Wóɖómà 5 - Ɓǎsɔ́ɔ̀ Báɓòɔ̀

À sɛ́ɖɛ́ìn dyí ɖé Gèɖèpɔ́ɔ̀ dyéɖéín

¹ Ɔ jèɛɛ, kà à hwìɖǐǐ-taɓa-taɓaɔ̀ ɖǎà nyu ké à ɖǎà dyí sɛ́ɖɛ́ìn nyɛɛ, à hwòɖǒ-dyùà ɓěɔ̀ mɛ dè dyi ɖé gìɖìǐ ɓɛ́ ɔ nìà ɓó à kè Gèɖèpɔ́ɔ̀ pṹa kɛɛ mú. Gìɖìǐɔ̀ dyììn ɖé à Bounɓo Jízɛ̀ Kɛ́ɖɛ́ì mú.

² Dyììn ɖé Jízɛ̀ múɛɛ, à ɖǎ kpé ɓéɖé ɓɛ́ à ké pá ɓɛ́ Gèɖèpɔ́ɔ̀ naɓaà à bìì nɔ̀mɔ̀ dyíin nyɛɛ mú nì. Ɔ mɔ̀ dɛ̀ ɓɛ́ à nyànàà dyi kàǔn wɛ̃. À kpá múàǔn, sepóɛɖé à dè Gèɖèpɔ́ɔ̀ dĩ́ín-dĩ̀ìnɔ̀ ɖò dyé jè hwòɖǒ kɔ̃.

³ Ɔ seɛ ɖòùn, kɛɛ à kpá múàǔn ɖé à gǎ-dyé-dyé ɓěɔ̀ mú ɖekè, sepóɛɖé à dyuòɛ̀ kà gǎ-dyé-dyé nyuɛ ké à ɓéɖé hwòɖǒ-ku-ku kɛ.

⁴ Ké hwòɖǒ-ku-ku nyuɛ ké à zi mú-dɔ̃̌-dɔ̃̌ mú, ké mú-dɔ̃̌-dɔ̃̌ mú-zi-zi dyà ɖɛ-hwòɖǒ-kɔ̃-dè-dè.

⁵ Ké ɖɛ ɓɛ́ à dèà hwòɖǒ kɔ̃ɛɛ, ɔ ní nyùìn à dɛ̃, sepóɛɖé Gèɖèpɔ́ɔ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ dyíìn ɖé à hwòɖǒ-dyùàɔ̀ múin dyììn ɖé Zùù Hwɛ̀ǐn-hwɛ̀ǐn ɓɛ́ Gèɖèpɔ́ɔ̀ ɖǎ à nyíɛɛ mú.

⁶ Ti ɓɛ́ à se ma kpé ɖò ɓéɖéɛɛ, ɓó ti déínɔ̀ ɓaɖaa, Kɛ́ɖɛ́ì mɛ́ ma ɓó nyɔ ɓě ɓɛ́ wa mɔ̀ Gèɖèpɔ́ɔ̀ ɖɛ-gbà-bũ̌-nyu-nyɔ̀ ɓěɛɛ bìì.

⁷ Ké ɔ kàmàǔn, ɓɛ́ à ɖò ké dyí-sɛ́ɖɛ́ìn-nyɔ̀ ɖò bìì mɛ́ dyɛ mɔ̀ùn. Kɛɛ ti ɖòɛ̀ ɓaɖaín, nyɔ ɖò ɓɛ́ìn hwòɖǒ kuɛ, ɓɛ́ ɔ ké nyɔ kɔ̃̀ kpeɖe nɔ̀mɔ̀ dyíin nyɛɛ bìì mɛ́.

⁸ Kɛɛ Kɛ́ɖɛ́ì mɛ́ ma ɓó à bìì ti ɓɛ́ à mɔ̀ ma nàmàǔn-nyɔ̀ keɛ. Ké kǎà Gèɖèpɔ́ɔ̀ nyu ma ɔ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ ɓéɖéà à bììɛɛ à dyí tɛ̀mɛ̀ìn.

⁹ Ké kà ɓɛ́ Kɛ́ɖɛ́ì nyɔmɔɔ̀ ɖǎà à dyí sɛ́ɖɛ́ìn nyɛɛ, nìí, ɔ mu à Gèɖèpɔ́ɔ̀ dyoɖoɔ̀ xwaún póìn jɛ́ɛ́ cá.

¹⁰ Gèɖèpɔ́ɔ̀ Dyú-gààɔ̀ mɛ́-mɛ́ɔ̀ zà ma bĩ̀ǎ ɓɛ́ ɔ nì ma kà à kè Gèɖèpɔ́ɔ̀ pṹa kɛɛ ɓó. Ɔ nyuɛ ma náa ti ɓɛ́ à mɔ̀ ma Gèɖèpɔ́ɔ̀ mú-nyɛ́-nyɔ̀ ɓěɛ. Ɔ dyi ná nìǐn, nìí, Kɛ́ɖɛ́ì fɛ̀ɛ̀ɔ̀ mu à póìn jɛ́ɛ́ cá, kà ɓɛ́ bĩ̀ǎ ɖò seà à kè Gèɖèpɔ́ɔ̀ pṹa nì ɖeɛ.

¹¹ Ɔ seɛ séín. À kpá múàǔn ɖé Gèɖèpɔ́ɔ̀ mú ɖekè, dyììn ɖé à Bounɓo Jízɛ̀ mú. Ɔ mɔ̀ nyɔ kɔ̃̀ mú ɓɛ́ à ɖǎà bĩ̀ǎ-zà-zà dyéìn kàǔn wɛ̃.

Áɖɔ̀ùn kè Kɛ́ɖɛ́ì

¹² Ɖɛ kɔó dyíɛɛ, ɔ kɛ̀. Gàa dyúáɖò dyà ma nàmàǔn ɓóɖó-kpàà kɔ̃, ké nàmàǔn dyà mɛ́-mɛ́. Ké kǎà mɛ́-mɛ́ nyu nyɔǔn séín kɔ̃ dyiɛ, sepóɛɖé nyɔǔn séín ɖǎ nàmàǔn nyu jè.

¹³ Nàmàǔn nì ma ɓóɖó-kpàà kɔ̃ kĩ́ín, hwɛ̀ ké Gèɖèpɔ́ɔ̀ tò ma gmaɔ̀. Kɛɛ dɛ̀ ɓɛ́ gma ɖò se nìɛɛ, wa se nyɔ ɖò dyi kpɔ̃ɔ ɓɛ́ìn ɓó nàmàǔn nyu jè.

¹⁴ Kɛɛ sɔ̀ìn Áɖɔ̀ùn nììn tiɔ̀ gbo, ɓɛ́ ɔ ké Mózè nììn tiɔ̀ gbo dyiɛɛ, mɛ́-mɛ́ kɔ̃̀ nyɔǔn wuɖuí. Ɔ kɔ̃̀ nyɔ ɓě ɓɛ́ wa se nàmàǔn kɔ̃̀ ɖò ɓɛ́ Áɖɔ̀ùn mɔ̀ùn nyu ma kà ɖé gmaɔ̀ wáɖá-wáɖá múɛɛ ɖò nyuɛɛ wuɖuí ɖekè. Áɖɔ̀ùn mɔ̀ ma nyɔ ké ma kà dyiɛɛ hwɔìn-ɖɛ̀.

¹⁵ Kɛɛ ɖɛ ɓɛ́ Gèɖèpɔ́ɔ̀ nyíà nyɔǔn pídyiɛɛ, ɔ se nì kà ɖɛ gbà ɓɛ́ Áɖɔ̀ùn nyu ma kà kɛɛ nìà kɛ. Gàa dyúáɖòɛ̀ ɖɛ gbà nyu jè nyuɛ ké nyɔ ɓáún-ɓáún mɛ́. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa, ɔ kɛà kɛ̀. Ɔ mɔ̀, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ zi kpéín ɓúáuń mìɔ, ké ɖɛ ɓɛ́ nyɔǔn ɖǎ dyé pídyi dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ kpeɖe nɔ̀mɔ̀ dyíinɔ̀ múɛɛ zi dyí vòɛ̌n ɓó nyɔ ɓáún-ɓáún bìì.

¹⁶ À se ɖɛ ɓɛ́ Gèɖèpɔ́ɔ̀ nyíà nyɔ pídyiɛ kè gàa dyúáɖòɛ̀ nàmàǔn dyí poɛ̀n ɓɛ́ìn, sepóɛɖé zaa-wɔ̃-po-po ɓɛ́ ɔ kɔ ma ɓó ɖɛ gbà dyúáɖòɔ̀ gbo dyíɛɛ, ɔ dyà ma zaa-dúún-wáɖá-wáɖá, kɛɛ ɖɛ ɓɛ́ Gèɖèpɔ́ɔ̀ nyí nyɔǔn pídyi, ɓɛ́ ɔ kɔ ɓó ɖɛ gbà pàɖǎ gbo dyíɛɛ, ɔ dyà zaa-xwaún-buɛ̀-buɛ̀.

¹⁷ Ɓó gàa dyúáɖòɛ̀ ɖɛ gbà nyu jèɛɛ, gĩɔ kɔ̃̀ nyɔǔn wuɖuí dyììn ɖé gàa dyúáɖò nìàǒ wɛɛ mú. Ɖɛa mɔ̀ jǎà, kɛɛ ɖɛ mɔ̀ jǎà jɛ́ɛ́ cáa kɛà kɛ̀. Ɔ mɔ̀, nyɔ ɓě ɓɛ́ Gèɖèpɔ́ɔ̀ ɖǎà ɔ kpeɖe nɔ̀mɔ̀ dyíin zià kpéín ɓúáuń wɛ̃ ɔ kè ɖɛ ɓɛ́ ɔ nyí nyɔǔn pídyi ɓɛ́ ɔ mɔ̀à ɔ dyí-sɛ́ɖɛ́ìn-sɛ́ɖɛ́ìnɔ̀ kɛ nyíɛɛ, wa mu cĩ́ìn, ɓɛ́ wa ké ɖɛ wuɖuí kɔ̃̀ dyììn ɖé gàa dyúáɖò mɔ̀à Jízɛ̀ Kɛ́ɖɛ́ì kɛɛ mú.

¹⁸ Kà dyúáɖò kà ɖɛ gbà dyúáɖò mɔ̀ nyɔ dyàà zaa-dúún-wáɖá-wáɖá ɓó nyɔǔn séín bììɛɛ, kǎà dyí-sɛ́ɖɛ́ìn-ɖɛ̀ ɓɛ́ gàa dyúáɖò nyuɛɛ, ɔ mɔ̀ nyɔ dyà zaa-xwaún-buɛ̀-buɛ̀ kè fɛ̀ɛ̀ ɓó nyɔǔn séín bìì.

¹⁹ Sepóɛɖé gàa dyúáɖòɛ̀ se wuɖu nyu jè nyuɛ ké nyɔ ɓáún-ɓáún jǔ ma nàmàǔn-nyɔ̀, ké kǎà gàa dyúáɖòɛ̀ wuɖu nyu jè muɛ nyuùn ɓɛ́ nyɔ ɓáún-ɓáún ké dyí-sɛ́ɖɛ́ìn-nyɔ̀ jǔ ɓó Gèɖèpɔ́ɔ̀ gbo.

²⁰ Gmaɔ̀ dyi ma, ɓɛ́ ɔ ké ɖɛ gbà kɔ̃ po. Kɛɛ dɛ̀ ɓɛ́ nàmàǔn kpá kɔ̃ɛɛ, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ zi ɓó dyí vòɛ̌n mìɔ.

²¹ Ɔ nyuɛ ma náa, ɓɛ́ kà nàmàǔn kɔ̃̀ ma nyɔ wuɖuí, ké ɔ dyà ma mɛ́-mɛ́ɛ, kǎà Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mɛ kɔ̃̀ nyɔ wuɖuí ɖé dyí-sɛ́ɖɛ́ìn-sɛ́ɖɛ́ìn mú, ɓɛ́ ɔ ké sè-ná-sèɛ̀ fɛ̀ɛ̀ dyà dyììn ɖé Jízɛ̀ Kɛ́ɖɛ́ì mɔ̀à à Bounɓoɔ̀ kɛɛ mú.