Wɛ́ɖɛ́ 5 - Ɓǎsɔ́ɔ̀ Báɓòɔ̀

Ɓaà-wùɖù ɓá dyí gmɔ̀ jè dyíɛ

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n péé-poo-wùɖù mú.

¹ Óó Bounɓo, wɔ̃́ ní ɓaà-wùɖùɔ̀. Wɔ̃́ ní kpò-wùɖùɔ̀.

² Ní kã́á kè ní Gèɖèpɔ́ɔ̀, ní ɓaà m̀ ní, wɔ̃́ ní kpé-po-wùɖùɔ̀, ɓɛ́ m̀ ké ḿ gbo kpá.

³ Bounɓo, gànà-kṹún ti séín nì wɔ̃́ ní ɓaà-wùɖùɔ̀ ní. Gànà-kṹún ti séín ḿ dyà ní hwòɖǒ-kpɔ̃-ɖɛ̀ ɓěɔ̀ m̀ gbo, ké ḿ fòìn m̀, ɓɛ́ m̀ ké ḿ gɔ̃̌ jǔ.

⁴ M̀ se Gèɖèpɔ́ɔ̀ kɔ̃̀ hwòɖǒ dèìn ɖɛ-gbà-nyu-nyu múin nyɛ. Hwòɖǒ-kɔ̃in-nyìnììn-nyɔ̀ ɖò se ɖé m̀ gbo cĩ́ɛ ɓɛ́ìn.

⁵ Nyɔ ɓě ɓɛ́ wa ɓúáìn wa mìɔùn dyíɛɛ se ɓó m̀ dyúa dyiɛ ɓɛ́ìn. Ɖɛ-gbà-nyu-nyɔ̀ séín jè nyàìn m̀ dyi.

⁶ Bounɓo, nì gbɔɔ̀ nyɔ ɓě mɔ̀ se-tɔ́mɔ́-nyɔ̀ kɛɛ mú. Nyɔ ɓě ɓɛ́ wa nyuà dyɔɔ̀ cà-cà ɓó nyɔmɔɔ dyi wáɖáìn jèɛ kè nyɔ-cá-nyɔ̀ ɓěɔ̀ jè nyàìn m̀ dyi.

⁷ Kɛɛ dyììn ɖé nì ɖɛ̀ɓɛ̀ǐn-ɖɛ̀ɓɛ̀ǐn se-sèìn-naín-kɔ̃̀ɔ̀ múɛɛ, ní mu ɖé nì gbǒɔ̀ mú dyáùn. Ké ní mu ɖé nì gbǒ hwɛ̀ǐn-hwɛ̀ǐnɔ̀ gbo gmɔ̀ìn, ɓɛ́ ḿ ké dú hwuɖu taɓa ɖé nì kpéín-dyé-dyé mú.

⁸ Bounɓo, nàìn ḿ ɖé nì hwìè sɛ́ɖɛ́ìn dyíɔ̀ xwíníín ɓó ní mú-nyɛ́-nyɔ̀ ɓěɔ̀ jè. M̀ mɛ nyuɛ ɓɛ́ nì hwìèɔ̀ ké wáɖáá nì ɓó ḿ dyúa.

⁹ Jǎà-wùɖù ɖò se ɖé ní mú-nyɛ́-nyɔ̀ ɓěɔ̀ wĩín nì fɔɔ. Ɖɛ mú gbɔɔ̀ jè mɔ̀ ɖɛ dyíìn ɖé wa hwòɖǒ bũ̌ dyi. Waà bùnù-zɔ̃̌ nì kà xwɛ́-gmàà fɔ̀nɔ̀ wɔ̃ nìà kɛ. Ké nyɔ-cá-wùɖù nì waà miɔ mánáín.

¹⁰ Óó Gèɖèpɔ́ɔ̀, wáɖá wa zaa dúún. Ɖɛ gbà ɓɛ́ wa ɖǎà dyí sɔ́ɛɛ mɛ dyi wa mìɔùn kɔ̃. M̀ mɛ kúmú wa sɔ̀ìn ɓó m̀ dyúa ɓó nàmàǔn jĩ̀ kà ɓɛ́ wa ɖǎà nyuɛɛ jè, sepóɛɖé mɔ̀ wa vɔ̃à gboɛ̀.

¹¹ Kɛɛ m̀ mɛ nyuɛ ɓɛ́ nyɔ séín pèɖèìn ɖé m̀ gboɛɛ ké múàǔn kpá. Múà mɛ nyuɛ ɓɛ́ wɛ́ɖɛ́ ké wa wĩín nì kánáá pū. M̀ mɛ gmɔ̀ nyɔ ɓě ɓɛ́ wa ɖɛ̀ɓɛ̀à m̀ múɛɛ dyí, nìí ɓɛ́ wa ké múàǔn kpá ɖé m̀ mú.

¹² Nì po dyí-sɛ́ɖɛ́ìn-nyɔ̀ ɓěɔ̀ mana kɔ̃o, Bounɓo. M̀ gmɔ̀ wa dyí dyììn ɖé nì ɖɛ̀ɓɛ̀ǐn-ɖɛ̀ɓɛ̀ǐnɔ̀ mú, kà dyí-zĩ̀ìn-ɖɛ̀ gmɔ̀à nyɔ dyí ɓó to-tìǐn nyɛ.