Wɛ́ɖɛ́ 7 - Ɓǎsɔ́ɔ̀ Báɓòɔ̀

Ɓaà-wùɖù ɓó dyí-sɛ́ɖɛ́ìn-ɖɛ̀ jè

Wɛ́ɖɛ́ ɓɛ́ Dèɓé ɓèɖèìn ma Bounɓoɔ̀ dyi ɓá Kúsì ɓɛ́ ɔ sɔ̀à ɖé Bɛ̃́címà nììn xwéɖé-dùɔ̀ múɛɛ jè dyíɛ

¹ Óó Bounɓo ní Gèɖèpɔ́ɔ̀, ɖé m̀ gbo mɔ̀ ní vǐè-naín. Póìn ḿ sɔ̀ìn ɖé nyɔ séín ɓě nìà ḿ kíɖíí kpáuń wɛ̃ɛ xwaún.

² Ɔ se ná nìǐn, wa mu ḿ kpɔ̃ùn, ké wa mu ḿ dyi fáìn kà ganìǎ fáìn ɖɛ ɔ kpɔ̃ɛɛ dyiɛ, ké nyɔ ɖò se nìɛ̌ mu, ɓɛ́ ɔ ké ḿ póìn.

³ Óó Bounɓo ní Gèɖèpɔ́ɔ̀, ɔ jǔ ké ḿ dyi nyɔ ɖò ɖɛ gbà ɖò bũ̌ nyuín,

⁴ mɔɔ ké ḿ dyi ní ɓǎto ɓɛ́ bĩ̀ǎ ɖò se ɓó ḿ kèɔ̀ kè pṹa nìɛɛ ɖɛ gbà ɖò bũ̌ nyu ní, mɔɔ ké ḿ dyi ní mú-nyɛ́-nyɔ̀ɔ̀ ɖɛ ɖò xwa zà pídyi ní— ḿ dyi ɖɛ ɓěa ɖò nyuín—

⁵ nìí, ní mú-nyɛ́-nyɔ̀ɔ̀ mɛ kpá ḿ kíɖíí, ɓɛ́ ɔ ké ḿ kpɔ̃, ɓɛ́ ɔ ké ḿ ɖáɓá, ɓɛ́ ɔ ké ní xwɛ́ɔ̀ ɓó ɓíɖíi sè.

⁶ Bounɓo, kpá dyoɖoún ɓɛ́ m̀ ké dyí sɔ̀, ɓɛ́ m̀ ké ní mú-nyɛ́-nyɔ̀ ɓě ɓɛ́ wa nìà dyoɖo vɛ̀nɛ̀ múɛɛ gbo vɔ̃. Sɔ̀ dyí, ní Gèɖèpɔ́ɔ̀, ɓɛ́ m̀ kéɛ nyu ɓɛ́ dyí-sɛ́ɖɛ́ìn-ɖɛ̀ ɓɛ́ m̀ mɔ́à kɛɛ mɔ̀ ɖɛ ké ɓó sè.

⁷ Ɓóɖó-dù séín ɓěɔ̀ mɛ poìn ɓó m̀ dyúa dyí, ɓɛ́ m̀ ké nì zèè nìà ɖé dyiíɛɛ kɔ̃ kò, ɓɛ́ m̀ ké wa wuɖuí kɔ̃̀.

⁸ Bounɓo, mɔ̀ mɔ̀ nyɔǔn-dyùɛ̀ zaa-wɔ̃-po-nyɔ̀. Po ní zaaɔ̀ wɔ̃ dyììn ɖé ní dyí-sɛ́ɖɛ́ìn-sɛ́ɖɛ́ìnɔ̀ mú. M̀ dyuòɛ̀ kà ḿ se ɖɛ gbà ɖò nyuɛ.

⁹ Óó dyí-sɛ́ɖɛ́ìn-Gèɖèpɔ́ɔ̀, mɔ̀ mɔ̀ nyɔ dyéà ɖé nyɔǔn-dyùɛ̀ hwòɖǒ bũ̌ dyi, ké m̀ dyuòà waà hwìɖǐi-poìn-ɖɛ̀ dyíɛɛ, m̀ mɛ po hwòɖǒ-kɔ̃in-nyìnììn-nyɔ̀ ɓěɔ̀ hwòɖǒ-kɔ̃in-nyìnììn-nyìnììnɔ̀ ɓɔ́í, ɓɛ́ m̀ ké dyí-sɛ́ɖɛ́ìn-nyɔ̀ ɓěɔ̀ dyí gmɔ̀.

¹⁰ Gèɖèpɔ́ɔ̀ mɔ̀ ní dyí-zĩ̀ìn-ɖɛ̀. Ɔ mɔ̀ nyɔ ɓě kɔ̃̀ hwòɖǒ hwɛ̀ múɛɛ póìn-nyɔ̀.

¹¹ Gèɖèpɔ́ɔ̀ mɔ̀ jǎà-ɖɛ̀-wɔ̃-po-nyɔ̀. Ké ɔ kpáìn ɖɛ-gbà-nyu-nyɔ̀ ɓěɔ̀ dyoɖoún tee pū.

¹² Ɔ jǔ ké ɖɛ-gbà-nyu-nyɔ̀ ɓěɔ̀ se waà ɖɛ-gbà-nyu-nyuɔ̀ dyi táà ní, Gèɖèpɔ́ɔ̀ mu ɔ gàsíàɔ̀ dyí poùn. Ɔ mu ɔ pɔnɔɔ̀ mɛ́ wɔ̃ poùn, ɓɛ́ ɔ kéɛ ti dyéìn.

¹³ Ɔ ɖǎ ɔ vɔ̃̀ìn-ɖɛ̀ nì cɛ̃́ín ɓěɔ̀ ti dyéìn. Ɔ ɖǎ ɔ sé-kpìì nì nyɛ mánáín ɓěɔ̀ ti dyéìn ɖekè.

¹⁴ Kà màa ɖò nìà zùù kɔ̃, ɓɛ́ dyúɔ̀ dyià ɓúá ɖé ɔ xwíníín, hwɛ̀ ɓɛ́ ɔ dyià wóɖóɛɛ, kà dyúáɖòɔ̀ kǎà ɖɛ-gbà-nyu-nyɔ̀ ɓěɔ̀ sɔ́ waà ɖɛ gbà ɓěɔ̀ dyí ɖé wa hwòɖǒ bũ̌, hwɛ̀ ké wa cá nyɔǔn-dyù.

¹⁵ Ɖɛ-gbà-nyu-nyɔ̀ ɓěɔ̀ mìɔùn kpá ɓí ɓɛ́ wa ɓúɖú ɓó nyɔ kà kò ɖò mɔ̀ùn bììɛɛ ní.

¹⁶ Ɖɛ gbà ɓɛ́ wa zà dyaa dyi wa mìɔùn kɔ̃. Wa mìɔùn nììn ɖɛ gbàɔ̀ gǎ dyi wa kɔ̃.

¹⁷ Ní mu Bounɓo Ɖɛɓíɔ́ zùo poùn, ɓó ɔ dyí-sɛ́ɖɛ́ìn-ɖɛ̀ nyu jè. Ní mu Bounɓoɔ̀ nyɛ́nɛ́ɔ̀ mú ɓèɖèìn.