Wɛ́ɖɛ́ 148 - Ɓǎsɔ́ɔ̀ Báɓòɔ̀

Ɖɛ séín mɛ ɓàìn Bounɓoɔ̀

¹ Ɓě ɓàìn Bounɓoɔ̀. Ɓě mɔ̀ nyɔ ɓě cĩ́à ɖé dyiíɛɛ, ɓě ɓàìn Bounɓoɔ̀ ɖé dyɔún.

² Ɓě mɔ̀à ínjà kúɖúú ɓěɛɛ, ɓě ɓàìn ɔ.

³ Dyóɖó kè dɛ̀nɛ̀, ɓě ɓàìn Bounɓoɔ̀. Ɓě mɔ̀à dɛ̀nɛ̀ mɛ́nɛ́ɛ́ séín ɓě nìà fãuń ɖé dyɔɔ̀ dyíɛɛ, ɓě ɓàìn ɔ.

⁴ Kà dyúáɖòɔ̀ kǎà dyɔɔ̀ nìà ɖéé ɖé dyiíɛ kè ní nìà ɖé dyɔɔ̀ dyíɛɛ mɛ ɓàìn Bounɓoɔ̀ ɖekè.

⁵ Ɖɛ séín ɓěɛ̀ mɛ ɓàìn Bounɓoɔ̀, sepóɛɖé ɔ mɛ ma wa dyììn ɖé ɔ wuɖuɔ̀ mú.

⁶ Ɔ po ma wa pá ɓě mú, ɓɛ́ wa ké ɓó nì ɓó sè-ná-sèɛ̀ tiín. Ɔ nyu ma bã̀à ɓě ɓɛ́ wa se péɖéɛ ɓɛ́ìn nyɛ.

⁷ Ɓě ɓàìn Bounɓoɔ̀ nɔ̄ ɓóɖó-kpàà kɔ̃. Ɓě mɔ̀à dyóún-ɖɛ̀ vɛ̀nɛ̀ ɓě kè dyóóɔ̀ dɛ̀ tɔ̀mɔ̀ǔn-tɔ̀mɔ̀ǔn ɓěɛɛ, ɓě ɓàìn ɔ.

⁸ Ɓě ɓàìn Bounɓoɔ̀, ɓě mɔ̀à wɛ́ɖɛ́-wɛ́ɖɛ́ kè sɔ̃̀ɔ̀-kpò kè dunu kè ní-kpò ɔ kè dìì kɛ. Ɓě mɔ̀ ɖɛ ɓě ɓɛ́ ɓě nìà ɔ wuɖuɔ̀ nyuɛń nyɛ̀.

⁹ Ɓě ɓàìn Bounɓoɔ̀, ɓě mɔ̀à toɖo vɛ̀nɛ̀ ɓě kè toɖo mɛ́nɛ́ɛ́ ɓě kè ɖii-cù ɓě ɔ kè cu tɔ̀ɔ̀ séín ɓěɛ.

¹⁰ Ɓě ɓàìn Bounɓoɔ̀, ɓě mɔ̀à xwáɖá-xwíɖíi-nìmìì ɓě kè nyúà-ɖɛ̀ ɓě kè ɓíɖíi-dyi-nà-ɖɛ̀ ɓě ɔ kè naà séín ɓěɛ.

¹¹ Ɓě ɓàìn Bounɓoɔ̀, ɓě mɔ̀ kã́á ɓě kè nyɔ-wuɖuí-kɔ̃̀-nyɔ̀ tɔ̀ɔ̀ séín ɓě ɔ kè nyɔ tɔ̀ɔ̀ séín ɓě nì ɓóɖó-kpàà kɔ̃ɛ.

¹² Gàa-dyù gmɔ̀ ɓě kè màa-dyù gmɔ̀ ɓě kè gàa sùà ɓě ɔ kè dyú mɛ́nɛ́ɛ́ ɓě, ɓě ɓàìn Bounɓoɔ̀.

¹³ Wa mɛ ɓàìn Bounɓoɔ̀ nyɛ́nɛ́ɔ̀, sepóɛɖé ɔ ɖòùn kɔ̃̀ nyɛ́nɛ́ nì ɖé nyɛ́nɛ́ séín kɔ̃in. Ɔ dĩ́ín-dĩ̀ìnɔ̀ ɓúá dyí ké ɔ zi dĩ́ín-dĩ̀ìn séín nì nɔ̄ ɓóɖó-kpàà kɔ̃ kè ɖé dyɔún wɛ̃ɛ dyí.

¹⁴ Ɔ ɖǎa nyu ké ɔ nyɔ ɓěɔ̀ ɖǎ dyi ku mìɔ, nìí ɓɛ́ ɔ nyɔ séín ɓěɔ̀ ké ɔ ɓàìn. Wa mɔ̀ Éézùɖùɛ̀-nyɔ̀ ɓě kɔ̃̀ jè nìà ɔ hwòɖǒ kɔ̃ kóɖó-kóɖóɛ̀. Ɓě ɓàìn Bounɓoɔ̀.