Wɛ́ɖɛ́ 8 - Ɓǎsɔ́ɔ̀ Báɓòɔ̀

Gèɖèpɔ́ɔ̀ kpé ɓúá dyí ké ɔ zi nyɔǔn-dyùɛ̀ kpé dyí

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo.

¹ Óó à Bounɓo Ɖɛɓíɔ́, nì kpé vɛ̀nɛ̀ɔ̀ dyíìn ɓóɖó-kpàà dà séín dyi. Ké nì dĩ́ín-dĩ̀ìnɔ̀ dyíìn ɖé dyɔɔ̀ dyíin.

² M̀ ɖǎa nyu ké dyú mɛ́nɛ́ɛ́ kè dyú-pɛ̀ɖɛ̀ ɓě nì nì dĩ́ín-dĩ̀ìnɔ̀ jè mú ɓèɖèɛ̌n, nìí ɓɛ́ nì mú-nyɛ́-nyɔ̀ ɓěɔ̀ kè kpa-zà-nyɔ̀ ɓěɔ̀ dyiɛ wɔ̃́ín, waà wɔ̃ ké kã̀.

³ Ḿ dyi ɖé dyɔɔ̀ ɓɛ́ m̀ mɛà kɛɛ dyí gmɔ̀, ké ḿ dyi dɛ̀nɛ̀ɔ̀ kè dɛ̀nɛ̀ mɛ́nɛ́ɛ́ ɓě ɓɛ́ m̀ poà páún wɛ̃ɛ jè hwìɖǐi poìn ní,

⁴ nìí, ɖɛ́ nyɔǔn-dyù kpaá, ɓɛ́ m̀ dyià wa jè kàmà kɛ́? Ɖɛ́ nyɔǔn-dyùɛ̀ dyú ɓě kpaá, ɓɛ́ m̀ dyià ɖé wa jè gbo kɔ̃̀ kɛ́?

⁵ Dyéɛ, m̀ mɛ nyɔǔn-dyù ké m̀ ɖòùn nyɛ̀nɛ̀ɛ̀ kɔ̃ kpé zi wa kɔ̃. Ké m̀ ɓáìn wa dĩ́ín-dĩ̀ìn kè dya-dè-dè kɔ̃in.

⁶ M̀ nyu wa ɖɛ séín ɓě ɓɛ́ nì sɔ̃ ɖǎà mɛɛ wuɖuí-kɔ̃̀-nyɔ̀ mú. M̀ nyuɛ ké wa kɔ̃̀ ɖɛ séín kpé kɔ̃ún.

⁷ Wa kɔ̃̀ ɓáɖáá kè ɓìɖǐ kè xwáɖá-xwíɖíi-nìmìì séín kpé kɔ̃ún.

⁸ Ké wa kɔ̃̀ naà kè zimii kè ɖɛ tɔ̀ɔ̀ séín nà ɖé dyóóɔ̀ gbo dyiɛɛ kpé kɔ̃ún ɖekè.

⁹ Óó à Bounɓo Ɖɛɓíɔ́, nì kpé vɛ̀nɛ̀ɔ̀ dyíìn ɓóɖó-kpàà dà séín dyi.