Wɛ́ɖɛ́ 149 - Ɓǎsɔ́ɔ̀ Báɓòɔ̀

Bounɓoɔ̀ ɓàìn-wɛ̀ɖɛ̀

¹ Ɓě ɓàìn Bounɓoɔ̀. Ɓě ɓèɖèìn Bounɓoɔ̀ wɛ́ɖɛ́ ɖìè ɖò gbo. Ɓě ɓàìn ɔ ɖé ɔ vòò-nyɔ̀ ɓěɔ̀ hwìɛ̀.

² Éézùɖùɛ̀-nyɔ̀ ɓě, ɓě kpá múàǔn ɓó nyɔ ɓɛ́ ɔ mɛà ɓěɛɛ jè. Ɓě mɔ̀à Zádyɔún-hwɔ̀ɖɔ̀ɔ̀ nyɔ ɓěɛɛ, ɓě kpá múàǔn ɓó ɓěɛ̀ Kã́áɔ̀ jè.

³ Ɓě kpá wɛ́ɖɛ́, ɓɛ́ ɓě ké ɔ nyɛ́nɛ́ɔ̀ ɓàìn. Ɓě ɓaɖa bòùnbá kè gbǎɖí, ɓɛ́ ɓě ké ɔ gbo ɓèɖèìn.

⁴ Sepóɛɖé Bounɓoɔ̀ hwòɖǒ dèìn ɔ nyɔ ɓěɔ̀ múin. To-ɖu-ɖu mɔ̀ bɛ̃̀ìn-ɖɛ̀, ké ɔ bɛ̃̀ìn nyɔ ɓě ɓɛ́ wa dyà wa mìɔùn ɓíɖíiɛ.

⁵ Gèɖèpɔ́ɔ̀ nyɔ ɓěɔ̀ mɛ kpá múàǔn ɖé waà to-ɖu-ɖuɔ̀ mú. Wa mɛ nyu múà-kùɖǔ-kuɖu ɓó waà kɔ̃-pɛ̃́-ɖɛ̀ ɓěɔ̀ kɔ̃.

⁶ Gèɖèpɔ́ɔ̀ ɓàìn-ɓàìnɔ̀ mɛ nì wa wĩín, ɓɛ́ gàsíà ɓéɖé dyéɖé sɔ̃́ ɓě ké wa xwaún nì,

⁷ ɓɛ́ wa ké ɓóɖó-dù kà kò ɖò ɓěɛ̀ nyɔ ɓěɔ̀ kpa kɔ̃in zàìn, ɓɛ́ wa ké nyɔ ɓěɔ̀ gǎ kɔ̃ dyà,

⁸ ɓɛ́ wa ké waà kã́á ɓěɔ̀ kè waà wuɖuí-kɔ̃̀-nyɔ̀ tɔ̀ɔ̀ ɓěɔ̀ dyɔ̀ɔ̌ sã̀ìn,

⁹ ɓɛ́ wa ké zaa-dúún-wáɖá-wáɖá kɔ̃̀ jè ɓɛ́ Gèɖèpɔ́ɔ̀ ɖǎ ma kà cɛ̃ɛ ɓóɖó-dù kà kò ɖò ɓěɛ̀ nyɔ ɓěɔ̀ kɔ̃ dyà. Ɖɛ nìà kɛ mɔ̀ dya-dè-dèɔ̀ ɓó Gèɖèpɔ́ɔ̀ nyɔ ɓěɔ̀ bìì. Ɓě ɓàìn Bounɓoɔ̀.