Wuɖufí 3 - Ɓǎsɔ́ɔ̀ Báɓòɔ̀

Wuɖufí dyé dyú-ɓǎ

¹ Wé ɖòɛ̀ ɓaɖaa, Nìómì cɛ̃ɛ ma Wuɖufí gbo, ké ɔ ɖá, “Ní mu m̀ bìì dyú-ɓǎ ɖò dyi mɔ́ùn, ɓɛ́ m̀ ké m̀ mìɔùn nììn taún kɔ̃̀.

² Má, Bóà kɔ̃̀ gbo-nì-màà ɓě kɔ̃̀ hwìɛ̀ ɓɛ́ m̀ nyuà kũ̀à kɛɛ mɔ̀ à gbǒ-xwíníín-nyɔ̀ ɓěɔ̀ ɖòe? Gmɔ̀ nɔ̄, ɔ nì báɖè dyí síɛń dyiɛń ɖé ɔ báɖè-dyí-síìn-naínɔ̀ ɓó máaǔn.

³ Ɖɛ m̀ mɛ nyuɛɛ kɛà kɛ̀. M̀ mɛ dèɖè, ɓɛ́ m̀ ké ɖɛ jǔ, ɓɛ́ m̀ ké nì ɖɔ nɔ̀mɔ̀ dyíin mú po, ɓɛ́ m̀ ké ɖé ɔ báɖè-dyí-síìn-naínɔ̀ mu. Kɛɛ mɔ̀ǔn ɖá ɓɛ́ ɔ kéɛ dyuò kà m̀ nì ɖéɛ, ɓɛ́ ɔ ké ɖɛ ɖi ɔ kè ɓɛ́ ɔ ké náa hwɔ hwɛ̀.

⁴ Ti ɔ mu dyi pɛ̃́ìn nyɛɛ, m̀ mɛ dè dɛ̀ ɔ muà dyi pɛ̃́ìn nyɛɛ dyéɖé gbo. Ɔ jǔ ké ɔ ɖǎ nyíɔún kpá ní, nìí, m̀ mɛ mu ɓó ɔ gbo, ɓɛ́ m̀ ké ɔ ɓoɔ̀ ɖɔ kɔ̃in zà, ɓɛ́ m̀ ké ɓó dyi pɛ̃́. Nìí, ɔ mu ɖɛ m̀ ké nyuɛɛ m̀ gbo cɛ̃ìn.”

⁵ Ké Wuɖufí cɛ̃ɛ ma ɔ gbo, ké ɔ ɖá, “Èè, ní mu ɖɛ séín m̀ cɛ̃à ḿ gboɛɛ nyuùn.”

⁶ Ɔ jèɛɛ, Wuɖufí mu ma ɖé báɖè-dyí-síìn-naínɔ̀, ké ɔ nyu ma ɖɛ séín ɓɛ́ ɔ ɖeɔ̀ cɛ̃ ma kà ɔ gboɛ.

⁷ Ti ɓɛ́ Bóà ɖǎ ma ɖɛ ɖi, ké ɔ ɖǎ ma náa, ɔ hwòɖǒ zaìn ma dyi, ké ɔ zi ma ɖé báɖè-zòɖòɔ̀ ɖeín, ké ɔ pɛ̃́ ma dyi. Ti ɓɛ́ Bóà ɖǎ ma dyi pɛ̃́ɛ, Wuɖufí sɔ̀ ma dyí, ké ɔ mu ma nyàà-nyàà, ké ɔ zà ma Bóàà ɓoɔ̀ ɖɔ kɔ̃in, ké ɔ pɛ̃́ ma ɓó dyi.

⁸ Ɓó máaún hwuɖu hwìɛ̀ǐn nyɛɛ, ɖɛ ɖò nyuɛ ké gàaɔ̀ giniìn ma nyíɔún dyi, ké ɔ cɛ́ɛ̀ ma xwa. Púɛɛ, ɔ dyéɛ ma kà ɓɛ́ màa ɖò pɛ̃́ ma ɓó ɔ ɓo gbo dyiɛ.

⁹ Ké Bóà diè ma ɖɛi, ké ɔ ɖá, “M̀ mɔ̀ nyɛ́ɛ̌?” Ké màaɔ̀ jǔ ma ɔ gɔ̃̌, ké ɔ ɖá, “Ḿ mɔ̀ nì gbo-nì-màà Wuɖufí. Wáɖá nì ɖɔɔ̀ máná ɖò ḿ kɔ̃in, sepóɛɖé m̀ mɔ̀ ní dyú-ɓǎà dúí-sè-nyɔ̀ ɓěɔ̀ ɖò.”

¹⁰ Hwɛ̀ ké Bóà cɛ̃ɛ ma ɔ gbo, ké ɔ ɖá, “Bounɓoɔ̀ mɛ po m̀ mana kɔ̃, ní dyú. M̀ ɖǎ Nìómìɛ̀ nyɔ ɓěɔ̀ jǎà gbo nyu ɓó tiɛ̀ mú ké ɔ zi nyɔ m̀ nyu ma kà kĩ́ín nyɛɛ dyí, kà ɓɛ́ m̀ seà gàa-dyù gmɔ̀ ɖò kíɖíí sí kɛbì ɔ mɛ mɔ̀ bã-nyɔ̀ mɔɔ gǎ-dyé-nyɔ̀ kɛ.

¹¹ Ɔ jèɛɛ, ní dyú, nì hwòɖǒ mɛ ɓɔ́ ɓaɖaa. Ní mu ɖɛ séín m̀ zɔ̀à kɛɛ m̀ bìì nyuùn, sepóɛɖé ḿ ɓíɖí-hwɔ̀ɖɔ̀-nyɔ̀ séín ɓěɔ̀ dyuòɛ̀ dyí kà ɓɛ́ m̀ mɔ̀ kpeɖeɛ̀-dyíin-nɔ̀mɔ̀-màà kɛ.

¹² Kàǔn wɛ̃ɛ, ɔ mɔ̀ jǎà kà ɓɛ́ ḿ mɔ̀ nì dyú-ɓǎà dúí-sè-nyɔ̀ ɓěɔ̀ ɖòɛ. Kɛɛ wɛ̃́ɛ́ kɛɛ, nyɔ ɖò nì ɓó ḿ dyúa ɓɛ́ ɔ ké nì dyú-ɓǎɔ̀ dúí sè.

¹³ Zɔ̃ dyi zɔ̃ ní, ní mu ɔ gbo wùɖùùn. Ɔ jǔ ké ɔ dyi mɔ́ ɓɛ́ ɔ ké nì dyú-ɓǎɔ̀ dúí sè ní, nìí, ɔ mɔ̀ ɖɛ sɛ́ɖɛ́ìn dyí. Kɛɛ ɔ jǔ ké ɔ se nì dyú-ɓǎɔ̀ dúí sèɛ̀ mɔ́ ní, nìí, ḿ ɖi wuɖu ɓó Bounɓoɔ̀ dyúa kà ní muɛ náa nyuùn jǎà kɛ. Pɛ̃́ dà dyi ɓɛ́ zɔ̃ ké zɔ̃.”

¹⁴ Ɔ jèɛɛ, Wuɖufí pɛ̃́ ma ɓó Bóàà ɓo gbo, kɛɛ ɔ sɔ̀ ma dyí ɓó zɔ̃ wĩín vɛ̀nɛ̀, sepóɛɖé Bóà cɛ̃ɛ ma náa ɔ gbo kà ɓɛ́ nyɔ ɖò mɛ ɓɔ́ɔ ma dyí dyuòɛ̀ kà ɓɛ́ màa ɖò dyi ma ɖé báɖè-dyí-síìn-naínɔ̀ kɛ.

¹⁵ Ké Bóà cɛ̃ɛ ma ɔ gbo, ké ɔ ɖá, “Soɖo nì ɓaɖa-kɔ̃inɔ̀ dyi.” Ti ɓɛ́ Wuɖufí soɖoɛ ma dyiɛɛ, Bóà púè ma ɖé báɖè-mú-ɖàɓàìn-ɖɛ̀ɔ̀ wé mɛ̀nɛ̌ìn-ɖò, ké ɔ ɖúɛ dyí, ké ɔ dèɛ̀ ma ɔ kɔún, ké Wuɖufí kpaa ma hwɔɖɔún.

¹⁶ Ti ɓɛ́ ɔ nyini ma ɖé ɔ ɖeɔ̀ gboɛɛ, ɔ ɖeɔ̀ diè ma ɔ dyi, ké ɔ ɖá, “À wɔ̃́ ɖée, ní dyú?” Ké Wuɖufí zaìn ma ɖɛ séín Bóà nyu ma ɔ bììɛɛ ɔ ɖeɔ̀ gbo kɔ̃in,

¹⁷ ké ɔ ɖá, “Ɔ nyí ḿ báɖè-mú-ɖàɓàìn-ɖɛ̀ɔ̀ báɖè-wè mɛ̀nɛ̌ìn-ɖò nìà kɛ, ké ɔ ɖá, ‘Ḿ se mɔ́ ɓɛ́ m̀ ké xwa fɔ̀nɔ̀, ɓɛ́ m̀ ké nì dàɔ̀ gbo ɖe kɔ́ìn.’ ”

¹⁸ Hwɛ̀ ké ɔ ɖeɔ̀ cɛ̃ɛ ma ɔ gbo, ké ɔ ɖá, “Ní dyú, ku hwòɖǒ ɓɛ́ m̀ kéɛ dyé ɖɛ mu kpáùn wɛ̃, sepóɛɖé gàaɔ̀ se fɔ̀ɔ̌ mu ɓó zɛ̃̌ɛ̀, ɔ sèìn ké ɔ hwɔ ɖɛ ɓě ɓɛ́ ɔ ɖǎà m̀ nyɛ́nɛ́ín ɖáìn nyɛɛ nyuɛ hwɛ̀.”