Wóɖómà 16 - Ɓǎsɔ́ɔ̀ Báɓòɔ̀

Nyɔ ɖò-ɖò ɓěɛ̀ nyíɔún-zà-zà

¹ Ḿ nì ɓě à ɖíí-màà mɔ̀ Fíɓì kɛɛ dyí tɛ̀mɛ̀ǐn. Ɔ mɔ̀ cɔ́cì nìà ɖé Sɛ̃̀kíɖíà-hwɔ̀ɖɔ̀ɔ̀ múɛɛ gbo-nì-màà ɖò.

² Ɓě kpɔ̃ ɔ jè dyi, ɓɛ́ ɓě kèɔ̀ kè ké gbo kpɔ̃ìn ɖé Bounɓoɔ̀ mú. Ɓě kpɔ̃ ɔ jè dyi kà Gèɖèpɔ́ɔ̀-nyɔ̀ ɓě ɓéɖé ɓɛ́ wa ké wa mǔè ɖò jè dyi kpɔ̃ɔ nyuɛ. Ɓě mɛ kpá ɔ gbo ɖé ɖɛ séín ɓě ɓɛ́ ɔ mu ɓě xwa mɔ́ùn wɛ̃ɛ mú, sepóɛɖé ɔ kpá ma ḿ kè nyɔ ɓáún-ɓáún ɓě gbo ɖekè.

³ Ḿ zà Pìɖìsíɖà kè Àkúɖà mɔ̀à ḿ mǔè ɓě ɓɛ́ ḿ kè wa nyu ma kà kũ̀à ɖé Kɛ́ɖɛ́ì Jízɛ̀ múɛɛ nyíɔún.

⁴ Wa zà ma wa fɛ̀ɛ̀ɔ̀ hwòɖǒ gbo ɓó ḿ jè. Ḿ po wa zùo. Ké ɔ se ḿ ɖòǔn, kɛɛ ɔ mɔ̀ ḿ kè ɓóɖó-dù kà kò ɖò ɓěɛ̀ nyɔ ɓěɔ̀ cɔ́cì-nyɔ̀ séín ɓěɔ̀ ɖekè.

⁵ Ḿ zà cɔ́cì-nyɔ̀ séín ɓě ɓɛ́ wa poìn kà dyí tee ɖé wa ɓíɖí-gbǒǔn wɛ̃ɛ nyíɔún. Ḿ zà ní ɖɛ̀ɓɛ̀-nyɔ̀ mɔ̀à Ìpànétà kɛɛ nyíɔún. Ɔ mɔ̀ nyɔ taɓa ma Kɛ́ɖɛ́ì hwìɖǐǐ kĩ́ín ɖé Ésìà-ɓòɖòɔ̀ kɔ̃ɛ.

⁶ Ḿ zà Meɖé nyíɔún. Ɔ ɖǎ kũ̀à pàɖǎ nyu ɖé ɓě hwìɛ̀.

⁷ Ḿ zà Àã̀dòɖònákà kè Júnìà nyíɔún. Wa mɔ̀ ḿ ɓíɖí-nyɔ̀ ɓě, ké wa mɔ̀ ma ḿ mǔè kpɔɖɔ-ɖeín-nì-nyɔ̀ ɓě. Wa mɔ̀ àpɔ́sò nɔ̀mɔ̀ dyíin, ké wa se dyí kĩà ɖé àpɔ́sò tɔ̀ɔ̀ ɓěɔ̀ hwìɛ̀. Wa mɔ̀ ma Kɛ́ɖɛ́ì ɖeín-sí-nyɔ̀ kĩ́ín, hwɛ̀ ké ḿ mɔ̀à Kɛ́ɖɛ́ì ɖeín-sí-nyɔ̀ kɛ̀.

⁸ Ḿ zà Àã̀pìɖìétìà mɔ̀à ní ɖɛ̀ɓɛ̀-nyɔ̀ ɖé Bounɓoɔ̀ múɛɛ nyíɔún.

⁹ Ḿ zà Àbánà nyíɔún. À kèɔ̀ kè nyu ma kũ̀à ɖé Kɛ́ɖɛ́ì mú. Ḿ zà ní ɖɛ̀ɓɛ̀-nyɔ̀ mɔ̀à Séɖékà kɛɛ nyíɔún.

¹⁰ Ḿ zà Àpɛ́ɖì nyíɔún. Ɔ ɖǎa nyɔǔn dyí tɛ̀mɛ̀ìn kà ɔ mɔ̀ Kɛ́ɖɛ́ì ɖeín-sí-nyɔ̀ cáa. Ḿ zà Àwèɖèsɔ́ɖɔ́ɓìà ɓíɖí-gbǒ-xwíníín-nyɔ̀ ɓěɔ̀ nyíɔún.

¹¹ Ḿ zà Hìwóɖódìà mɔ̀à ḿ ɓíɖí-nyɔ̀ kɛɛ nyíɔún. Ḿ zà Nàsísà ɓíɖí-gbǒ-xwíníín-nyɔ̀ ɓěɔ̀ nyɔ ɓě nìà ɖé Bounɓoɔ̀ múɛɛ nyíɔún.

¹² Ḿ zà nyɔ ɓě ɓɛ́ wa nyuà Bounɓoɔ̀ bìì kũ̀à kɛɛ nyíɔún. Wa mɔ̀ Tàɖàfínà kè Tàɖàfósà. Ḿ zà ní ɖɛ̀ɓɛ̀-nyɔ̀ Pɔ́sì nyíɔún. Ɔ ɖǎ Bounɓoɔ̀ bìì kũ̀à nyu mìɔ.

¹³ Ḿ zà Wuɖufɔ́ nyíɔún. Bounɓoɔ̀ hwòɖǒ dèìn ɔ múin. Ḿ zà ḿ ɖe mɔ̀à ɔ ɖeɛɛ nyíɔún.

¹⁴ Ḿ zà Àsĩ́kìɖìtà kè Fíɖígɔ̃̀ kè Hɔ̀míì kè Pátòɖòbà kè Hɔ́mà ɔ kè à ɖíí cɔ́cì-nyɔ̀ ɓě nìà ɖé wa gboɛɛ nyíɔún.

¹⁵ Ḿ zà Fìɖóɖógà kè Judyá kè Níwìɖìà kè ɔ ɖíí-mààɔ̀ kè Òɖípà ɔ kè Gèɖèpɔ́ɔ̀-nyɔ̀ séín ɓě nìà ɖé wa gboɛɛ nyíɔún.

¹⁶ Ɓě zaìn zàìn nyíɔún ɖé wɔ̃-nyá-nyá mú ɓó dyí-sɛ́ɖɛ́ìn-kà. Kɛ́ɖɛ́ìɛ̀ cɔ́cì-nyɔ̀ ɓě nì dà séín nyɛɛ zà ɓě nyíɔún.

Nyɔ-náún-po-wùɖù hwɛ̀ìn-gbɔ

¹⁷ Ḿ ɖíí ɓě, ḿ ɓaà ɓě ní, ɓě mɛ dè nyɔ ɓě ɓɛ́ wa dyàà mú-ge-ge kè ɖɛ kàmàǔn-kàmàǔn wɛ̃ɛ dyéɖé gbo, sepóɛɖé ɖɛ ɓě nìà kɛ se ɖɛ ɓě ɖǎ ma cɛ̃́ɛ mú nì. Ɓě mɛ peɖe nyɔ nì kà ɓěa dyi,

¹⁸ sepóɛɖé nyɔ nì kà ɓěa se à Bounɓo mɔ̀à Kɛ́ɖɛ́ì kɛɛ bìì kũ̀à nyuɛń nì. Kɛɛ waà mɔ́ɔ́-ɖɛ̀ ɓěɔ̀ kɔ̃̀ wa wuɖuí. Wa cá nyɔ ɓě ɓɛ́ wa se zùɖùɛ̌n kàmàa ɖé wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ ɔ kè nyɔ-dya-dè-wùɖù múɛ.

¹⁹ Nyɔ séín ɖǎ ɓěɛ̀ wuɖu-nyu-nyuɔ̀ jè wɔ̃́. Ɖɛ nìà kɛ nyuɛ ké ḿ kpá ɓě bìì múàǔn mìɔ. Kɛɛ ḿ mɔ́ ɓɛ́ ɓě ké hwòɖǒ fɔ̀nɔ̀ ɓó ɖɛ mɔ̀ ɖɛ nɔ̀mɔ̀ dyíin nyɛɛ jè. Ḿ mɔ́ ɓɛ́ ɓě ké se kɛɛ ɖò ɓéɖé ɓá ɖɛ gbà nyu jè dyí.

²⁰ Ké Gèɖèpɔ́ɔ̀ mɔ̀ nyɔ tòà gìɖìǐɛɛ mu Sétɔ̃̀ ɓě ɓo xwíɖíi dyi wàìn ɓó kàǔn. À Bounɓo Jízɛ̀ɛ̀ manaɔ̀ mɛ nì ɓě kɔ̃.

²¹ Tímétè ɓɛ́ ḿ kèɔ̀ kè mɔ̀à kũ̀à-nyu-nyɔ̀ɛɛ zà ɓě nyíɔún. Ɖúsìà kè Jésììn ɔ kè Sɔ̀sípétà ɓɛ́ wa mɔ̀ ḿ ɓíɖí-nyɔ̀ ɓěɛɛ zà ɓě nyíɔún ɖekè.

²² Tɔ̀tíà nìà céè-ɖɛ̀ nìà kɛ céèɛ̌n ɓó ḿ bììɛɛ zà ɓě nyíɔún ɖé Bounɓoɔ̀ mú.

²³ Gédyà mɔ̀ nyɔ kpɔ̃à ḿ kè cɔ́cì-nyɔ̀ séín ɓěɔ̀ jè dyiɛɛ zà ɓě nyíɔún. Ìwáɖásɔ̀ mɔ̀ nyɔ mɔ̀à hwɔɖɔɔ̀ wíɖí-dyi-dè-nyɔ̀ kè à ɖíí-gàà Kɔ́tɔ̀ zà ɓě nyíɔún. [

²⁴ À Bounɓo Jízɛ̀ Kɛ́ɖɛ́ì mana mɛ nì ɓě séín kɔ̃. Kǎà ɔ mɛ nì.]

Ɓaà-wùɖù kè Gèɖèpɔ́ɔ̀ ɓàìn-wùɖù hwɛ̀ìn-gbɔ

²⁵ Gèɖèpɔ́ɔ̀ mɛ ɓéɖé ɓàìn-ɓàìn. Ɔ mɔ̀ nyɔ ɓéɖé kpé ɓɛ́ ɔ ké ɓě dyi kùìn dyììn ɖé bɔ̃̌ nɔ̀mɔ̀ dyíin ɓɛ́ ḿ cɛ̃à kɛ ɔ kè Jízɛ̀ Kɛ́ɖɛ́ì jè zio-po-poɔ̀ mú. Nyɔ se ma ɖɛa kɛ dyí dyuò kĩ́ín, sepóɛɖé Gèɖèpɔ́ɔ̀ vǐèɛ̀ ma ɓó ti tɔ̀mɔ̀ǔn-tɔ̀mɔ̀ǔn xwíníín, kɛɛ ɔ ɖǎa à dyí tɛ̀mɛ̀ìn.

²⁶ Ɔ ɖǎ píé wóɖó kàǔn. Kpáá-ɖɛ̀-cɛ̃-nyɔ̀ ɓěɔ̀ céè-ɖɛ̀ ɓěɔ̀ ɖǎa nyu ké ɓóɖó-dù séínɛ̀ nyɔ ɓěɔ̀ ɖǎa dyí dyuò. Sè-ná-sèɛ̀ Gèɖèpɔ́ɔ̀ ɖá wa mɛ nyuɛ ma náa, ɓɛ́ nyɔ séín ké Kɛ́ɖɛ́ì hwìɖǐǐ taɓa, ɓɛ́ wa ké ɔ wuɖu nyu.

²⁷ Gèɖèpɔ́ɔ̀ mɔ̀ nyɔ ɖòùn fɔ̀nɔ̀à hwòɖǒɛɛ, ɔ mɛ ɓéɖé ɓàìn-ɓàìn ɓó sè-ná-sèɛ̀ tiín, dyììn ɖé Jízɛ̀ Kɛ́ɖɛ́ì mú. Kǎà ɔ mɛ nì.