Wóɖómà 4 - Ɓǎsɔ́ɔ̀ Báɓòɔ̀

Ééɓòɖòhɛ̃́ɛ̀ mɔ̀ ɔ dyí-tɛ̀mɛ̀ìn-ɖɛ̀

¹ Nìí, ɖɛ́ à mɛ cɛ̃ ɓá Ééɓòɖòhɛ̃́ɛ̀ mɔ̀à à ɓǎ nììn ɓǎ ɖé nyɔǔn nììn wáká kɔ̃ɛɛ jè dyíɛ́?

² Ééɓòɖòhɛ̃́ɛ̀ mɔ̀ùn dyi ma dyí-sɛ́ɖɛ́ìn-nyɔ̀ jǔ ɓó ɖɛ ɓě ɓɛ́ ɔ ɖǎ ma nyuɛɛ jèǐn, nìí, ɔ ɓéɖé ɖɛ kɔ̃̀ jè ɔ kéɔ́ ɓɔ́ɖɔ́ɛ. Kɛɛ ɔ seɛ náa Gèɖèpɔ́ɔ̀ dyúa ɓéɖé.

³ Kɛɛ xwɛ̌ Gèɖèpɔ́ɔ̀-cèè-ɖɛ̀ɔ̀ ɖáá? Ɔ ɖá, “Ééɓòɖòhɛ̃́ɛ̀ taɓa Gèɖèpɔ́ɔ̀ hwìɖǐǐ, ké Gèɖèpɔ́ɔ̀ ɖáìn ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.”

⁴ Kɛɛ ɔ jǔ ké nyɔ ɖò dyi kũ̀à ɖò nyuín, nìí, ɔ pɛ́ɛ̀-ɖɛ̀ ɓɛ́ ɔ dyéà kɛɛ, m̀ seɛ jĩ́á-jè-ɖɛ̀ ɖáìn ɓɛ́ìn, sepóɛɖé ɔ ɓéɖé ɓɛ́ ɔ kéɛ dyé jè.

⁵ Kɛɛ nyɔ seà kũ̀à ɖò nyu, ké ɔ taɓaà nyɔ ɓɛ́ ɔ sɛ́ɖɛ́ìn nyɔ ɓě mɔ̀à ɔ ɖɛ-gbà-bũ̌-nyu-nyɔ̀ ɓěɛɛ dyíɛ hwìɖǐǐɛɛ, ɔ ɖáìn ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.

⁶ Kà dyúáɖòɔ̀ kǎà Dèɓé nyu nyɔ ɓɛ́ Gèɖèpɔ́ɔ̀ ɖáìn dyí-sɛ́ɖɛ́ìn-nyɔ̀ kɛɛ ɔ mana jè cɛ̃ɛ. Ɔ mɔ̀ nyɔ se ɖɛ ɖò nyu ɓó ɔ jèɛ. Dèɓé cɛ̃ɛ ma, ké ɔ ɖá,

⁷ “Nyɔ ɓě ɓɛ́ mana nì kɔ̃ɛɛ mɔ̀ nyɔ ɓě kɔ̃̀ nàmàǔn ɓě ɓɛ́ Gèɖèpɔ́ɔ̀ ɖǎ kɔ̃in zĩ̀ìn, ké Gèɖèpɔ́ɔ̀ ɖǎ waà ɖɛ gbà ɓěɔ̀ wa bũ̌in wɔɔ̀ kɛ.

⁸ Nyɔ ɓě ɓɛ́ mana nì kɔ̃ɛɛ mɔ̀ nyɔ ɓě ɓɛ́ Bounɓoɔ̀ se zaa kpɔ̃̀ìn ɓó ɖɛ gbà ɖò nyu jèɛ.”

⁹ Mana nìà kɛ nì nyɔ ɓě ɓɛ́ wa ɖǎà sàà mɛ́ɛ ɖòùn bììe? Mɔɔ ɔ nì nyɔ ɓě ɓɛ́ wa seà sàà mɛ́ɛ bìì ɖekèe? À ɖá Gèɖèpɔ́ɔ̀ ɖáìn Ééɓòɖòhɛ̃́ɛ̀ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.

¹⁰ Ké nìí, xwɛ̌ ɔ nyuɛ ma ɔ ɖáìn nyɛ́? Ééɓòɖòhɛ̃́ɛ̀ mɛ́ ma sàà hwɛ̀ɛ̀, mɔɔ ɔ séè ma sàà mɛ́ keè? Ɔ séè ma sàà mɛ́ ke. Ɔ kpá ma hwɛ̀ ké ɔ mɛ́ ma sàà.

¹¹ Sàà-mɛ́-mɛ́ mɔ̀ ma ɖàɓàìn-ɖɛ̀, ké Gèɖèpɔ́ɔ̀ nyíɛ ma ɔ. Ɔ mɔ̀ ma dyí-sɛ́ɖɛ́ìn-sɛ́ɖɛ́ìn ɓɛ́ ɔ hwìɖǐǐ-taɓa-taɓaɔ̀ nyu ké ɔ ɓéɖé ma ti ɓɛ́ ɔ séè ma sàà mɛ́ keɛɛ dyí-dyuòìn-ɖɛ̀. Ɔ nì ma ná, ɓɛ́ ɔ ké ma nyɔ séín ɓě ɓɛ́ wa ɓéɖé hwìɖǐǐ-taɓa-taɓa, ké wa se sàà mɛ́ kɛɛ ɓǎ jǔ. Wa mɔ̀ nyɔ ɓɛ́ Gèɖèpɔ́ɔ̀ ɖáìn ma dyí-sɛ́ɖɛ́ìn-nyɔ̀ kɛ.

¹² Ké Ééɓòɖòhɛ̃́ɛ̀ mɔ̀ nyɔ ɓě ɖǎà sàà mɛ́ɛ ɓǎ ɖekè. Ɔ mɔ̀ nyɔ ɓě mɛ́à sàà, ké wa síà hwìɖǐǐ-taɓa-taɓa ɓɛ́ à ɓǎ Ééɓòɖòhɛ̃́ɛ̀ ɓéɖéà ti ɔ séè ma sàà mɛ́ keɛɛ kíɖííɛ.

À dyé Gèɖèpɔ́ɔ̀ nyɛ́nɛ́ín-ɖáìn-ɖɛ̀ɔ̀ dyììn ɖé hwìɖǐǐ-taɓa-taɓa mú

¹³ Nyɛ́nɛ́ín-ɖáìn-ɖɛ̀ ɓɛ́ Gèɖèpɔ́ɔ̀ nyí ma kà Ééɓòɖòhɛ̃́ɛ̀ kè ɔ nyúà-dyú ɓěɔ̀ kɛɛ, ɔ mɔ̀ ɓɛ́ ɓóɖó-kpàà ké waà kɔ̃̀ɔ̀-ɖɛ̀ jǔ. Gmaɔ̀ seɛ ma nyu ɓɛ́ ɔ ké ma nyɛ́nɛ́ín-ɖáìn-ɖɛ̀ɔ̀ dyé. Ééɓòɖòhɛ̃́ɛ̀ hwìɖǐǐ-taɓa-taɓaɔ̀ nyuɛ ké ɔ sɛ́ɖɛ́ìn dyí. Ɔ kɔ̃̀ jè ɔ dyé ma kà nyɛ́nɛ́ín-ɖáìn-ɖɛ̀ɔ̀ kɛ̀.

¹⁴ Ɔ jǔ ké nyɔ ɓě ɓɛ́ wa mu ɓóɖó-kpàà kɔ̃̀ùn wɛ̃ɛ dyiɔ́ nyɔ ɓě ɓɛ́ wa dèà gmaɔ̀ hwòɖǒ kɔ̃ɛɛ jǔǐn, nìí, hwìɖǐǐ-taɓa-taɓa mɔ̀ɔ̌ ɖɛ fóɖóún, ké nyɛ́nɛ́ín-ɖáìn-ɖɛ̀ɔ̀ se ɖɛ kpa.

¹⁵ Sepóɛɖé gmaɔ̀ dyà dyoɖo, kɛɛ dɛ̀ ɓɛ́ gma ɖò se nìɛɛ, gma wáɖá-wáɖá ɖò se ɖé nì.

¹⁶ Nyɛ́nɛ́ín-ɖáìn-ɖɛ̀ɔ̀ dyììn ɖé hwìɖǐǐ-taɓa-taɓa mú, ɓɛ́ ɖɛ séín ké Gèɖèpɔ́ɔ̀ kpeɖe nɔ̀mɔ̀ dyíinɔ̀ mú dyììn, ɓɛ́ Ééɓòɖòhɛ̃́ɛ̀ nyúà-dyú séín ɓěɔ̀ ké nyɛ́nɛ́ín-ɖáìn-ɖɛ̀ɔ̀ ɓéɖé wɛ̃́ɛ́. Ɔ se nyɔ ɓě dèà gmaɔ̀ hwòɖǒ kɔ̃ɛɛ ɖòùn bìì, kɛɛ ɔ mɔ̀ ɓó nyɔ ɓě ɓéɖéà hwìɖǐǐ-taɓa-taɓa ɓɛ́ Ééɓòɖòhɛ̃́ɛ̀ ɓéɖéà kɛɛ bìì ɖekè, sepóɛɖé ɔ mɔ̀ à séín ɓǎ.

¹⁷ Kà Gèɖèpɔ́ɔ̀-cèè-ɖɛ̀ɔ̀ nyuɛ kà cɛ̃ɛ, ɔ ɖá, “Ní mu m̀ ɓóɖó-dù ɓáún-ɓáún ɓǎ mú nyuùn.” Ééɓòɖòhɛ̃́ɛ̀ mɔ̀ ɓóɖó-dù ɓáún-ɓáún ɓǎ ɖé Gèɖèpɔ́ɔ̀ ɓɛ́ ɔ taɓa ma kà hwìɖǐǐɛɛ dyéɖéín. Gèɖèpɔ́ɔ̀ mɔ̀ nyɔ nyuɛ ké nyɔ ɓě ɖǎà mɛ́ɛ cĩ́à ɖeɛ̀, ké ɔ cɛ̃ ɖɛ ɓě séè nyu keɛɛ jè pū, kà ɔ ɖǎɔ̌ kà wa nyuɛ.

¹⁸ Ɖɛ kɔ̃̀ jè Ééɓòɖòhɛ̃́ɛ̀ dè ma hwòɖǒ kɔ̃ɛɛ, ɔ seɛ ma xwíníín ɖò ɓéɖé, kɛɛ ɔ taɓa Gèɖèpɔ́ɔ̀ hwìɖǐǐ, ké ɔ dè nyɛ́nɛ́ín-ɖáìn-ɖɛ̀ɔ̀ dyé jè hwòɖǒ kɔ̃. Ɔ taɓa Gèɖèpɔ́ɔ̀ hwìɖǐǐ kà ɔ mu ma ɓóɖó-dù ɓáún-ɓáún ɓǎ jǔùn wɛ̃, kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. Ɔ ɖá, “Kà dɛ̀nɛ̀ mɛ́nɛ́ɛ́ ɓě jĩ̀à kɛɛ, kǎà nì xwíníín-dyù ɓě mu jĩ̀ìn.”

¹⁹ Ééɓòɖòhɛ̃́ɛ̀ hwìɖǐǐ-taɓa-taɓaɔ̀ se ma kpéí hwɛ̀ ti ɓɛ́ ɔ poìn ma ɔ mìɔùn nììn kpóɖó-dyùàɔ̀ jè hwìɖǐiɛ. Ɔ nì ma pū kà ɔ ɖǎ ma kà mɛ́ɛ, sepóɛɖé ɔ ɖǎ ma zɔ̃ hɔ̃dɛ̀ɖɛ̀ ɖò nyu. Ɔ dyuòɛ̀ ma kà Seɖɔ́ɛ̀ dyú-wóɖóìn-tì ɖǎ ma ziɛ, kɛɛ ɔ hwìɖǐǐ-taɓa-taɓaɔ̀ se ma kpéí hwɛ̀ fɔɔ.

²⁰ Gèɖèpɔ́ɔ̀ nyɛ́nɛ́ín-ɖáìn-ɖɛ̀ɔ̀ jè ɔ se ma hwòɖǒ sɔ̃́ ɓéɖé. Ɔ taɓa ma Gèɖèpɔ́ɔ̀ hwìɖǐǐ. Ké ɔ hwìɖǐǐ-taɓa-taɓaɔ̀ kùìn ma ɔ dyi, ké ɔ ɓàìn ma Gèɖèpɔ́ɔ̀,

²¹ sepóɛɖé ɔ dèɛ̀ ma hwòɖǒ kɔ̃ jɛ́ɛ́ cá kà ɓɛ́ Gèɖèpɔ́ɔ̀ ɓéɖé kpé, ɓɛ́ ɔ ké ɖɛ ɔ ɖáìn ma ɔ nyɛ́nɛ́ín nyɛɛ nyu kɛ.

²² Ɖɛa kɔ̃̀ jè Gèɖèpɔ́ɔ̀ ɖáìn ma ɔ dyí-sɛ́ɖɛ́ìn-nyɔ̀ dyììn ɖé ɔ hwìɖǐǐ-taɓa-taɓaɔ̀ mú.

²³ Kɛɛ wuɖu ɓě nìà kɛ se ma ɔ ɖòùn bìì céè,

²⁴ kɛɛ ɔ céè à mɔ̀ùn bìì ɖekè. À mɔ̀ nyɔ ɓě ɓɛ́ à taɓa nyɔ zà ma kà à Bounɓo Jízɛ̀ gĩɔ kɛɛ hwìɖǐǐɛɛ, Gèɖèpɔ́ɔ̀ mu à mɔ̀ùn dyí-sɛ́ɖɛ́ìn-nyɔ̀ ɖáìn ɖekè dyììn ɖé à nììn hwìɖǐǐ-taɓa-taɓaɔ̀ mú.

²⁵ À Bounɓo Jízɛ̀ mɔ̀ nyɔ ɓɛ́ wa ɖáɓá ma kà ɓó à ɖɛ gbà ɓě jè kɛ̀, ké ɔ mɔ̀ nyɔ Gèɖèpɔ́ɔ̀ zà ma kà gĩɔ, ɓɛ́ ɔ ké à dyí sɛ́ɖɛ́ìn ɖé Gèɖèpɔ́ɔ̀ dyéɖéín nyɛ̀.