Wɛ́ɖɛ́ 6 - Ɓǎsɔ́ɔ̀ Báɓòɔ̀

Ɓaà-wùɖù ɓó gbo-kpá-kpá jè ɖé fũ̀à-fṹá-tì mú

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n gbǎɖí-wùɖù mú.

¹ Bounɓo, mɔ̀ǔn ɖá ɓɛ́ m̀ ké ḿ gǎ kɔ̃ tò ɖé nì dyoɖoɔ̀ múo, ɓɔ̌ɔ̀. Mɔ̀ǔn ɖá ɓɛ́ m̀ ké ḿ kpeɖe zà ɖé nì dyoɖoɔ̀ múo.

² Bounɓo, dyé ḿ wìǐn, sepóɛɖé kpé ɖò se ḿ dyí nì ɖe. Kánáìn ḿ dyi, sepóɛɖé ní kpá ɓěɔ̀ nì púɖúɛń,

³ ké fũ̀à-fṹá-ɖɛ̀ dyíìn ní kpóɖó-dyùà gànáɔ̀ múin. Bounɓo, tiɔ̀ nyɛ́ hwɛ̀ ɓɛ́ m̀ ké ḿ gbo kpáá?

⁴ Zĩàìn nì dyoɖo-hwòɖòɔ̀ gbo, ɓɛ́ m̀ ké ní fɛ̀ɛ̀ɔ̀ póìn ɓó nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ jè.

⁵ Nyɔ ɖò ɖǎ mɛ́ ní, ɔ ní poìn m̀ jè hwìɖǐi ɖe. Nyɛ́ ɓɛ́ìn ɖé gĩɔ nìɛ̀, hwɛ̀ ɓɛ́ ɔ ké m̀ ɓàìn ɖeɛ́?

⁶ Ní kpò-kpòɔ̀ ɖǎa nyu ké kpé ɖò se ḿ dyí nì ɖe. Máaún-hwùɖù séín múɛɛ, ní mícɛ̃̀ɔ̀ dèìn ní kɔ̃-pɛ̃́-ɖɛ̀ɔ̀ mú. Mícɛ̃̀ɔ̀ nyuɛ ké ní dú-kɔ̃-dè-ɖɛ̀ɔ̀ te pɔ̃̀ɔ̀-pɔ̃̀ɔ̀.

⁷ Ní dyéɖéɔ̀ bo, ké ɔ ní dyé dyi ɖe nɔ̀mɔ̀ dyíin, ɓó vĩ̌-vĩ̌ jĩ̀ kà ɓɛ́ ḿ ɖǎ nyu ɓá ɖɛ ɓě ɓɛ́ ní mú-nyɛ́-nyɔ̀ séín ɓěɔ̀ nyu ḿ bũ̌ɛɛ jè dyíɛ.

⁸ Ɓě sɔ̀ ḿ bũ̌, ɖɛ-gbà-nyu-nyɔ̀ séín. Sepóɛɖé Bounɓoɔ̀ ɖǎ ní vĩ̌-wùɖùɔ̀ wɔ̃́.

⁹ Bounɓoɔ̀ ɖǎ ní ɓaà-wùɖùɔ̀ wɔ̃́, ké ɔ muɛ gɔ̃̌ jǔùn.

¹⁰ Dɛ̃ mu ní mú-nyɛ́-nyɔ̀ séín ɓěɔ̀ nyuùn, ɓɛ́ wa hwòɖǒ ké ɖé ɖei kpá. Wa mu zùǔn sɔ̀ìn wàɖà, ɓɛ́ wa ké ɖe kɔ́ìn.