia ɓaɖaa, Bóà sɔ̀ ma dyí, ké ɔ mu ma ɖé hwɔɖɔɔ̀ gmɔ-wɔ̃̀ɔ̀ gbo, ké ɔ kò ma ɓó dyi. Púɛɛ, dúí-sè-nyɔ̀ kɔ̃̀ jè ɓɛ́ ɔ cɛ̃ ma kà Wuɖufí gboɛɛ wóɖó ma xwáɖáún. Ké Bóà cɛ̃ɛ ma ɔ gbo, ké ɔ ɖá, “Ḿ ɓǎto, pàìn dà, ɓɛ́ m̀ ké dya dèɖě.” Ké gàaɔ̀ pàìn ma ɓó, ké ɔ dèɖě ma dya.

² Ké Bóà ɖá ma hwɔɖɔɔ̀ nyɔ vɛ̀nɛ̀ ɓaɖa-bùè, ɓɛ́ wa ké ma dya dèɖě ɓó gmɔ-wɔ̃̀ɔ̀ gbo, ké wa dèɖě ma dya.

³ Ti ɓɛ́ wa ɖǎ ma dya dèɖěɛɛ, ɔ cɛ̃ɛ ma Nìómìɛ̀ dyú-ɓǎà dúí-sè-nyɔ̀ɔ̀ gbo, ké ɔ ɖá, “Nìómì ɓɛ́ ɔ mu ma kà ɖé Móà-ɓòɖòɔ̀ kɔ̃, ɓɛ́ ɔ ɖǎà ɖe dyiɛɛ nì pá ɓɛ́ à ɖíí-gàà mɔ̀à Ɛ̀ɖìmɛ́ɖɛ̀ kɛɛ kɔ̃̀ ma kà kɛɛ peɖeɛń.

⁴ Ɔ jèɛɛ, ḿ nìɛ̀ m̀ gbo cɛ̃iń, ɓɛ́ m̀ kéɛ dɔ̃ dà ɓó à nyɔ vɛ̀nɛ̀ ɓěɛ̀ kè nyɔ ɓě wáɖáà dà dyiɛɛ dyúa. Ɔ jǔ ké m̀ dyiɛ dɔ̃ɔ mɔ́ ní, nìí, m̀ mɛ dɔ̃ɔ. Kɛɛ ɔ jǔ ké m̀ seɛ dɔ̃ɔ mɔ́ ní, nìí, cɛ̃ɛ ḿ gbo, ɓɛ́ ḿ kéɛ dyuò. Sepóɛɖé nyɔ kà kò ɖò se ɓéɖé ɓɛ́ ɔ kéɛ náa nyu, ɔ sèìn m̀ ɖòùn, ké mɔ̄ mɔ̀ nyɔ kɔ ɓó m̀ gbo dyí.” Ké gàaɔ̀ ɖá, “Ní muɛ dɔ̃ùn.”

⁵ Ti ɔ ɖǎa náa cɛ̃ɛ, púɛɛ, Bóà ɖá, “Ti nì mu páɔ̀ Nìómì gbo dɔ̃ùn wɛ̃ɛ, nìí, ɔ xwíníín mɔ̀ m̀ ɖǎ Wuɖufí sɔ̀à Móà-ɓòɖòɔ̀ kɔ̃, ɓɛ́ ɔ mɔ̀à jɔ̌ɔ̀-mààɔ̀ kɛɛ dyí ɖú, ɓɛ́ ɔ ké nì gmàà jǔ ɖekè, ɓɛ́ dyììn ɖéɛ múɛɛ, nyɔ ɖǎà dyi kpáa nyɛ́nɛ́ ké ɔ kɔ̃̀ɔ̀-ɖɛ̀ɔ̀ kɔ̃ún sè.”

⁶ Hwɛ̀ ké gàaɔ̀ ɖá, “Ḿ se páɔ̀ dɔ̃ɔ ɓɛ́ìn, mɔ́ún kɔ̃̀ ɖà níǐn kɔ̃̀ɔ̀-ɖɛ̀ɔ̀ jè kɔ̃in cá. Mɔ̀ mɔ̀ nyɔ mɛ dɔ̃ ɖɛ ɓɛ́ ḿ kéɔ́ kà dɔ̃ɛ. Ḿ seɛ dɔ̃ɔ ɓɛ́ìn.”

⁷ Ɔ nì ná kɛɛ, ɔ jǔ ké Éézùɖùɛ̀-nyɔ̀ ɖò se mɔ́ ɓɛ́ ɔ ké ɔ ɖíí ɖòɛ̀ taà mú sè, ké ɔ dyiɛ nyɔ ɖò nyíɛ mɔ́, ɓɛ́ ɔ ké taàɔ̀ mú sèǐn, nìí, ɔ zà ɔ bǎɔ̀ dyúáɖò ɓoún, ké ɔ nyíɛ nyɔ mɔ́à taàɔ̀ mú sèɛ̀ dyiɛ, ɓɛ́ bǎɔ̀ ké ɔ zàse jǔ.

⁸ Ɔ jèɛɛ, ti ɓɛ́ gàa se ma kà Nìómìɛ̀ páɔ̀ dɔ̃ɔ mɔ́, ɓɛ́ ɔ dyiɛ ma kà Bóà gbo cɛ̃, ɓɛ́ ɔ dyi níiń, “Mɔ̀ mɛ dɔ̃ɔo” kɛɛ, ɔ zà ma ɔ bǎɔ̀ dyúáɖò ɓoún, ké ɔ nyíɛ ma Bóà.

⁹ Hwɛ̀ ké Bóà cɛ̃ɛ ma nyɔ vɛ̀nɛ̀ ɓěɔ̀ kè nyɔ tɔ̀ɔ̀ ɓěɔ̀ gbo, ké ɔ ɖá, “Ɓě mɔ̀ ní zàse ɓó zɛ̃̌ɛ̀ kà ɓɛ́ ḿ nì Ɛ̀ɖìmɛ́ɖɛ̀ kè Kíɖìɔ̀ùn ɔ kè Máɖɔ̀ùn kɔ̃̀ɔ̀-ɖɛ̀ séín ɓěɔ̀ Nìómì gbo dɔ̃uń wɛ̃.

¹⁰ Ɓó kɔ̃in ɖeɛɛ, ḿ nì Wuɖufí mɔ̀à Móà-màà, ɓɛ́ ɔ mɔ̀à Máɖɔ̀ùn jɔ̌ɔ̀-mààɔ̀ kɛɛ dyí ɖúɛń, ɓɛ́ ɔ ké ní gmàà jǔ, ɓɛ́ dyììn ɖéɛ múɛɛ, nyɔ ɖǎà dyi kpáa nyɛ́nɛ́ ké ɔ kɔ̃̀ɔ̀-ɖɛ̀ɔ̀ kɔ̃ún sè, ɓɛ́ ɔ nyɛ́nɛ́ɔ̀ ké se ɔ ɓíɖí-taún kè ɔ nyɔ ɓěɔ̀ hwìɛ̀ sɔ̀. Ɓě séín mɔ̀ ní zàse ɓó zɛ̃̌ɛ̀.”

¹¹ Ké nyɔ vɛ̀nɛ̀ ɓěɔ̀ kè nyɔ tɔ̀ɔ̀ ɓě nì ma kà ɓó gmɔ-wɔ̃̀ɔ̀ gboɛɛ cɛ̃ɛ ma ɔ gbo, ké wa ɖá, “Ǹdye, à mɔ̀ nì zàse. Bounɓoɔ̀ mɛ nyu màa nìà ɖé nì gbǒɔ̀ xwíníín dyiɛń nyɛ ɓɛ́ ɔ ké nì kà Wéɖécà kè Ɖéà ɓɛ́ wa wóɖóìn ma kà Éézùɖùɛ̀ bìì dyú pàɖǎ kɛɛ nìà kɛ. Ké Bounɓoɔ̀ mɛ nyuɛ ɓɛ́ m̀ ké bã ɖé Ɛ́fàɖà-nyɔ̀ ɓěɔ̀ hwìɛ̀, ɓɛ́ nì bɔ̃̌ ké Bɛ́fèɖèhɛ̃́ɛ̀-hwɔ̀ɖɔ̀ɔ̀ dà séín dyi ɓeìn.

¹² Ké dyú ɓě ɓɛ́ Bounɓoɔ̀ mu m̀ kè màa nìà kɛ nyíìn nyɛɛ mɛ nì kà Pɛ́wɛ̀ɖɛ̀ ɓɛ́ Támà kè Júɖà wóɖóìn ma kà kɛɛ dyú ɓěɔ̀ nìà kɛ.”

Bóàà nyúà-dyú deìn dúún ɓěɔ̀

¹³ Sɔ̀ìn ɓóɛ gboɛɛ, Bóà kpɔ̃ ma Wuɖufí dyi, ké ɔ mɔ̀ ma ɔ gmàà. Ké wa nì ma ɓó da, ké Bounɓoɔ̀ nyuɛ ké Wuɖufí nì ma zùù kɔ̃, ké ɔ wóɖóìn ma gàa-dyù ɖò.

¹⁴ Ti ɓɛ́ dyúɔ̀ ɖǎ ma wóɖóɛɛ, màa ɓě nì ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ múɛɛ cɛ̃ɛ ma Nìómì gbo, ké wa ɖá, “À po Bounɓoɔ̀ zùo, sepóɛɖé ɔ se nì jè dyi táà, kɛɛ ɔ ɖǎ m̀ nyúà-dyú ɖò nyí ɓó zɛ̃̌ɛ̀, ɓɛ́ ɔ ké m̀ nyɛ wĩin po. Ɔ nyɛ́nɛ́ mɛ mu nɔ̄ Éézùɖùɛ̀-ɓòɖòɛ̀ kɔ̃.

¹⁵ Nì dyúɛ̀ gmàà ɓɛ́ ɔ ɖɛ̀ɓɛ̀à m̀ mú mìɔ, ké ɔ kpaà ɖɛ ɖé m̀ gbo ké ɔ zià gàa-dyù mɛ̀nɛ̌ìn-sɔ̃́ dyíɛɛ ɖǎ dyú nìà kɛ wóɖóìn. Ɔ mɔ̀ nyɔ mu m̀ fɛ̀ɛ̀ ɖìè nyíìn ɖe, ké ɔ mu m̀ nyɛ wĩin poùn ɖé nì nyɔ-sùà-tìɔ̀ mú.”

¹⁶ Ké Nìómì ɖú ma dyúɔ̀ dyí, ké ɔ gmɛ̀ìn ma ɔ.

¹⁷ Ké ɔ mǔè-màà ɓěɔ̀ ɖá, “Nìómì ɖǎ nyúà-dyú ɖò ɓéɖé.” Ké wa jǔìn ma ɔ Óɓè-nyɛ̀nɛ̀. Óɓè mɔ̀ nyɔ wóɖóìn ma Jɛsé, ké Jɛsé mɔ̀ nyɔ wóɖóìn ma Dèɓé.

¹⁸ Kà Pɛ́wɛ̀ɖɛ̀ɛ̀ xwéɖé-dù deìn dúún ɓěɔ̀ nyu ma nìɛ̀ kɛɛ kɛà kɛ̀. Pɛ́wɛ̀ɖɛ̀ wóɖóìn ma Hɛ́wɔ̀ɖɔ̀ùn,

¹⁹ ké Hɛ́wɔ̀ɖɔ̀ùn wóɖóìn ma Wáɖáùn, ké Wáɖáùn wóɖóìn ma Ámìnáɖà,

²⁰ ké Ámìnáɖà wóɖóìn ma Násɔ̀ùn, ké Násɔ̀ùn wóɖóìn ma Sámɔ̀,

²¹ ké Sámɔ̀ wóɖóìn ma Bóà, ké Bóà wóɖóìn ma Óɓè,

²² ké Óɓè wóɖóìn ma Jɛsé, ké Jɛsé wóɖóìn ma Dèɓé.