Wɛ́ɖɛ́ 4 - Ɓǎsɔ́ɔ̀ Báɓòɔ̀

Hwìo-ɓàà-wùɖù ɓó gbo-kpá-kpá jè

Dèɓéɛ̀ wɛ́ɖɛ́ nìà kɛ mu wɛ́ɖɛ́-nàìn-nyɔ̀ɔ̀ gbo. Ɔ mɛ ɓèɖèɛ̀n gbǎɖí-wùɖù mú.

¹ Óó Gèɖèpɔ́ɔ̀, mɔ̀ mɔ̀à ḿ bìì vɔ̃-nyɔ̀ɛɛ, kà ḿ nì m̀ ɖáuń wɛ̃ɛ, wɔ̃́ ní wuɖuɔ̀. Ti ɓɛ́ ḿ nì ma fũ̀à-fṹá-tì múɛɛ, m̀ kpá ma ḿ gbo. Ɓó kàǔn wɛ̃ɛ, dyé ḿ wìǐn, ɓɛ́ m̀ ké ní ɓaà-wùɖùɔ̀ wɔ̃́.

² Óó toɖo-kɔ̃-nyɔ̀ ɓě, ti jĩ̀ xwɛ̌ ɓě mu ní dĩ́ín-dĩ̀ìnɔ̀ dɛ̃-ɖɛ̀ mú nyuùn keɛ́? Ti jĩ̀ xwɛ̌ ɓě mu ɖɛ ɓě se kpáná ɖò mú nìɛɛ gboi kpɔ̃ùn, ɓɛ́ ɓě ké kũùn-kpò-gèɖèpɔ́ɔ̀ ɓěɔ̀ kíɖíí sí keɛ́?

³ Ɓě mɛ dyuòɛ̀ kà Bounɓoɔ̀ ɖǎ nyɔ ɓě ɓɛ́ wa taɓa ɔ hwìɖǐǐ kóɖó-kóɖóɛɛ wáká poɛ. Ḿ dyi Bounɓoɔ̀ ɖá ní, ɔ wɔ̃́ ní ɖá-wùɖùɔ̀ ní.

⁴ Ɓě dyi dyoɖoún kpá ní, ɓě mɛ ma mú, ɓěǐn kɔ̃̀ ɖà nàmàǔn nyu. Ɓě dyi ɓó ɓěɛ̀ kɔ̃-pɛ̃́-ɖɛ̀ ɓěɔ̀ kɔ̃ dyi pɛ̃́ín, ɓě mɛ dè dĩin, ɓɛ́ ɓě ké ɓěɛ̀ hwòɖǒ-dyùà ɓěɔ̀ mú dyi gmɔìn.

⁵ Ɓě nyu sáa-zàìn-ɖɛ̀ wɛ̃̀ìn Bounɓoɔ̀ kɛ, ɓɛ́ ɓě ké ɔ hwìɖǐǐ taɓa.

⁶ Nyɔ ɓáún-ɓáún nìɛ̀ cɛ̃iń, ké wa ɖá, “Nyɛ́ ɓɛ́ìn à nɔ̀mɔ̀ dyíin ɖò dyí nyuɛ kɛ́?” Bounɓo, nyuɛ ɓɛ́ nì ɖɛ̀ɓɛ̀ǐn-ɖɛ̀ɓɛ̀ǐnɔ̀ ké à kɔ̃in fã̀ìn kà ce nìà kɛ.

⁷ M̀ nyuɛ ké ní hwòɖǒɔ̀ kpá múàǔn mìɔ, ké ɔ zi nyɔ ɓě kɔ̃̀ geɖe kè géɖéè-gbǎ ɓě bã mìɔ kɛɛ nììn múàɔ̀ dyí.

⁸ Bounɓo, m̀ ɖòùn mɔ̀ nyɔ nyuɛ ké ḿ cĩ́ ɖé gìɖìǐ mú jèɛɛ, ní mu dyi pɛ̃́ìn, ɓɛ́ ḿ ké mɔ́ hwòɖǒ-dyi-dè-kà.