Wɛ́ɖɛ́ 9 - Ɓǎsɔ́ɔ̀ Báɓòɔ̀

Zùo-po-wùɖù mu Gèɖèpɔ́ɔ̀ gbo ɓá ɔ dyí-sɛ́ɖɛ́ìn-ɖɛ̀ nyu jè dyíɛ

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n wɛ́ɖɛ́-wùɖù mɔ̀à “Dyú-gàà Mɛ́ín” nyɛɛ mú.

¹ Óó Bounɓo, ní mu m̀ zùo poùn hwòɖǒɛ̀-ɖé-hwɛ̀-kà. Ní mu dĩ́ín-dĩ̀ìn-ɖɛ̀ ɓě ɓɛ́ m̀ ɖǎ nyuɛɛ jè zio mú pòìn.

² Ɖɛɓíɔ́, ní mu nì nyɛ́nɛ́ɔ̀ mú ɓèɖèìn, ɓɛ́ ḿ ké múàǔn kpá ɖé m̀ mú.

³ M̀ dyi xwáɖáún wóɖó nyɛ̀nɛ̀ɛ̀ ní, ní mú-nyɛ́-nyɔ̀ ɓěɔ̀ ɖú ɖe kɔ́ìn kpàǐ. Nìí, wa gbǒ, ké wa ɓuɖu, ké wa mɛ́.

⁴ M̀ dyi zaa wɔ̃ po ní, m̀ poɛ wɔ̃ dyí-sɛ́ɖɛ́ìn-kà. M̀ ɖǎ ɓó nì zèèɔ̀ kɔ̃ kò, ké m̀ ɖǎ ḿ bìì zaa wɔ̃ po dyí-sɛ́ɖɛ́ìn-kà.

⁵ M̀ ɖǎ ɓóɖó-dù ɓě ɓɛ́ wa ɓiè kũùn-kpò-gèɖèpɔ́ɔ̀ kɛɛ zaa dúún wáɖá, ké m̀ ɖǎ hwòɖǒ-kɔ̃in-nyìnììn-nyɔ̀ ɓěɔ̀ mú gbɔɔ̀. M̀ ɖǎ waà nyɛ́nɛ́ ɓóɖó-kpàà kɔ̃ dyi sámá gàná cá.

⁶ M̀ ɖǎ ní mú-nyɛ́-nyɔ̀ ɓěɔ̀ ɖáɓáa hwɔ gàná cá. M̀ ɖǎ waà hwɔɖɔ ɓěɔ̀ wáɖá, ké wa jè se nyɔ ɖò hwìɖǐi nìɛ̌ mu ɖe fɔɔ cá.

⁷ Bounɓoɔ̀ mu wuɖuí-kɔ̃̀-nyɔ̀ jǔùn kánáá pū. Ɔ ɖǎ ɔ zèèɔ̀ dyi dè, ɓɛ́ ɔ ké zaa wɔ̃ po.

⁸ Ɔ mu ɓóɖó-kpàà zaa wɔ̃ poùn ɓó dyí-sɛ́ɖɛ́ìn-kà. Ké ɔ mu ɓóɖó-dù ɓěɔ̀ wuɖuí kɔ̃̀ùn ɖé dyí-sɛ́ɖɛ́ìn-sɛ́ɖɛ́ìn mú.

⁹ Bounɓo, ɖé m̀ gbo mɔ̀ vǐè-naín ɓó nyɔ ɓě ɓɛ́ wa pĩ́à dyiɛɛ bìì. Ɖé m̀ gbo mɔ̀ pèɖèìn-naín kóɖó-kóɖó ɓó nyɔ ɓě ɓɛ́ wa nì fũ̀à-fṹá-tì múɛɛ bìì.

¹⁰ Nyɔ ɓě ɓɛ́ wa dyuò m̀ dyíɛɛ, wa taɓa m̀ hwìɖǐǐ, sepóɛɖé m̀ séè ɓó nyɔ ɓě ɓɛ́ wa dyi m̀ gboɛɛ dyi sè ɖò.

¹¹ Ɓě ɓàìn Bounɓo mɔ̀ nyɔ nìà ɖé ɔ zèèɔ̀ kɔ̃ ɖé Zádyɔún-hwɔ̀ɖɔ̀ɔ̀ múɛɛ ɖé wɛ́ɖɛ́-wùɖù mú. Ɓě pòìn ɖɛ ɓě ɓɛ́ ɔ ɖǎ nyuɛɛ jè zio mú ɖé ɓóɖó-dù ɓěɔ̀ gbo.

¹² Bounɓoɔ̀ mɔ̀ nyɔ ɓě ɓɛ́ wa nyìnììn bũ̌in nyɛɛ bìì kpa-zà-nyɔ̀, ké wa jè ní sɔ̀ ɔ hwìɖǐi. Ɔ ní zàìn nyɔ ɓě ɓɛ́ wa dyéàìn gǎ kɛɛ kpé-po-wùɖù ɖùǔ dyi.

¹³ Bounɓo, dyéɛ kà ní mú-nyɛ́-nyɔ̀ ɓěɔ̀ nì ḿ gǎ dyéɛ̌n nyɛ. Dyé ḿ wìǐn, ɓɛ́ m̀ ké ɖé ḿ gĩɔ wɔ̃ún bǎ.

¹⁴ M̀ dyiɛ náa nyu ní, ní mu nì ɓàìn-bɔ̃̀ dyi poùn ɖé Zádyɔún-hwɔ̀ɖɔ̀ɔ̀ nyɔ ɓěɔ̀ gbo, ké ɖéɛ̀ ní mu nì pó-póɔ̀ jè múà dyi nyùìn.

¹⁵ Ɓóɖó-dù ɓěɔ̀ ɖǎ ɓí ɓɛ́ wa mìɔùn ɓúɖúɛɛ mú kpá. Kpàǎ ɓɛ́ wa dè ma kɛɛ ɖǎ wa mìɔùn kpɔ̃.

¹⁶ Bounɓoɔ̀ ɖǎ ɔ mìɔùn nyɔǔn dyí tɛ̀mɛ̀ìn dyììn ɖé ɔ dyí-sɛ́ɖɛ́ìn-ɖɛ̀ wɔ̃-po-po mú. Ké hwòɖǒ-kɔ̃in-nyìnììn-nyɔ̀ ɓěɔ̀ mìɔùn nììn nyuu-ɖɛ̀ ɓěɔ̀ ɖǎ kpàǎ jǔ, ké ɔ ɖǎ wa kpɔ̃.

¹⁷ Hwòɖǒ-kɔ̃in-nyìnììn-nyɔ̀ ɓě mɔ̀ ɓóɖó-dù séín ɓɛ́ wa pòìn Gèɖèpɔ́ɔ̀ kɔ̃ín nyɛɛ, wa mu gĩɔ muùn.

¹⁸ Kɛɛ gǎ-dyé-nyɔ̀ ɓěɔ̀ jè se Gèɖèpɔ́ɔ̀ hwìɖǐi sɔ̀ɔ̌ mu kánáá pū, hwɛ̀ ḿ po níiń, waà hwòɖǒ-kɔ̃-dè-ɖɛ̀ ɓěɔ̀ ké mú gbɔɔ̀.

¹⁹ Óó Bounɓo, dyi ḿ bìì. Mɔ̀ǔn ɖá ɓɛ́ nyɔǔn-dyùɛ̀ sɔ̃ ké ɖé kɔ̃in nìo. Po ɓóɖó-dù ɓěɔ̀ zaa wɔ̃, ɓɛ́ m̀ ké wa gǎ kɔ̃ tò.

²⁰ Bounɓo, dyíìn ɓóɖó-dù ɓěɔ̀ fã̀à múin. Nyuɛ ɓɛ́ wa kéɛ dyí dyuò kà wa mɔ̀ fɔ́, ké wa mu mɛ́ìn wɛ̃́ɛ́ pūɛ.