Wuɖufí 2 - Ɓǎsɔ́ɔ̀ Báɓòɔ̀

Wuɖufí nyu Bóà ɓíɖí-geɖeín kũ̀à

¹ Ɓó tia ɓaɖaa, Nìómì ɓéɖé ma gbǒ-xwíníín-gàà ɖò kɔ̃̀ nyɛ́nɛ́ mɔ̀ ma Bóà kɛ. Gàaɔ̀ mɔ̀ ma ɔ dyú-ɓǎ Ɛ̀ɖìmɛ́ɖɛ̀ɛ̀ ɖíí, ké ɔ mɔ̀ ma bã-nyɔ̀ vɛ̀nɛ̀.

² Wé ɖòɛ̀ ɓaɖaa, Wuɖufí cɛ̃ɛ ma Nìómì gbo, ké ɔ ɖá, “Ní ɓaà m̀ ní, tòɛ̀ ɓɛ́ ḿ ké ɖé geɖe ɓěɔ̀ gbo mu, ɓɛ́ ḿ ké báɖè-bɛ̃̌ po ɖé nyɔ kɔ̃̀ hwòɖǒ mu ḿ múin dèìn nyɛɛ ɓíɖí-geɖeín.” Ké Nìómì cɛ̃ɛ ma ɔ gbo, ké ɔ ɖá, “Ní dyú-màà wè, mu m̀ kéɛ náa nyu.”

³ Ɔ jèɛɛ, Wuɖufí mu ma, ké ɔ dè ma báɖè-bɛ̃̌ poɛ gbɔ ɖé geɖe ɓěɔ̀ ɖò gbo, ɓó báɖè-cɛ̃-nyɔ̀ ɓěɔ̀ ɖeín. Nyɔ kɔ̃̀ geɖe ɔ mu ma kà gboɛɛ mɔ̀ ma Bóà mɔ̀à Ɛ̀ɖìmɛ́ɖɛ̀ɛ̀ ɖííɔ̀ kɛ.

⁴ Ɓó tia ɓaɖaa, Bóà sɔ̀ ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú, ké ɔ dyi ma ɖé geɖeɔ̀ gbo. Ké ɔ zà ma báɖè-cɛ̃-nyɔ̀ ɓěɔ̀ nyíɔún, ké ɔ ɖá, “Bounɓoɔ̀ mɛ nìǒ ɓě gboo.” Ké wa mɔ̀ùn jǔ ma ɔ gɔ̃̌, ké wa ɖá, “Bounɓoɔ̀ mɛ po mɔ̀ùn mana kɔ̃ ɖekè.”

⁵ Hwɛ̀ ké Bóà diè ma ɔ báɖè-cɛ̃-nyɔ̀ ɓěɔ̀ kɔ̃in-nyɔ̀ɔ̀ dyi, ké ɔ ɖá, “Nyɛ́ kɔ̃̀ màa-dyù gmɔ̀ nìà kɛ kɛ́?”

⁶ Ké ɔ báɖè-cɛ̃-nyɔ̀ ɓěɔ̀ kɔ̃in-nyɔ̀ɔ̀ jǔ ma ɔ gɔ̃̌, ké ɔ ɖá, “Ɔ mɔ̀ Móà-màà-dyù ɓɛ́ ɔ kè Nìómì sɔ̀ ma ɖé Móà-ɓòɖòɔ̀ kɔ̃ɛ.

⁷ Màa-dyùɔ̀ dyiɔ́, ké ɔ dièɔ̌ má ḿ dyi, ké ɔ ɖá, ‘Ní ɓaà m̀ ní, wɔ̃́ ɓɛ́ ḿ ké báɖè-bɛ̃̌ po ɖé nì báɖè-cɛ̃-nyɔ̀ ɓěɔ̀ ɖeín dyi.’ Ɔ jèɛɛ, ḿ wɔ̃́, ké ɔ ɖúɔ́ zɛ̃̌ɛ̀ báɖè-bɛ̃̌ poɛń dyí sɔ̀ìn ɓó gànà-kṹɛ̌n gbo, ɓɛ́ ɔ ké tiɛ̀ dyɛ̀ìn nyɛ. Ɔ sèìn, ɔ muɔ́ má ɖé gbùùɔ̀ xwíɖíi, ké ɔ fɔ̀ɔ̌ má ɖɛ wè nyɛ̀nɛ̀ɛ̀ pū.”

⁸ Hwɛ̀ ké Bóà cɛ̃ɛ ma Wuɖufí gbo, ké ɔ ɖá, “Tò ḿ gbo ɖùǔ, ní dyú. Mɔ̀ǔn ɖá ɓɛ́ m̀ ké geɖe kà kò ɖò gbo báɖè-bɛ̃̌ poɛ́ mu, ɔ sèìn geɖeɛ̀ ɖòùn gbo. M̀ mɛ nì dà ní gbo-nì-màà ɓěɛ̀ gbo.

⁹ M̀ mɛ dè geɖeɔ̀ dɛ̀ ɓɛ́ ní nyɔ ɓěɔ̀ nì báɖè cɛ̃iń nyɛɛ dyéɖé gbo, ɓɛ́ m̀ ké ní màa ɓěɔ̀ kíɖíí sí. Ḿ ɖǎa ní gàa ɓěɔ̀ gbo cɛ̃, ɓɛ́ wa ké se m̀ fũ̀à-fṹá nyùìn. Ɔ jǔ ké ní-ná-tò dyi m̀ nyuín, nìí, m̀ mɛ mu ɖé ní ní-dyàà ɓěɔ̀ gbo, ɓɛ́ m̀ ké ní ɓɛ́ ní gàa ɓěɔ̀ ɖǎà píníɛɛ ɖò ná.”

¹⁰ Ti ɓɛ́ Bóà jaɖa ma wuɖuɛɛ, púɛɛ, Wuɖufí taɓa ma dú hwuɖu, ké ɔ cɛ̃ɛ ma Bóà gbo, ké ɔ ɖá, “Ɓɔ̌ɔ̀, mɔ̄ mɔ̀à ɖíà-màà kɛɛ, ɖɛ́ kɔ̃̀ jè nì hwòɖǒ dèàìn ḿ múin, ɓɛ́ m̀ dyià ḿ dyéɖéín-dyèɖè mú gmɔ̀ìn nyɛ́?”

¹¹ Ké Bóà zà ma ɖé wuɖu, ké ɔ ɖá, “Ḿ ɖǎ ɖɛ séín ɓɛ́ m̀ ɖǎà nì dàɔ̀ dyí nyu sɔ̀ìn ɓó ti nì dyú-ɓǎɔ̀ ɖǎǒ zɔ̃̌ɔ̀ dyi kpáa gboɛɛ jè wɔ̃́. Ḿ ɖǎa wɔ̃́ kà ɓɛ́ m̀ ɖǎ nì ɖe kè nì ɓǎ kè nì ɓíɖí-ɓòɖòɔ̀ dyi táà, ké m̀ ɖǎ à mɔ̀ ɖíà ɓěɛɛ hwìɛ̀ cĩ́ɛń dyiɛ.

¹² Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ mɛ pɛ́ɛ̀ m̀ ɓó ɖɛ séín m̀ ɖǎà nyuɛɛ jè. Bounɓo kɔ̃̀ pìɔ̌-kpà ɓɛ́ m̀ ɖǎà xwíɖíi pèɖèìn nyɛɛ mɛ nyí m̀ pɛ́ɛ̀-ɖɛ̀ dyíín-dyíín.”

¹³ Ké Wuɖufí ɖá, “Ɓɔ̌ɔ̀, m̀ ɖǎ ḿ jĩ́á-jè dyí nyu. Ḿ se ɖɛ kpa ɓɛ́ ḿ kè nì gbo-nì-màà ɓěɔ̀ ɖò ké wɔ̃ ɓɛ́ìn dyɛo, kɛɛ m̀ ɖǎ ní hwòɖǒ dyi dè dyììn ɖé wuɖu ɓě m̀ cɛ̃à ḿ gboɛɛ mú.”

¹⁴ Ti ɓɛ́ ɔ mɔ̀ǎ ma geɖe-hwɔ̀ ɖi-tìɛɛ, Bóà cɛ̃ɛ ma Wuɖufí gbo, ké ɔ ɖá, “Dyi à ké ɖɛ ɖi. Kpɔ̃ bɛɖɛɛ̀ nìà kɛ ɖò dyi, ɓɛ́ m̀ kéɛ cɔ́ɔ́ jã̀ìn-jã̀ìnɔ̀ tóìn.” Ɔ jèɛɛ, Wuɖufí dèɖě ma dya ɓó kũ̀à-nyɔ̀ ɓěɔ̀ hwìɛ̀, ké Bóà nyí ma ɔ gbùǔ. Ké Wuɖufí ɖi ma ɖɛ, ké ɔ ɖoɓo ma, ké ɖii-ɖɛ̀ɔ̀ ɖò sè ma dyi.

¹⁵ Ti ɓɛ́ wa ɖǎ ma ɖɛ ɖiɛ hwɔɛɛ, Wuɖufí mu ma báɖè-bɛ̃̌ poɛń ɖe, ké Bóà po ma ɔ gàa ɓěɔ̀ náún, ké ɔ ɖá, “Ɓě táà ɔ dyi ɓɛ́ ɔ ké báɖè-bɛ̃̌ po ɖé báɖè-jũ̌ ɓěɔ̀ pṹa dyi ɖekè. Ɓěǐn ɖá ɓɛ́ ɓě ké ɔ fũ̀à-fṹá nyùìn.

¹⁶ Ké ɓě mɛ wáɖáìn báɖè-wòɖò ɖíɛ́ ɓě dyi ɓó ɔ bìì, ɓɛ́ ɔ ké wa dyi cɛ̃́. Ɓěǐn ɖá ɓɛ́ ɓě ké ɔ ɓɔ́í po.”

¹⁷ Ɓó wéa ɓaɖaa, Wuɖufí gã̀ ma ɖé báɖè-bɛ̃̌ poɛń dyi tee, ké dyóɖó kpá ma gbɔ. Ké ɔ sí ma báɖè ɓɛ́ ɔ dyé ma kà kɛɛ dyí, ké báɖèɔ̀ ɓɛ́ìn ma gbǎ-wĩín-wè sɔ̃́ jǔɛ.

¹⁸ Ti ɓɛ́ Wuɖufí ɖǎ ma báɖèɔ̀ dyí síɛ hwɔɛɛ, ɔ ɖúɛ ma dyí, ké ɔ kpaa ma hwɔɖɔún. Ké ɔ dàɔ̀ dyé báɖè jĩ̀ kà kɔ̃̀ bɛ̃̌ ɓɛ́ ɔ ɖǎ ma kà poɛ. Ké Wuɖufí nyí ma ɔ ɖeɔ̀ ɖii-ɖɛ̀ɔ̀ nyɔ ɓɛ́ ɔ dè ma dyi, ti ɓɛ́ ɔ ɖǎ ma kà ɖɛ ɖi, ké ɔ ɖǎ ma kà ɖoɓoɛ.

¹⁹ Ké ɔ ɖeɔ̀ diè ma ɔ dyi, ké ɔ ɖá, “Dɛ̌ m̀ poà zɛ̃̌ɛ̀ báɖè-bɛ̃̌ kɛ́? Gèɖèpɔ́ɔ̀ mɛ po nyɔ gmɔ̀àìn m̀ dyéɖéín-dyèɖè múɛɛ mana kɔ̃.” Hwɛ̀ ké Wuɖufí zaìn ma nyɔ kɔ̃̀ ɓíɖí-geɖeín ɓɛ́ ɔ po ma kà báɖè-bɛ̃̌ɔ̀ kɛɛ jè Nìómì gbo kɔ̃in, ké ɔ ɖá, “Gàa kɔ̃̀ ɓíɖí-geɖeín ɓɛ́ ḿ poà báɖè-bɛ̃̌ ɓó zɛ̃̌ɛ̀ kɛɛ, ɔ nyɛ́nɛ́ mɔ̀ Bóà.”

²⁰ Ké Nìómì cɛ̃ɛ ma ɔ dyúɛ̀ gmààɔ̀ gbo, ké ɔ ɖá, “Gèɖèpɔ́ɔ̀ mɔ̀ nyɔ ɓɛ́ ɔ nyuà nyɔ ɓě nìà cĩ́ɛń nyɛ kè nyɔ ɓě ɖǎà mɛ́ɛ nɔ̀mɔ̀ dyíin dyí teeɛɛ mɛ po Bóà mana kɔ̃. Ɔ mɔ̀ à gbǒ-xwíníín-nyɔ̀ ɓěɔ̀ ɖò, ké ɔ ɓɛ́ìn à nyɔ ɓě ɖǎà mɛ́ɛ dúí sèɛ̀.”

²¹ Ké Wuɖufí cɛ̃ɛ ma ɔ gbo, ké ɔ ɖá, “Gàaɔ̀ cɛ̃ɛ ḿ gbo ɖekè, ké ɔ ɖá, ‘Nì nɔ̄ ní kũ̀à-nyɔ̀ ɓěɔ̀ gbo tee, ɓɛ́ ní geɖeɔ̀ ké cɛ̃ɛ hwɛ̀.’ ”

²² Hwɛ̀ ké Nìómì cɛ̃ɛ ma ɔ gbo, ké ɔ ɖá, “Ní dyú, ɔ nɔ̀mɔ̀ dyíin ɓɛ́ m̀ ké se geɖe kà kò ɖò gbo mu, ɓɛ́ wa ní kɔ̃̀ ɖà m̀ ɖɛ gbà bũ̌ nyu. M̀ kè ɔ gbo-nì-màà ɓěɔ̀ mɛ naìn mú.”

²³ Ɔ jèɛɛ, Wuɖufí nì ma Bóàà gbo-nì-màà ɓěɔ̀ ɖeín kóɖó-kóɖó, ké ɔ gã̀ ma ɖé geɖeɔ̀ gbo muɛń dyi tee, ké báɖè kè hwítì hwɛ̀ ma geɖeín hwɛ̀. Ɓó tia múɛɛ, ɔ cĩ́ ma ɓó ɔ dàɔ̀ gbo.